ଭୁବନେଶ୍ୱର,୬।୧୨(ବ୍ୟୁରୋ):ଲକ୍ଷ୍ମୀପୁରାଣର ବାର୍ତ୍ତାକୁ ବିଶ୍ୱସ୍ତରରେ ପହଞ୍ଚାଇବା ଏବଂ ଯୁବପିଢ଼ି ତଥା ସହରବାସୀଙ୍କ ମଧ୍ୟରେ ମାଣବସା ଗୁରୁବାରର ଲୋକପ୍ରିୟତା ବୃଦ୍ଧି କରିବା ଉଦ୍ଦେଶ୍ୟରେ ‘ଶ୍ରୀ ଉତ୍ସବ’ ଅନୁଷ୍ଠାନ ପକ୍ଷରୁ ସାର୍ବଜନୀନ ମହାଲକ୍ଷ୍ମୀ ପୂଜା ଅନୁଷ୍ଠିତ ହୋଇଯାଇଛି। ଗୁରୁବାର ଶହୀଦନଗର ଦୁର୍ଗାପୂଜା ମଣ୍ଡପଠାରେ ଆୟୋଜିତ ଏହି ନିଆରା କାର୍ଯ୍ୟକ୍ରମରେ ୧୦୦ରୁ ଊର୍ଦ୍ଧ୍ୱ ମହିଳା ଏକାଠି ବସି ମା’ଙ୍କ ପୂଜାର୍ଚ୍ଚନା ଓ ଆରାଧନା କରିବା ସହ ସମୂହଭାବେ ଲକ୍ଷ୍ମୀପୁରାଣ ପାଠ କରିଥିଲେ। ପରମ୍ପରା ଅନୁଯାୟୀ ଧଳା ଉପରେ ନାଲିଛିଟ ପକା ଶାଢ଼ୀ ପିନ୍ଧି ମୁଣ୍ଡରେ ଓଢ଼ଣା ଦେଇ ମହିଳାମାନେ ସମୂହଭାବେ ମାଣ ବସାଇଥିଲେ। ପିଠାମିଠା, ଫୁଲଫଳ ଦେଇ ପରିବାର, ରାଜ୍ୟ ଓ ଦେଶକୁ ସୁଖ ସମୃଦ୍ଧିରେ ଭରିଦେବାକୁ ମା’ଙ୍କ ନିକଟରେ ପ୍ରାର୍ଥନା କରିଥିଲେ। ସାର୍ବଜନୀନ ଭାବେ ଲକ୍ଷ୍ମୀପୂଜା କରିବା ପାଇଁ ଓଡ଼ିଶାରେ ୫ମ ଥର ପାଇଁ ‘ଶ୍ରୀ ଉତ୍ସବ’ ଆୟୋଜିତ ହୋଇଥିଲା। ପରିଷ୍କାର ପରିଚ୍ଛନ୍ନ, ମହିଳାମାନଙ୍କୁ ସମ୍ମାନ ଓ ଝୋଟି ଚିତା ମାଧ୍ୟମରେ ସେମାନଙ୍କ ଦକ୍ଷତା ପ୍ରଦର୍ଶନ କାର୍ଯ୍ୟକ୍ରମର ମୁଖ୍ୟ ଉଦ୍ଦେଶ୍ୟ ବୋଲି ‘ଶ୍ରୀ ଉତ୍ସବ’ କମିଟି ଅଧ୍ୟକ୍ଷ ଡ. ରିନା ରାଉତରାୟ ଓ ମୁଖ୍ୟ ଆବାହକ ପିନାକୀ ମହାନ୍ତି କହିଥିଲେ। ଉତ୍ସବର ମୁଖ୍ୟ ଉପଦେଷ୍ଟା ନିଶିକାନ୍ତ ମିଶ୍ର ଓ ଜଗଦାନନ୍ଦଙ୍କ ପ୍ରତ୍ୟକ୍ଷ ତତ୍ତ୍ୱାବଧାନରେ ୨୦୧୪ରୁ ଏହି କାର୍ଯ୍ୟକ୍ରମ ଆୟୋଜିତ ହୋଇଆସୁଛି। ଡିସେମ୍ବର ୧୯ ତାରିଖରେ ଶ୍ରୀଉତ୍ସବର ଉଦ୍ଯାପନୀ ସମାରୋହ ଅନୁଷ୍ଠିତ ହେବ।
