ମାଲକାନଗିରି/ ଚିତ୍ରକୋଣ୍ଡା/କୋରୁକୋଣ୍ଡା, ୪।୧୨ (ଡି.ଏନ୍.ଏ.)-ମାଲକାନଗିରି ଜିଲା ସ୍ବାଭିମାନ ଅଞ୍ଚଳରେ ପୁଣି ଆଦିବାସୀଙ୍କ ପ୍ରଜାମେଳି ଦେଖିବାକୁ ମିଳିଛି। ଜୋଡାମ୍ବ ପଞ୍ଚାୟତର ହନ୍ତାଳଗୁଡାଠାରେ ମଙ୍ଗଳବାର ୫ଶହରୁ ଊର୍ଦ୍ଧ୍ୱ ଆଦିବାସୀ ମହିଳାପୁରୁଷ ୩୧ ଦଫା ଦାବିନେଇ ପ୍ରଜାମେଳି କରି ଏକାଠି ହୋଇଥିଲେ। ଉକ୍ତ ଅଞ୍ଚଳରେ ଶିକ୍ଷା ବ୍ୟବସ୍ଥାରେ ସୁଧାର, ସମସ୍ତଙ୍କୁ ଜଙ୍ଗଲ ଜମି ପଟ୍ଟା, ବିଦ୍ୟାଳୟରେ ଶିକ୍ଷକ ନିଯୁକ୍ତି, ଗତଥର ଜଳମଗ୍ନ ହୋଇ ଫସଲ ନଷ୍ଟ ହୋଇଥିବା ଚାଷୀଙ୍କୁ କ୍ଷତିପୂରଣ, ଅଙ୍ଗନଓ୍ବାଡି କେନ୍ଦ୍ର କାର୍ଯ୍ୟକ୍ଷମ କରିବା, ନାକାମାମୁଡି ପଞ୍ଚାୟତକୁ ୨ ଭାଗ କରି ନୂତନ ପଞ୍ଚାୟତ ଗଠନ, ଛାତ୍ରୀଛାତ୍ରଙ୍କୁ ଜାତିଗତ ପ୍ରମାଣ ପତ୍ର, ସମସ୍ତ ଗ୍ରାମକୁ ପାନୀୟ ଜଳ, ବିଦ୍ୟୁତ୍,ପ୍ରତି ପଞ୍ଚାୟତରେ ସ୍ବାସ୍ଥ୍ୟକେନ୍ଦ୍ର ନିର୍ମାଣ ଆଦି ଦାବି ନେଇ ସେମାନେ ଏକାଠି ହୋଇଥିବା ଜଣାପଡିଛି। ସେମାନଙ୍କ ଗତଥରର ଦାବି ଏପର୍ଯ୍ୟନ୍ତ ପୂରଣ ହୋଇନାହିଁ ା ହନ୍ତାଳଗୁଡାରେ ବିଏସ୍ଏଫ୍ କ୍ୟାମ୍ପ ଓ ଟିକରପଡାରେ ରାସ୍ତା ନିର୍ମାଣକୁ ମଧ୍ୟ ଅଞ୍ଚଳବାସୀ ବିରୋଧ କରିଛନ୍ତି। ହନ୍ତାଳଗୁଡାଠାରେ ବିଏସଏଫ୍ କ୍ୟାମ୍ପ ପ୍ରତିଷ୍ଠା ହେଲେ ଏହି ଅଞ୍ଚଳର ଆଦିବାସୀଙ୍କ ଧନଜୀବନ ସୁରକ୍ଷିତ ରହିବ ନାହିଁ। ପ୍ରଥମେ ଗ୍ରାମାଞ୍ଚଳ ରାସ୍ତା ନିର୍ମାଣ କରି ପରେ ମୁଖ୍ୟରାସ୍ତା ନିର୍ମାଣ କରିବାକୁ ଅଞ୍ଚଳବାସୀ ଦାବି କରିଛନ୍ତି। ଗୁରୁପ୍ରିୟା ସେତୁ ନିର୍ମାଣ ସତ୍ତ୍ୱେ ଉକ୍ତ ଅଞ୍ଚଳର ବିକାଶ ହୋଇନାହିଁ। ଲୋକେ ଏବେ ମଧ୍ୟ ମୌଳିକ ସୁବିଧା ସୁଯୋଗରୁ ବଞ୍ଚତ୍ତ ହେଉଛନ୍ତି ବୋଲି ସେମାନେ ଅଭିଯୋଗ କରିଛନ୍ତି। ଏ ସମ୍ପର୍କରେ ମାଲକାନଗିରି ଏସ୍ପି ରିଷିକେଷ ଡି. ଖିଲାରି କହିଛନ୍ତି ଯେ, ଲୋକେ ଯଦି ଅଞ୍ଚଳର ବିକାଶ ଚାହୁଁଛନ୍ତି ତାହା ହେଲେ ଉନ୍ନୟନ କାର୍ଯ୍ୟକୁ କାହିଁକି ବିରୋଧ କରୁଛନ୍ତି। ରାସ୍ତା ନିର୍ମାଣ ହେଲେ ଲୋକଙ୍କ ନିକଟରେ ମୌଳିକ ସୁବିଧା ପହଞ୍ଚତ୍ବ। କ୍ୟାମ୍ପ ପ୍ରତିଷ୍ଠା ହେଲେ ମାଓବାଦୀ ଦମନ ସହ ଅଞ୍ଚଳର ବିକାଶ ହୋଇପାରିବ। ପୋଲିସ ପ୍ରଶାସନ ପକ୍ଷରୁ ଉକ୍ତ ଅଞ୍ଚଳରେ ପାନୀୟ ଜଳଠାରୁ ଆରମ୍ଭ କରି ଯୋଗାଯୋଗ ପର୍ଯ୍ୟନ୍ତ ସମସ୍ତ ବ୍ୟବସ୍ଥା କରିବା ପାଇଁ ଉଦ୍ୟମ କରାଯାଉଛି। ତେବେ କେତେକ ଗଣତନ୍ତ୍ର ବିରୋଧୀ ସଙ୍ଗଠନ ନିରୀହ ଆଦିବାସୀଙ୍କୁ ପୋଲିସ ପ୍ରଶାସନ ବିରୋଧରେ ମତେଇ ଆଦିବାସୀଙ୍କ ମୌଳିକ ଅଧିକାରକୁ କ୍ଷୁଣ୍ଣ କରୁଛନ୍ତି ବୋଲି ଖିଲାରି କହିଛନ୍ତି।
