ଭବାନୀପାଟଣା, ୬ା୧୨ (ଡି.ଏନ.ଏ.)-
କଳାହାଣ୍ଡି ଜିଲା ଧର୍ମଗଡ଼ ବ୍ଲକ ଜୟନ୍ତପୁର ପଁଚେତ୍ ବାରିକପଡ଼ାର ମା’ବାପ୍ ଛେଉଁଡ୍ ତୁଷାର ବାରିକ(୧୧)କୁଁ ସାହାଯ୍ର ହାତ୍ ବଢ଼େଇଛେ ଜିଲା ଶିଶୁ ମଙ୍ଗଲ ସମିତି। ବୁଧବାର ଜିଲା ଶିଶୁ ମଙ୍ଗଳ ସମିତି ଅଧ୍ୟକ୍ଷ ରାଜେଶ କୁମାର ନାୟକକଁର ନିରଦେଶରେ ଶିଶୁ ମଙ୍ଗଳ ବିଭାଗର ଅଧ୍କାରୀ ଆର କରମଚାରୀ ବାରିକପଡ଼ାରୁ ତୁଷାରକୁଁ ଉଧାର କରି ଶିଶୁ ମଙ୍ଗଳ କେନ୍ଦ୍ରକେ ଆନିଥିଲେ। ପରଶାସନ ତରଫୁ ସେଠାନେ ତାକର ରହିବାର, ଖାଏବାର, ପାଠ୍ପଢ଼ବାର ବେବସ୍ତା କରାଯିବା ବଲି ଜନାପଡ଼ିଛେ।
ସୂଚନା ଅନ୍ସାରେ ଜୟନ୍ତପୁର ପଁଚେତ୍ ବାରିକପଡ଼ାର ଲକ୍ଷ୍ମୀକାନ୍ତ ବାରିକ ଝନେ ନିହାତି ଗରିବ୍ ଲୋକ୍। ଗଲା ବଛର ତାକର ମାଏକିନା ବିମଳା ଆରପାରକେ ଚାଲିଯାଇଥିଲେ। ଏନ୍ତାଥି ଲକ୍ଷ୍ମୀକାନ୍ତ କୁଲିମଜୁରି କରି ନିଜର ଦୁଇ ଝି’ ସୁନିତା(୧୭), ବନିତା(୧୫) ଆର ପୁଓ ତୁଷାର(୧୧)କେ ପାଲପୋଷ କରୁଥିଲେ। ହେଲେ ଗଲା ଅକ୍ଟୋବର ମାସେ ଲକ୍ଷ୍ମୀକାନ୍ତ ବି ଆରପାରକେ ଚାଲିଯାଇଥିଲେ। ଏନ୍ତାଥି ତିନ୍ ମା’ବାପ୍ ଛେଉଁଡ୍ ଭାଇବହେନ୍ ବେସାହାରା ହେଇଯାଇଥିଲେ। ବାପ୍ ଚାଲିଗଲା ଉତାରୁ ବଡ଼ ଝି’ ସୁନିତାର ଉପରେ ଭାଇବହେନ୍ର ବୋଝ୍ ପଡ଼ିଥିଲା। ଇଆଡ଼େ ଟଁକା ପଏସା ଅଭାବୁ ସୁନିତା ବାପାର ଶୁଧିକାଯ୍ ବି କରି ନାଇଁପାରଲେ। ଇ ଘଟନା ଲୋକ୍ଲୋଚନକେ ଆଏଲା ଉତାରୁ ଜିଲା ଶିଶୁ ମଙ୍ଗଳ ସମିତି ଅଧ୍ୟକ୍ଷକଁର ନିର୍ଦେଶରେ ଜିଲା ଶିଶୁ ସୁରକ୍ଷା ୟୁନିଟର ଗୁଟେ ଦଲ ବାରିକପଡ଼ା ଯାଇ ମା’ବାପ୍ ଛେଉଁଡ୍ ତିନ୍ହିଁ ଭାଇବହେନ୍କେ ଭେଟିଥିଲେ। ଲକ୍ଷ୍ମୀକାନ୍ତକଁର ଦଶା କାଯ୍ ସଏଲା ଉତାରୁ ତୁଷାରକୁଁ ଶିଶୁ ମଙ୍ଗଳ ସମିତି ତରଫୁ ଥଇଥାନ କରାଯିବାର ସଂଗେ ଜିଲା ପରଶାସନ ତରଫୁ ଦୁଇ ବହେନ୍କୁ ବି ସବୁ ପରକାର ସୁବିଧା ଯୁଗେଇ ଦିଆଯିବା ବଲି ସମିତିର ଅଧ୍ୟକ୍ଷ ରାଜେଶ ନାୟକ କହିଛନ୍। ସେ ହିସାବେ ୪ ତାରିଖ ବୁଧୁବାର ଶିଶୁ ମଙ୍ଗଳ ବିଭାଗ ତରଫୁ ତୁଷାରକୁଁ ଉଧାର କଲାବେଲେ ଯାଦବ ମହାସଭା ବ୍ଲକ ସଭାପତି ଶଙ୍କର ଜୁଏଡ଼, ଲବଣୀ ରାଉତ, ପର୍ଲା ଆଂଚଲିକ ଯାଦବ ସମିତି ସଭାପତି ଚିତ୍ରସେନ ଗୋପାଲ, ସଂପାଦକ ଗଣେଶ ଗୋପାଲ, ରାଜକିଶୋର ଗୋପାଲ, ଯୁବଯାଦବ ବ୍ଲକ ସଂପାଦକ କାର୍ତ୍ତିକ ଛତ୍ରିଆ ପରମୁଖ ଠୋଲ ହେଇଥିଲେ।
