ଲଣ୍ଡନ,୧୦।୬(ପି.ଟି.): ଚଳିତ ବର୍ଷ ଶେଷ ଆଡକୁ ଏକ ମହିଳା ତ୍ରିରାଷ୍ଟ୍ରୀୟ ସିରିଜ ଆୟୋଜନ କରିବାକୁ ଭାରତ ଓ ଦକ୍ଷିଣ ଆଫ୍ରିକା କ୍ରିକେଟ ବୋର୍ଡ ସହ ଆଲୋଚନା ଚାଲିଛି ବୋଲି ଇଂଲଣ୍ଡ ଓ ଓ୍ବେଲ୍ସ କ୍ରିକେଟ (ଇସିବି) ତରଫରୁ କୁହାଯାଇଛି। ଇଂଲଣ୍ଡ ବିପକ୍ଷରେ ଭାରତ ଏକ ଦ୍ୱିପାକ୍ଷିକ ସିରିଜ ଖେଳିବାର କାର୍ଯ୍ୟକ୍ରମ ଥିଲା। ଏଥିରେ ୩ଟି ଦିନିକିଆ ଓ ୩ଟି ଟି୨୦ ମ୍ୟାଚ୍ ଖେଳାଯିବାର କାର୍ଯ୍ୟକ୍ରମ ରହିଥିଲା। ତେବେ ଏହି ସିରିଜକୁ ବର୍ତ୍ତମାନ ସ୍ଥଗିତ ରଖାଯାଇଛି।
କୋଭିଡ-୧୯ ମହାମାରୀ ପୂର୍ବରୁ ଅଷ୍ଟ୍ରେଲିଆରେ ମହିଳା ଟି୨୦ ବିଶ୍ୱକପ୍ ବେଶ୍ ସଫଳତାର ସହ ଆୟୋଜନ ହେବା ସୌଭାଗ୍ୟର କଥା ଥିଲା। ଏହି ମହାମାରୀ ସତ୍ତ୍ୱେ ଚଳିତ ବର୍ଷ କିଛି ପରିମାଣରେ ମହିଳା କ୍ରିକେଟ ମଧ୍ୟ ଆୟୋଜନ ହେବାର ଆବଶ୍ୟକତା ରହିଛି ବୋଲି ଇସିବି ମୁଖ୍ୟ କାର୍ଯ୍ୟନିର୍ବାହୀ ଟମ୍ ହାରିସନ କହିଛନ୍ତି। ଏକ ତ୍ରିରାଷ୍ଟ୍ରୀୟ ସିରିଜ ଆୟୋଜନ ନେଇ ଆମେ ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ) ଓ କ୍ରିକେଟ ସାଉଥ୍ ଆଫ୍ରିକା (ସିଏସ୍ଏ) ସହ ଆଲୋଚନା କରୁଛୁ। ଆଗାମୀ ସେପ୍ଟେମ୍ବରରେ ମହିଳା କ୍ରିକେଟ ଆୟୋଜନ ନେଇ ଆମେ ଯୋଜନା କରୁଛୁ। ତେବେ ତ୍ରିରାଷ୍ଟ୍ରୀୟ ସିରିଜ ଆୟୋଜନ କୋଭିଡ-୧୯ ସ୍ଥିତି ଉପରେ ନିର୍ଭର କରିବ। ଭାରତ କିଭଳି ଏହି ମହାମାରୀର ମୁକାବିଲ କରିବ ତାହା ଉପରେ ସବୁକିଛି ନିର୍ଭର କରିବ ବୋଲି ସେ କହିଛନ୍ତି। ୟୁନାଇଟେଡ କିଙ୍ଗଡମ୍ରେ ଏପର୍ଯ୍ୟନ୍ତ ୨,୮୫,୦୦୦ ଜଣ ଏହି ଭାଇରସ୍ ଦ୍ୱାରା ସଂକ୍ରମିତ ହୋଇଛନ୍ତି ଓ ୪୦,୦୦୦ ପ୍ରାଣ ହରାଇଛନ୍ତି। ଖୁବ୍ଶୀଘ୍ର ଆମେ ସ୍ଥିତିକୁ ନିୟନ୍ତ୍ରଣ କରିବୁ, ଯାହାଫଳରେ ଆମେ ଏହି ପ୍ରସ୍ତାବିତ ସିରିଜ ଅୟୋଜନ କରିବାରେ ସକ୍ଷମ ହେବୁ। ଭାରତରେ ଏପର୍ଯ୍ୟନ୍ତ ୨.୭ ଲକ୍ଷ ଲୋକ ସଂକ୍ରମିତ ହୋଇଛନ୍ତି ଓ ୭,୭୦୦ ଲୋକ ମୃତ୍ୟୁବରଣ କରିଛନ୍ତି।
