ଚଣ୍ଡିଖୋଲ,୨୪।୧(ଡି.ଏନ.ଏ)
ଓଡ଼ିଶା ପ୍ରସିଦ୍ଧ ଓଳାଶୁଣୀ ଗୁମ୍ଫା ମେଳା ଶୁକ୍ରବାର ୫ମ ଦିନରେ ପହଞ୍ଚିଛି। ଅପରାହ୍ନରେ ମେଳାରେ ପଡ଼ିଥିବା ତିନିକଡ଼ ରାସ୍ତାରେ ବ୍ୟାପକ ଜନଗହଳି ସହିତ ପାହାଡ଼ ପାଦଦେଶରୁ ଶୀର୍ଷଦେଶ ପର୍ଯ୍ୟନ୍ତ ଲକ୍ଷାଧିକ ଶ୍ରଦ୍ଧାଳୁଙ୍କ ଜନସମାଗମ ହୋଇଥିବା ଦେଖିବାକୁ ମିଳିଛି। ୫୩ନଂ ଜାତୀୟ ରାଜପଥର ଗୋବରୀ ନଦୀକୂଳ ଦେଇ ପାହାଡ଼ ପାଦ ଦେଶରେ ଥିବା ମା’ ଓଳାଶୁଣୀକୁ ଦର୍ଶନ କରି ପାହାଡ଼ ଶୀର୍ଷ ଦେଶରେ ଥିବା ମହାପୁରୁଷ ସନ୍ଥ ଅରକ୍ଷିତ ଦାସଙ୍କ ସମାଧି ମନ୍ଦିର ଦର୍ଶନ ପାଇଁ ଯାତ୍ରୀମାନେ ଆସୁଥିବାବେଳେ ଅନ୍ୟପଟରେ ୫୩ନଂ ଜାତୀୟ ରାଜପଥରୁ ବନ୍ଦରେଶ୍ୱର ଦେଇ ପାହାଡ଼ ପାଦଦେଶରେ ଥିବା ମେଳା ପଡ଼ିଆକୁ ଯାତ୍ରୀଙ୍କ ସୁଅ ଛୁଟିଥିଲା। ସେହିଭଳି ବୌଦ୍ଧପୀଠ ଲଳିତଗିରି ପଟରୁ ରାସ୍ତାରେ ଭିଡ଼ ପରିଲକ୍ଷିତ ହୋଇଥିଲା। ଶୁକ୍ରବାର ବହୁସଂଖ୍ୟାରେ ଭକ୍ତମାନେ ମହାପୁରୁଷ ସନ୍ଥ ଅରକ୍ଷିତ ଦାସଙ୍କ ସମାଧି ମନ୍ଦିରରେ ଆରିସା ପିଠା ଓ ଖିର ଗଇଁଠା ମାନସିକ ଭୋଗ ଘରୁ ପ୍ରସ୍ତୁତ କରି ଆଣି ଭୋଗ କରିଥିଲେ। ଏହି ପୀଠକୁ ଯାଜପୁର, କେନ୍ଦ୍ରପଡ଼ା, କଟକ ଓ ଜଗତସିଂହ ପୁର ଜିଲାରୁ ବହୁ ସଂଖ୍ୟାରେ ଶ୍ରଦ୍ଧାଳୁମାନେ ଆସୁଛନ୍ତି। ତେବେ ମାନସିକ ପୋଡ଼ପିଠା ଧରି କେନ୍ଦ୍ରାପଡ଼ା ଜିଲାର ମାର୍ଶାଘାଇ, ପାଟକୁରା, ଗରଦପୁର, ଓ ପଟ୍ଟାମୁଣ୍ଡାଇ ଅଞ୍ଚଳର ବହୁ ଭକ୍ତ ଆସି ଲମ୍ବା ଧାଡ଼ିରେ ଠିଆହୋଇ ମହାପୁରୁଷଙ୍କ ସମାଧି ମନ୍ଦିରରେ ଭୋଗ ଲାଗି କରୁଥିବା ଦେଖାଯାଇଥିଲା। ଓଲାଶୁଣୀ ପାହାଡ଼ ପାଦଦେଶରେ ପଡ଼ିଥିବା ମେଳା ପଡ଼ିଆରେ ମଧ୍ୟ ପ୍ରବଳ ଜନଗହଳି ହୋଇଥିଲା। ଅଧିକାଂଶ ମହିଳା ଘରକରଣା ସାମଗ୍ରୀ ମେଳା ପଡ଼ିଆରୁ କିଣୁଥିବା ଦେଖିବାକୁ ମିଳିଥିଲା। ମେଳା ପଡ଼ିଆରେ ପଡ଼ିଥିବା ହସ୍ତଶିଳ୍ପ ସାମଗ୍ରୀ ର ଚାହିଦା ଅଧିକ ଜଣାଯାଇଛି। ସେହିଭଳି ବିଭିନ୍ନ କମ୍ପାନୀର ଷ୍ଟଲ ମଧ୍ୟ ମେଳା ପରିସରରେ ଖୋଲାଯାଇଛି। ଏହି ମେଳାଟି ବଡ଼ଚଣା ବ୍ଲକ ଅନ୍ତର୍ଗତ ପଲାଇ ମୌଜାରେ ରହିଥିବା ଓଳାଶୁଣୀ ପାହାଡ଼ ପାଦଦେଶରୁ ଶୀର୍ଷ ଦେଶ ପର୍ଯ୍ୟନ୍ତ ଅନୁଷ୍ଠିତ ହେଉଥିତ୍ବାବେଳେ ଏଠାରେ ବଡ଼ଚଣା ଓ ମାହାଙ୍ଗା ଅଞ୍ଚଳର ବିଭିନ୍ନ ରାଜନୈତିକ ଦଳର ବ୍ୟାନର ଭର୍ତ୍ତି ହୋଇଥିବା ଦେଖିବାକୁ ମିଳିଛି। ସବୁ ଅଞ୍ଚଳର ଏବଂ ଦଳର କାର୍ଯ୍ୟାଳୟ ମେଳା ପରିସରରେ ଖୋଲାଯାଇଛି। ହେଲେ ଏକାଦଶୀ ତିଥି ପରେ ଅନ୍ୟ କୌଣସି ଦିନ ଏହି କାର୍ଯ୍ୟାଳୟରେ କେହି ଉପସ୍ଥିତ ରହୁ ନ ଥିବା ଦେଖାଯାଇଛି।
