ଲଣ୍ଡନ,୧୧।୩- ଆର୍ସେନଲ ଓ ମାଞ୍ଚେଷ୍ଟର ସିଟି ମ୍ୟାଚ୍କୁ ବୁଧବାର ବାତିଲ କରିଦିଆଯାଇଛି। ଲଣ୍ଡନ କ୍ଲବର ଖେଳାଳିଙ୍କୁ କ୍ୱାରାଣ୍ଟାଇନରେ ରଖାଯିବାରୁ ପ୍ରିମିୟର ଲିଗ୍ର ପ୍ରଥମ ମ୍ୟାଚ୍ ବାତିଲ ହୋଇଛି। ଆର୍ସେନଲ ପକ୍ଷରୁ କୁହାଯାଇଛି, ଖେଳାଳିଙ୍କୁ ୧୪ ଦିନ ପାଇଁ ଅଲଗା ରଖାଯିବ। ସେମାନେ ଗ୍ରୀକ କ୍ଲବ ଅଲିମ୍ପିଆକ୍ସ ମାଲିକଙ୍କ ସହ ସମ୍ପର୍କରେ ଆସିଥିଲେ। ତାଙ୍କ ମାଲିକ କୋଭିଡ୍ ୧୯ରେ ଆକ୍ରାନ୍ତ ଅଛନ୍ତି। ଆମେ ସରକାରଙ୍କ ନିୟମର ପାଳନ କରୁଛୁ। ଯଦି କେହି ଭାଇରସରେ ଆକ୍ରାନ୍ତଙ୍କ ସମ୍ପର୍କରେ ଆସୁଛନ୍ତି ସେମାନଙ୍କୁ ଘରେ ୧୪ ଦିନ ପାଇଁ ଅଲଗା ରଖାଯିବ। ଫଳରେ ଖେଳାଳିମାନେ ମାଞ୍ଚେଷ୍ଟର ସିଟି୍ ବିପକ୍ଷ ମ୍ୟାଚ୍ ପାଇଁ ଉପଲବ୍ଧ ହେବେ ନାହିଁ। ଏଣୁ ମ୍ୟାଚ୍କୁ ବାତିଲ କରିବାକୁ ନିଷ୍ପତ୍ତି ନିଆଯାଇଛି ବୋଲି ଆର୍ସେନଲ ପକ୍ଷରୁ ଏକ ବିବୃତିରେ କୁହାଯାଇଛି। ଚଳିତ ସିଜନରେ କରୋନା ଭାଇରସ ଯୋଗୁ ପ୍ରଥମ ଥର ପାଇଁ କୌଣସି ପ୍ରିମିୟର ଲିଗ୍ ମ୍ୟାଚ୍ ବାତିଲ ହୋଇଛି। କରୋନା ଭାଇରସ ଆତଙ୍କ ଯୋଗୁ ୟୁଫା ଚାମ୍ପିୟନ୍ସ ଲିଗ୍ ଓ ୟୁରୋପା ଲିଗ୍ ମ୍ୟାଚ୍ ଖାଲି ଷ୍ଟାଡିୟମରେ ଖେଳାଯିବାକୁ ନିର୍ଦ୍ଦେଶ ଦିଆଯାଇଛି। ଶୀର୍ଷ ସ୍ତରୀୟ ଫୁଟବଲ ଲିଗ୍ ସିରି ଏ’କୁ ଏପ୍ରିଲ ୩ ତାରିଖ ପର୍ଯ୍ୟନ୍ତ ବାତିଲ କରାଯାଇଛି।
