କୋରାପୁଟ,୨୮।୭(ସ୍ବ.ପ୍ର.): ଅବିଭକ୍ତ କୋରାପୁଟ ଜିଲାରେ ମାଓବାଦୀଙ୍କ ପକ୍ଷରୁ ଶହୀଦ ସପ୍ତାହ ଆରମ୍ଭ ହୋଇଥିବାବେଳେ କୋରାପୁଟରେ ଆଂଶିକ ପ୍ରଭାବ ଦେଖାଯାଇଛି। ବିଶେଷକରି ଜିଲାର ପଟ୍ଟାଙ୍ଗି ବ୍ଲକର ଆବଲି, ଏ.ଗୋଲୁର, ତଳ ଗୋଲୁର, ନନ୍ଦପୁର ବ୍ଲକର ପାଡ୍ରୁଆ, ଅତଣ୍ଡା ଅଞ୍ଚଳ, ଲମତାପୁଟ ବ୍ଲକର ଅନକାଡେଲି, ଜଲାପୁଟ, ମାଛକୁଣ୍ଡ, ବୈପାରୀଗୁଡ଼ା ବ୍ଲକର କିଛି ଅଞ୍ଚଳରେ ଗାଡ଼ି ଚଳାଚଳ ବନ୍ଦ ରହିଥିବାବେଳେ ଦୋକାନ ବଜାର ସ୍ବାଭାବିକ ଭାବେ ଖୋଲାଯାଇଥିବା ଦେଖିବାକୁ ମିଳିଛି। ଗତ କିଛି ମାସ ତଳେ କୋରାପୁଟ ପୋଲିସ ଦ୍ୱାରା ପାଡ୍ରୁ୍ରଆ ଥାନା ଅନ୍ତର୍ଗତ କିତୁବା ଜଙ୍ଗଲରେ ୫ ମାଓବାଦୀଙ୍କୁ ଏନ୍କାଉଣ୍ଟର କରି ମାରିବା ଓ ଶନିବାର ଛତିଶଗଡ଼ ରାଜ୍ୟର ବସ୍ତର ଜିଲାର ପିରିୟମ କୋଟ ଜଙ୍ଗଲରେ ସିଆର୍ପିଏଫ୍ ପକ୍ଷରୁ ଏନ୍କାଉଣ୍ଟରରେ ୭ ମାଓବାଦୀଙ୍କ ମୃତ୍ୟୁ ଘଟିଥିବା ଯୋଗୁ ମାଓବାଦୀ ଶିବିରରେ ଏବେ ପୋଲିସ ଓ ଯବାନକୁ ଟାର୍ଗେଟ କରି କୌଣସି ବଡ଼ଧରଣର ଅଘଟଣ କରିବା ନେଇ ସମ୍ଭାବନା ରହିଛି। ଏନେଇ ପୋଲିସ ଓ ଯବାନମାନଙ୍କ ପକ୍ଷରୁ ଜିଲାର ଆନ୍ଧ୍ର ଓ ଛତିଶଗଡ ସୀମାବର୍ତ୍ତୀ ଅଞ୍ଚଳରେ ସୁରକ୍ଷା ବ୍ୟବସ୍ଥା କଡ଼ାକଡ଼ି କରାଯାଇଥିବାବେଳେ କୋମ୍ବିଂ ଅପରେଶନକୁ ଜୋର୍ଦାର କରାଯାଇଛି। ଜୁଲାଇ୨୮ରୁ ଅଗଷ୍ଟ ୩ ତାରିଖ ଯାଏ ମାଓବାଦୀମାନେ ଶହୀଦ ସପ୍ତାହ ପାଳନ କରୁଥିବାରୁ ଜିଲାର ମାଓବାଦୀ ପ୍ରବଣ ସମସ୍ତ ଥାନା ଅଞ୍ଚଳରେ ହାଇଆର୍ଲଟ ଜାରି ସହ ସୁରକ୍ଷା ବ୍ୟବସ୍ଥାକୁ କଡ଼ାକଡ଼ି କରାଯାଇଛି। ସଂପୃକ୍ତ ଅଞ୍ଚଳରେ ବିଏସ୍ଏଫ୍, ଏସ୍ଓଓଜି, ଡିଭିଏଫ, କୋବ୍ରା ବାହିନୀ ପକ୍ଷରୁ କୋମ୍ବିଂକୁ ଜୋରଦାର କରାଯାଇଥିବା ଜିଲା ଆରକ୍ଷୀ ଅଧୀକ୍ଷକ କନୱର ବିଶାଳ ସିଂ ପ୍ରକାଶ କରିଛନ୍ତି। ଜୟପୁର ପରିବହନ ଡିଭିଜନର ୧୭ଟି ରୁଟ୍ରେ ସମସ୍ତ ସରକାରୀ ବସକୁ ବନ୍ଦ କରାଯାଇଛି। ସେହିପରି ଲମତାପୁଟ, ରାମଗିରି, ବନ୍ଧୁଗାଁ, ନାରାୟଣପାଟଣା ଆଦି ସ୍ଥାନକୁ କେତେକ ବେସରକାରୀ ବସ ବନ୍ଦ ରହିଛି। ଫଳରେ ବହୁ ଯାତ୍ରୀ କୋରାପୁଟ ବସଷ୍ଟାଣ୍ଡରେ ବସକୁ ଅପେକ୍ଷା କରି ରହିଥିବାର ଦେଖାଯାଇଛି।
