ନୂଆଦିଲ୍ଲୀ,୯-୨: ବେତନ ସଂଶୋଧନ ଦାବିରେ ଦେଶର ବ୍ୟାଙ୍କ ସଂଘଗୁଡିକ ପକ୍ଷରୁ ଜାନୁୟାରୀ ୩୧ ଏବଂ ଫେବୃୟାରୀରେ ୧ରେ ୨ ଦିନିଆ ଧର୍ମଘଟ ଡାକରା ଦିଆଯାଇଥିଲା। ଏହି ସମୟରେ ମୋଟ ୪ ଦିନ ବ୍ୟାଙ୍କ ବନ୍ଦ ହୋଇଥିଲା। ଧର୍ମଘଟ ସଫଳ ହୋଇଥିବା ସଂଘଗୁଡିକ ପକ୍ଷରୁ ସୂଚନା ଦିଆଯାଇଥିଲା। ସଂଘଗୁଡିକ ଆସନ୍ତା ମାସ ୧୧ରୁ ପୁଣି ଥରେ ୩ ଦିନିଆ ଧର୍ମଘଟକୁ ଓହ୍ଲାଇବେ ବୋଲି ସୂଚନା ରହିଛି। ଯଦି ଏହି ଧର୍ମଘଟ ସଫଳ ହୁଏ ତେବେ ମାର୍ଚ୍ଚ ଦ୍ୱିତୀୟ ସପ୍ତାହରେ ୫ ଦିନ ବ୍ୟାଙ୍କ ବନ୍ଦ ରହିପାରେ ବୋଲି କୁହାଯାଉଛି। ବ୍ୟାଙ୍କ ଏମ୍ପ୍ଲଇ ଫେଡେରେଶନ ଅଫ୍ ଇଣ୍ଡିଆ(ବିଇଏଫ୍ଆଇ) ଏବଂ ଅଲ୍ ଇଣ୍ଡିଆ ବ୍ୟାଙ୍କ ଏମ୍ପ୍ଲଇଜ୍ ଆସୋସିଏଶନ (ଏଆଇବିଇଏ) ପକ୍ଷରୁ କୁହାଯାଇଛି ଯେ, ମାର୍ଚ୍ଚ ୧୧ରୁ ୧୩ ଯାଏ ବ୍ୟାଙ୍କ କର୍ମଚାରୀ ଧର୍ମଘଟକୁ ଓହ୍ଲାଇବାକୁ ନିଷ୍ପତ୍ତି ନିଆଯାଇଛି। ଇଣ୍ଡିଆନ ବ୍ୟାଙ୍କ ଆସୋସିଏଶନ ସହ ବେତନ ସଂଶୋଧନ ନେଇ ଆଲୋଚନା ବିଫଳ ହେବା ପରେ ଏଭଳି ପନ୍ଥା ଗ୍ରହଣ କରାଯାଇଛି। ଦ୍ୱିତୀୟ ଶନିବାର,ରବିବାର ସମେତ ବ୍ୟାଙ୍କ ୫ ଦିନ ବନ୍ଦ ହେବାର ଆଶଙ୍କା ରହିଥିବା ସୂଚନା ରହିଛି। ଏହି ସମୟରେ ଘରୋଇ ବ୍ୟାଙ୍କ କାରବାର ପ୍ରଭାବିତ ହେବ ନାହିଁ। ଏହି ଧର୍ମଘଟ ହେଲେ ଚଳିତ ବର୍ଷର ତୃତୀୟ ବ୍ୟାଙ୍କ ଧର୍ମଘଟ ହେବ। ଏହା ପୂୂର୍ବରୁ ଜାନୁୟାରୀ ୮ରେ ଭାରତ ବନ୍ଦ ଦିନ ବ୍ୟାଙ୍କ କାରବାର ପ୍ରଭାବିତ ହୋଇଥିଲା। ବିଭିନ୍ନ ଦାବିରେ ବ୍ୟାଙ୍କସଂଘଗୁଡିକ ଏପ୍ରିଲ ପହିଲାରୁ ଅନିର୍ଦ୍ଦିଷ୍ଟ କାଳ ଲାଗି ଧର୍ମଘଟକୁ ଓହ୍ଲାଇବେ ବୋଲି ଜଣାପଡିଛି।
