ଖୋର୍ଦ୍ଧା ଅଫିସ,୨୪ା୫: ପବିତ୍ର ଅକ୍ଷୟ ତୃତୀୟାରେ ଶ୍ରୀମନ୍ଦିର ପରିସରରେ ବିଧି ମୁତାବକ ରଥକାମ ଅନୁକୂଳ ହୋଇଥିଲା। ୧୧ଦିନ ବିଳମ୍ବରେ ହେଲେ ମଧ୍ୟ ରଥକାମ ଆଗେଇ ଚାଲିଛି। ଆଗକୁ ସ୍ନାନ ପୂର୍ଣ୍ଣିମା ଏବଂ ଅଣସର। ଏଥିଲାଗି ଶ୍ରୀମନ୍ଦିର ପ୍ରଶାସନର ପ୍ରସ୍ତୁତି ଚାଲିଛି। ମହାପ୍ରଭୁଙ୍କ ଅଣସର ଏବଂ ପହଣ୍ଡି ଗାମୁଛା ପ୍ରସ୍ତୁତିରେ ଲାଗି ପଡିଛନ୍ତି ଖୋର୍ଦ୍ଧା ଜିଲା ବୋଲଗଡ ବ୍ଲକ ସାନପଦର ଗ୍ରାମର ବୁଣାକାର। ମା’ ଦୁର୍ଗା ଟେକ୍ସଟାଇଲ୍ ଆଣ୍ଡ ଡାଇଙ୍ଗ ଓ୍ବାର୍କସ୍ ବୁଣାକାର ସଂସ୍ଥାର ସ୍ବତ୍ୱାଧିକାରୀ ପ୍ରଭାସ ନାୟକଙ୍କ ତତ୍ତ୍ୱାବଧାନରେ ୧୬ଜଣ ବୁଣାକାର ଏହି କାର୍ଯ୍ୟରେ ଲାଗିଛନ୍ତି। ମହାପ୍ରଭୁଙ୍କ ଅଣସର ଏବଂ ପହଣ୍ଡି ଲାଗି ଗାମୁଛା ବୟନିକା ଯୋଗାଇଥାଏ। ଗତ ୨୦୧୮ ମସିହାରୁ ପ୍ରଭାସ ବୟାନିକା ଠାରୁ ଏହି ଅର୍ଡର ପାଇ ମହାପ୍ରଭୁଙ୍କ ଲାଗି ହାତ ତିଆରି ଗାମୁଛା ପ୍ରସ୍ତୁତି କରୁଛନ୍ତି। ସ୍ନାନଯାତ୍ରା ପୂର୍ବରୁ ବୟନିକାକୁ ଏହା ହସ୍ତାନ୍ତର କରିଥାନ୍ତି। ୭୦ପ୍ରତିଶତ କାର୍ଯ୍ୟ ସରିଲାଣି। ମେ’ ମାସ ଶେଷ ସୁଦ୍ଧା ଏହି କାର୍ଯ୍ୟ ଶେଷ ହେବ ବୋଲି ପ୍ରଭାସ କହିଛନ୍ତି।
ସେବାରୁ ମିଳୁଛି ଆନନ୍ଦ
ମହାପ୍ରଭୁଙ୍କ ସେବାରେ ନିୟୋଜିତ ହୋଇଥିବାରୁ ନିଜକୁ ଧନ୍ୟ ମନେକରୁଛି। ଏଭଳି ସେବା କରିବାର ସୁଯୋଗ ମିଳୁଥାଉ ବୋଲି ପ୍ରଭାସ କହିଛନ୍ତି। ଲକ୍ଡାଉନ୍ ଲାଗି ମାସ୍କ ପରିଧାନ ଏବଂ ସାମାଜିକ ଦୂରତ୍ୱ ଉପରେ ଗୁରୁତ୍ୱ ଦିଆଯାଉଛି। ଗୋଟିଏ ତନ୍ତ ଠାରୁ ଅନ୍ୟ ଏକ ତନ୍ତ ୨ଫୁଟ ବ୍ୟବଧାନ ରହିଛି। ବୁଣାକାରମାନେ ହାତ ସାନିଟାଇଜ ସହ ସଜାଗ ରହିଛନ୍ତି।
ବୟନିକା ଯୋଗାଏ କଞ୍ଚାମାଲ
ଅକ୍ଷୟ ତୃତୀୟାଠାରୁ କାମ ଆରମ୍ଭ ହୋଇଥାଏ। ଚଳିତ ବର୍ଷ ବୟନିକା ଠାରୁ ଏପ୍ରିଲ ୧୮ ତାରିଖରେ ଅର୍ଡର ମିଳିଥିଲା। ଅର୍ଡର ପାଇବା ପରେ କାମ ଆରମ୍ଭ ହୋଇଥିଲା। ସୂତାଲୁଗା ପ୍ରସ୍ତୁତି ଲାଗି ବୟନିକା କଞ୍ଚାମାଲ ଯୋଗାଇଥାଏ। ଲକ୍ଡାଉନ୍ ଲାଗି କଞ୍ଚାମାଲ ଆଣିବାରେ ବିଳମ୍ବ ହୋଇଥିଲା। ସ୍ଥାନୀୟ ପୋଲିସ ଠାରୁ ଯାତାୟତ ଲାଗି ଅନୁମତି ମିଳିବା ପରେ କଞ୍ଚାମାଲ ଆଣି କାମ ଆରମ୍ଭ ହୋଇଛି।
ତ୍ୱରିତ ଗତିରେ ଚାଲିଛି କାମ
ମହାପ୍ରଭୁଙ୍କ ଅଣସର ଲାଗି ୧୮୫ଟି ୬ହାତି ଲମ୍ବର ଗାମୁଛା ଏବଂ ପହଣ୍ଡି ଲାଗିି ୧୮୫ଟି ୫ହାତି ଗାମୁଛା ବୁଣା ଚାଲିଛ। ପ୍ରଭୁଙ୍କ ଏହି ଗାମୁଛାକୁ ଅଧିକ ଆକର୍ଷଣୀୟ କରିବା ଲାଗି ଅଣସର ଗାମୁଛା ଧଳାରଙ୍ଗର ହୋଇଥିବା ବେଳେ କୁମ୍ଭପକା(ଡିଜାଇନ) ଥାଇ ପାଢିର ରଙ୍ଗ କମଳା ଏବଂ ପହଣ୍ଡି ଗାମୁଛାର ରଙ୍ଗ କମଳା ହୋଇଥିବା ବେଳେ କୁମ୍ଭ ଥାଇ ପାଢିର ରଙ୍ଗର ସବୁଜ ରଖାଯାଇଥାଏ ବୋଲି ପ୍ରଭାସ କହିଛନ୍ତି।
