ଭୁବନେଶ୍ୱର,୭ା୫(ବ୍ୟୁରୋ): ମହାମାରୀ କରୋନା ବେଳେ କ୍ଷୁଦ୍ର ବେସରକାରୀ ସଂସ୍ଥାଗୁଡ଼ିକରେ କାମ କରୁଥିବା ସ୍ବଳ୍ପ ବେତନଧାରୀ କର୍ମଚାରୀଙ୍କ ଆର୍ଥିକ ଉନ୍ନତି ନିମନ୍ତେ ଭାରତ ସରକାରଙ୍କ ଶ୍ରମ ମନ୍ତ୍ରାଳୟ ତରଫରୁ ଆରମ୍ଭ କରାଯାଇଛି ‘ପ୍ରଧାନମନ୍ତ୍ରୀ ଗରିବ କଲ୍ୟାଣ ଯୋଜନା’। ଏହି ଯୋଜନା ଅଧୀନରେ ମାର୍ଚ୍ଚ ମାସରେ ପ୍ରାୟ ୧ଲକ୍ଷ ଅନୁଷ୍ଠାନ ପାଇଁ ୨୦୭ କୋଟିର ଅନୁଦାନ ଦିଆଯାଇଛି। ଯୋଜନା ଅନୁଯାୟୀ,୧୦୦ରୁ କମ୍ କର୍ମଚାରୀ କାମ କରୁଥିବା ଅନୁଷ୍ଠାନଗୁଡ଼ିକରେ ଯଦି ୯୦ପ୍ରତିଶତ କର୍ମଚାରୀ ମାସିକ ୧୫ହଜାର ଟଙ୍କାରୁ କମ୍ ଦରମା ପାଉଛନ୍ତି ତେବେ ଏଭଳି ଅନୁଷ୍ଠାନଗୁଡ଼ିକ ମାର୍ଚ୍ଚ,ଏପ୍ରିଲ ଏବଂ ମେ ମାସର ଭବିଷ୍ୟନିଧି ପାଇଁ ଯୋଗ୍ୟ ବିବେଚିତ ହେବେ। ଏହି ବାବଦକୁ ଉଭୟ କର୍ମଚାରୀ ଓ ନିଯୁକ୍ତି ଦାତାଙ୍କ ପାଇଁ ୨୪ପ୍ରତିଶତ ଦେୟ ଭାରତ ସରକାର ବହନ କରିବେ। ଆଗାମୀ ସମୟରେ ପ୍ରାୟ ୪ଲକ୍ଷରୁ ଊର୍ଦ୍ଧ୍ୱ ସଂସ୍ଥାର ୮୦ଲକ୍ଷ କର୍ମଚାରୀ ଏହି ଯୋଜନାରେ ଅନ୍ତର୍ଭୁକ୍ତ ହେବା ପାଇଁ ଯୋଗ୍ୟ ବିବେଚିତ ହୋଇଛନ୍ତି।
ଓଡିଶାରେ ଏହି ଯୋଜନାର ସଫଳ ରୂପାୟନ ପାଇଁ କର୍ମଚାରୀ ଭବିଷ୍ୟନିଧି ଶାଖାର ରାଜ୍ୟ ମୁଖ୍ୟ ପି. ବୀରଭଦ୍ର ସ୍ବାମୀ ନେତୃତ୍ୱ ନେଉଛନ୍ତି। ଓଡ଼ିଶାର ଭୁବନେଶ୍ୱର, ରାଉରକେଲା, ବ୍ରହ୍ମପୁର ଓ କେନ୍ଦୁଝର ଆଦି ଆଞ୍ଚଳିକ ଭବିଷ୍ୟନିଧି କାର୍ଯ୍ୟଳୟରେ ଏ ଯାଏ ପ୍ରାୟ ୩୫୦୦ ସଂସ୍ଥାର ୫୦ହଜାରରୁ ଊର୍ଦ୍ଧ୍ୱ କର୍ମଚାରୀ ୮କୋଟି ଟଙ୍କାର ଅନୁଦାନ ପାଇ ସାରିଛନ୍ତି। ଏହି ଯୋଜନା ପାଇଁ ଅନେକ ସଂସ୍ଥା ଯୋଗ୍ୟ ବିବେଚିତ ହୋଇଥିଲେ ବି ଏଯାଏ ଇସିଆର ଦାଖଲ କରି ନାହାନ୍ତି। ଲକ୍ଡାଉନ ଯୋଗୁ ମାର୍ଚ୍ଚ ମାସର ଭବିଷ୍ୟନିଧି ଦେୟ ମେ’ ୧୫ତାରିଖକୁ ଘୁଞ୍ଚାଇ ଦିଆଯାଇଛି। ତେଣୁ ଏହି ବର୍ଦ୍ଧିତ ସମୟ ମଧ୍ୟରେ ଅଧିକରୁ ଅଧିକ ସଂସ୍ଥାର କର୍ମଚାରୀ ଫାଇଦା ନେବା ପାଇଁ ଭୁବନେଶ୍ୱର କର୍ମଚାରୀ ଭବିଷ୍ୟନିଧି ସଂଗଠନର ସହକାରୀ ଆୟୁକ୍ତ ସଞ୍ଜୟ କୁମାର ରଥ ନିବେଦନ କରିଛନ୍ତି।
