ଢେଙ୍କାନାଳ ଅଫିସ, ୨୫।୪- ଢେଙ୍କାନାଳ ଲୋକ ସଭା କ୍ଷେତ୍ରରେ ମଙ୍ଗଳବାର ଶାନ୍ତିଶୃଙ୍ଖଳାର ସହ ଭୋଟଗ୍ରହଣ ଶେଷହୋଇଛି। ବିଳମ୍ବିତ ରାତି ସୁଦ୍ଧା ସମସ୍ତ ପୋଲିଂ ପାର୍ଟି ଇଭିଏମ୍ ଏବଂ ଭିଭିପିଏଟି ମେଶିନ ସହ ସୁରକ୍ଷିତ ଭାବେ ଗନ୍ତବ୍ୟ ସ୍ଥଳରୁ ଫେରିଛନ୍ତି। ଢେଙ୍କାନାଳ ସଂସଦୀୟ କ୍ଷେତ୍ରରେ ମତଦାନ ଉତ୍ସାହଜନକ ରହିଛି। ମତଦାନ ହାରରେ ପୁରୁଷଙ୍କୁ ପଛରେ ଛାଡ଼ିଦେଇଛନ୍ତି ମହିଳା। ପାଲଲହଡ଼ାରେ ସର୍ବାଧିକ ୮୦.୮୧% ଏବଂ ତାଳଚେରରେ ସର୍ବନିମ୍ନ ୭୨.୫୦% ଭୋଟ ରେକର୍ଡ କରାଯାଇଛି। ଢେଙ୍କାନାଳ ଲୋକ ସଭା କ୍ଷେତ୍ରରେ ୭୪.୯୮% ଭୋଟିଂ ହୋଇଛି। ତନ୍ମଧ୍ୟରେ ମହିଳାଙ୍କ ୭୫.୭୭% ଏବଂ ପୁରୁଷଙ୍କ ମତଦାନ ହାର ୭୪.୨୭% ରହିଛି। ସେହିପରି ଅନ୍ୟାନ୍ୟ ୦.୮୭% ରହିଛନ୍ତି। ମୋଟ ୧୫ଲକ୍ଷ ୧ହଜାର ୩ଜଣ ଭୋଟର (୭,୮୩,୧୫୨ ପୁରୁଷ, ୭,୧୭,୭୩୬ ମହିଳା ଏବଂ ୧୧୫ ଅନ୍ୟାନ୍ୟ)ଙ୍କ ମଧ୍ୟରୁ ୧୧ଲକ୍ଷ ୨୫ହଜାର ୪୨୭ଜଣ ମତଦାନ କରିଛନ୍ତି। ସେଥିରେ ୫ଲକ୍ଷ ୮୧ହଜାର ୬୨୫ଜଣ ପୁରୁଷ ଏବଂ ୫ଲକ୍ଷ ୪୩ହଜାର ୮୦୧ ମହିଳା ଏବଂ ଜଣେ ଅନ୍ୟାନ୍ୟ ବର୍ଗ ଭୋଟର ଥିବା ଜିଲା ନିର୍ବାଚନ ଅଧିକାରୀଙ୍କ ସୂତ୍ରରୁ ଜଣାପଡ଼ିଛି।
ସେହିପରି ଢେଙ୍କାନାଳ ବିଧାନସଭା କ୍ଷେତ୍ର (୫୫)ରେ ୨ଲକ୍ଷ ୫୩ହଜାର ୯୮୭ ଭୋଟରଙ୍କ ମଧ୍ୟରୁ ୧ଲକ୍ଷ ୮୯ହଜାର ୧୬୪ଜଣ ମତଦାନ କରିଛନ୍ତି। ସେମାନଙ୍କ ମଧ୍ୟରେ ୯୭ହଜାର ୯୪୭ ପୁରୁଷ ଏବଂ ୯୧ ହଜାର ୨୧୬ ମହିଳା ଅଛନ୍ତି। ଏଠାରେ ୭୪.୪୮% ମତଦାନ ହୋଇଛି। ହିନ୍ଦୋଳ (୫୬-ସଂରକ୍ଷିତ) ନିର୍ବାଚନମଣ୍ଡଳୀରେ ୭୨.୬୨% ମତଦାନ ହୋଇଛି। ମୋଟ ୨ଲକ୍ଷ ୫୩ ହଜାର ୪୦୨ ମତଦାତାଙ୍କ ମଧ୍ୟରୁ ୧ଲକ୍ଷ ୮୪ହଜାର ୦୧୯ ଜଣ ମତଦାନ ସାବ୍ୟସ୍ତ କରିଥିଲେ। ସେଥିରୁ ୯୩ହଜାର ୯୪୨ ପୁରୁଷ ଏବଂ ୯୦ହଜାର ୭୭ ମହିଳା। କାମାକ୍ଷାନଗର (୫୭) ଏବଂ ପରଜଙ୍ଗ (୫୮) ନିର୍ବାଚନମଣ୍ଡଳୀରେ ମଧ୍ୟ ମତଦାନ ଆଶାଜନକ ରହିଛି। ବୁଧବାର ଭୋର ୪ଟା ସୁଦ୍ଧା ସମସ୍ତ ପୋଲିଂ କର୍ମଚାରୀ ନିରାପଦ ଭାବେ ମୁଖ୍ୟାଳୟରେ ପହଞ୍ଚତ୍ ଷ୍ଟ୍ରଙ୍ଗରୁମ୍ରେ ଇଭିଏମ୍ ହସ୍ତାନ୍ତର କରିଛନ୍ତି। କାମାକ୍ଷାନଗର ନିର୍ବାଚନମଣ୍ଡଳୀରେ ୭୪.୨୪% ମତଦାନ ହୋଇଛି। ସମୁଦାୟ ୨ଲକ୍ଷ ୧୪ହଜାର ୦୯୧ଜଣ ଭୋଟରଙ୍କ ମଧ୍ୟରୁ ୧ଲକ୍ଷ ୫୮ହଜାର ୯୫୧ ଜଣ ମତଦାନ କରିଛନ୍ତି। ସେମାନଙ୍କ ମଧ୍ୟରୁ ୮୨ହଜାର ୩୪୦ ପୁରୁଷ ଏବଂ ୭୬ହଜାର ୬୧୧ ମହିଳା ଅଛନ୍ତି।
ପରଜଙ୍ଗ ବିଧାନସଭା କ୍ଷେତ୍ରରେ ୭୮.୨୨% ମତଦାନ ହୋଇଛି। ଏଠାରେ ୨ଲକ୍ଷ୧୩ ହଜାର ୩୭୭ ଭୋଟରଙ୍କ ମଧ୍ୟରୁ ୧ଲକ୍ଷ ୬୬ହଜାର ୯୧୩ଜଣ ମତଦାନ ସାବ୍ୟସ୍ତ କରିଛନ୍ତି। ସେମାନଙ୍କ ମଧ୍ୟରେ ୮୪ହଜାର ୭୦୮ ପୁରୁଷ ଏବଂ ୮୨ହଜାର ୨୦୫ ମହିଳା ଭୋଟର ରହିଥିବା ଜିଲା ନିର୍ବାଚନ କାର୍ଯ୍ୟାଳୟ ପକ୍ଷରୁ ସୂଚନା ମିଳିଛି।
