ଭବାନୀପାଟଣା, ୧୮।୩ (ଡି.ଏନ୍.ଏ.)-
ଏହେଦ୍କା ମହୁଲ ଫୁଲ ଗୁଟାବାର ସମିଆ। ଫିଦିନ ପହଁଟିଆରୁ ଜଂଗଲ ଅଂଚଲରେ ଥିବାର ଗଁ।ଗଁଡ଼ାର ଲୋକ୍ମାନେ ମହୁଲ ଫୁଲ ଗୁଟେଇ ଯାଉଛନ୍। ସେନ୍ତା ଇ ମହୁଲ ଫୁଲ ଗୁଟେଇ ଆଦିବାସୀ ସମାଜର ଲୋକ୍ ବନେ ଦୁଇ ପଏସା ରୁଜଗାର କରସନ୍। ଯେନ୍ଟା କି ତାକର ୩ରୁ ୪ ମାସର ଘର ଖରଚା ବାହାରି ପଡ଼ସି। ହେଲେ ଅନେକ୍ ସମିଆରେ ଅଭାବି ବିକ୍ରି ଲାଗି ଆଦିବାସୀମାନେ ଶୋଷନ୍ର ଶିକାର ହେଉଥିବାର ଅଭିଯୋଗ ହେଉଛେ।
ସୂଚନା ଅନ୍ସାରେ କଳାହାଣ୍ଡି ଜିଲା ହେଉଛେ ପାହାଡ଼ ପରବତ୍, ଝାର ଜଂଗଲ ଘେରା ଗୁଟେ ଆଦିବାସୀ ବହୁଲ ଜିଲା। ଆଏଜ୍ ବି ଜିଲାର ଅନେକ ଆଦିବାସୀ ପରିବାର ଜଂଗଲଜାତ ଦରବ୍ ଉପରେ ନିରଭର କରି ନିଜର ଜୀବନ୍ ଜିବ୍କାର ଡଂଗା ବାହି ନେଉଛନ୍। ଜିଲାର ଭିନେ ଭିନେ ଜଂଗଲ, ଲୁକ୍କର ଖେତଖଲାରେ ବହୁତ୍ ମହୁଲ ଗଛ୍ ରହିଛେ। ଫଗୁନ୍ ପୁନି ସରତେ ସରତେ ଲୋକ୍ ମହୁଲ ଫୁଲ ଗୁଟାବାର ଆରମ୍ କରସନ। ଇ ସମିଆରେ ଆଦିବାସୀ ପରିବାରର ଛୁଆପୁତାନୁ ବୁଢ଼ାତକ୍ ମହୁଲ ଗୁଟାବାରେ ବାଇ ରହେସନ୍। ହେଲେ ଅନେକ୍ ସମିଆରେ ଇମାନେ ମହୁଲ ଫୁଲର ଅଭାବି ବିକ୍ରି ଲାଗି ଶୋଷନ୍ର ଶିକାର ହେଉଛନ୍। ଇଥିରଲାଗି ସେମାନେ ସରକାରକଁର ନୀତି ନିୟମକେ ଦାଇ କରିଛନ୍। ସେନ୍ତା ରାଏଜ୍ ସରକାର ଅବକାରୀ ନୀତିରେ ସଂଶୋଧନ କରି ମହୁଲରୁ ଭିନେ ଭିନେ ଦରବ୍ ତିଆର କରବାର ଯୋଜନା କଲେ ମଦ୍ଠାନୁ ଅଧ୍କା ରାଜସ୍ବ ମିଲତା ବଲି ଅନେକ ବୁଧିଜୀବୀ ମତ୍ ଦେଇଛନ୍। ପଶ୍ଚିମ ଓଡ଼ିଶାରେ କେଁଦୁ ପତର ଉତାରୁ ମହୁଲ ଫୁଲ ହେଉଛେ ଆଦିବାସୀ, ଗରିବ୍ ଦୁଖିକର ଗୁଟେ ମୁଖିଆ ରୁଜଗାରର। ଇ ପଏସାରେ ସେମାନେ ବଛରକ ୩ରୁ ୪ ମାସ ନିଜର କୁଟୁମ ପୁଷୁଛନ୍। ହେଲେ ଆଏଜ୍ ବି ଅଭାବି ବିକ୍ରିଟା ଇଥ୍ର ମୁଖିଆ ସମସିଆ ହେଇ ରହିଛେ। କାଣିଗୁମା ଅଂଚଲର ସମାଜିକ କରମୀ ଦିଲୀପ ଦାସ କହିଛନ୍ ଯେ ଗଲା ବଛର ଅନେକ ଲୋକ୍ ମହୁଲ ଫୁଲ କିଲୋ ୧୫ ଟଁକାରେ ବିକିଛନ୍। ହେଲେ ବେପାରୀମାନେ ସେଟାକେ ଛତିଶଗଡ଼, ଝାଡ଼ଖଣ୍ଡ ରାଏଜର ମଦ୍ ବେପାରୀକୁ ୧୮ରୁ ୨୦ ଟଁକାରେ ବିକ୍ରି କିଛନ୍ ବଲି ସେ କହିଛନ୍। ସେନ୍ତା ଗୁଟେ ଉଷୋ କମ୍ପାନୀରେ କାଯ୍ କରୁଥିବାର ବିଶ୍ୱନାଥ ହୋତା ମହୁଲ ଫୁଲ ଉପରେ ଗବେଷନା କରି କହିଛନ୍ ଯେ, ମହୁଲ ଫୁଲରୁ କିସ୍ମିସ୍ ଲେଖେଁ ଦରବ୍ ତିଆର କରି ହେବା। ଯେନ୍ଟା ବଜାରରେ ବି ଚାହିଦା ରହିବା। ହେଲେ ଇଥ୍ର ବାସ୍ନା ଆର ଆଲ୍କହଲକେ ବାଦ୍ ଦେବାକେ ପଡ଼ବା। ରାଏଜ୍ ସରକାର ମଦ୍ ଜାଗାରେ ମହୁଲରୁ ନୂତନ୍ ଦରବ୍ ତିଆର ଦିଗେ ଧିଆନ୍ ଦେବାର କଥା। ଇଥ୍ରୁ ମଦ୍ନୁ ଅଧ୍କା ରାଜସ୍ବ ମିଲବା। ଗଁାଗଁଲିରେ ଲୋକ୍ ବି ମହୁଲ ଫୁଲ କେ.ଜି. ପିଛା ଅତି କମ୍ରେ ୧ଶହ ଟଁକା ପାଇପାରବେ ବଲି ସେ ମତ୍ ଦେଇଛନ୍।
