ବିଜେପୁର,୧୨।୪(ଡି.ଏନ୍.ଏ.): କରୋନା ସଂକ୍ରମଣରୁ ଦୂରେଇ ରହିବାକୁ ମାସ୍କ ପିନ୍ଧିବା ପାଇଁ ସରକାର ନିର୍ଦ୍ଦେଶ ଜାରି କରିଛନ୍ତି। ହେଲେ ବହୁ ଅମାନିଆ ଏହାକୁ ଖାମଖିଆଲୀ ଭାବେ ନେଇ ମାସ୍କ ପିନ୍ଧୁ ନାହାନ୍ତି। ଫଳରେ ବରଗଡ଼ ଜିଲା ବିଜେପୁର ଏନ୍ଏସି ପକ୍ଷରୁ ଅଚାନକ ଚଢାଉ ଅଭିଯାନ ଆରମ୍ଭ ହୋଇଛି। ଏହି କ୍ରମରେ ରବିବାର ସର୍ବସାଧାରଣ ସ୍ଥାନରେ, ଦୋକାନରେ, ବାଇକରେ ଯିବାବେଳେ ତଥା ଖୁଲମଖୁଲା ତାସ ଖେଳ ଖେଳୁଥିବା ଲୋକ ଏହି ଚଢାଉବେଳେ ଧରା ପଡିଥିଲେ। ତହସିଲଦାର କୁଳମଣି ରଣବିଡା, ଏନ୍ଏସି କାର୍ଯ୍ୟର୍ନିବାହୀ ଅଧିକାରୀ ରୁକ୍ମଣ ମେହେର ଉକ୍ତ ଚଢାଉ ଅଭିଯାନରେ ସାମିଲ ହୋଇଥିଲେ। ଏନେଇ ଏନ୍ଏସି କାର୍ଯ୍ୟର୍ନିବାହୀ ଅଧିକାରୀ ରୁକ୍ମଣ ମେହେରଙ୍କୁ ପଚାରିବାରୁ ୯ଜଣଙ୍କଠାରୁ ଦୁଇଶହ ଟଙ୍କା ଲେଖାଏ ଜରିମାନା ଆଦାୟ ହୋଇଛି। ଅପରପକ୍ଷେ କନ୍ଧରାରେ ତାସ ଖେଳ ଖେଳୁଥିବା ଲୋକଙ୍କୁ ଚଢାଉ କରାଯାଇ ଥିଲା। ହେଲେ ସେମାନଙ୍କ ମଧ୍ୟରୁ ୮ଜଣ ଖସି ଯାଇଛନ୍ତି। ସେମାନେ ଆମ କାର୍ଯ୍ୟାଳୟକୁ ଆସି ଜରିମାନା ପ୍ରଦାନ ନ କଲେ ବାଧ୍ୟ ହୋଇ ତାଙ୍କ ନାମରେ ଥାନାରେ ଲିଖିତ ଅଭିଯୋଗ କରାଯିବ। ଏହିପରି ଅଚାନକ ଚଢାଉ ଅଭିଯାନ ଜାରି ରହିବ ବୋଲି ସେ କହିଛନ୍ତି। ଉକ୍ତ ଚଢାଉ ଯୋଗୁ ସାଧାରଣରେ ଭୟ ସୃଷ୍ଟି ହୋଇଛି।
