ମନୋଜ ହତ୍ୟା ମାମଲା: କାର ଡ୍ରାଇଭର, କାମବାଲା ସହ ୩ ଜଣଙ୍କ ବୟାନ ରେକର୍ଡ
7:31 amJune 7, 2019 / 21

ବ୍ରହ୍ମପୁର ଅଫିସ,୭ା୬- ଆସିକା କଂଗ୍ରେସ ବିଧାୟକ ପ୍ରାର୍ଥୀ ମନୋଜ ଜେନା ହତ୍ୟା ଘଟଣାରେ ଗୁରୁବାର ୩ଜଣଙ୍କ ବୟାନ କୋର୍ଟରେ ରେକର୍ଡ କରାଯାଇଛି। ସେମାନେ ହେଲେ କାର ଡ୍ରାଇଭର ସୁଶାନ୍ତ ସ୍ବାଇଁ, ଘରକାମ କରୁଥିବା ବଳରାମ ମହାନ୍ତି ଓ ଭୁବନେଶ୍ୱର ପଟିଆ ଅଞ୍ଚଳରେ ଅଭିଯୁକ୍ତମାନଙ୍କୁ ଘରଭଡ଼ା ଦେଇଥିବା କ୍ଷୀରୋଦ ପାତ୍ର ା
ପୋଲିସ ବ୍ରହ୍ମପୁର କୋର୍ଟରେ ହାଜର କରିବା ପରେ ଏସଡିଜେଏମ୍‌ ଦାୟିତ୍ୱରେ ଥିବା ମାଜିଷ୍ଟ୍ରେଟ ଏସ୍‌କେ ଆଚାର୍ଯ୍ୟଙ୍କ କୋର୍ଟରେ ଉପରୋକ୍ତ ୩ ଜଣଙ୍କର ଧାରା ୧୬୪ ଅନୁସାରେ ବୟାନ ରେକର୍ଡ କରାଯାଇଥିଲା। ଘଟଣା ଦିନ ଅର୍ଥାତ ମେ ୨୨ ତାରିଖ ସନ୍ଧ୍ୟାରେ ମନୋଜଙ୍କ ସହ ଅନୀଲ ସ୍ବାଇଁ, ବଳରାମ ମହାନ୍ତି, ସୁଶାନ୍ତ ସ୍ବାଇଁ ଭୁବନେଶ୍ୱରରୁ କାର (ନଂ ଓଡି୩୨ଏ୨୮୭୪) ଯୋଗେ ବ୍ରହ୍ମପୁର ଫେରୁଥିଲେ। ରାତ୍ର ୯ଟା ବେଳେ ଲାଞ୍ଜିପଲ୍ଲୀ ବାଇପାସ୍‌ ଜାତୀୟ ରାଜପଥ ୧୬ ଅକ୍ସଫୋର୍ଡ ସ୍କୁଲ ନିକଟରେ ଡ୍ରାଇଭର ସୁଶାନ୍ତ କାରଟି ପାର୍କିଂ କରିଥିଲେ। ମନୋଜ ଓ ଅନ୍ୟମାନେ ପରିସ୍ରା ପାଇଁ ରାସ୍ତାକଡ଼କୁ ଯାଇଥିଲେ। ଦୁର୍ବୃତ୍ତମାନେ ସେଠାରେ ମନୋଜଙ୍କ ଗଳା କାଟିବା ସହ ଗୁଳି ଫୁଟାଇ ହତ୍ୟା କରିଥିଲେ। ସେହି ରାତିରେ ଯାହା ଘଟିଥିଲା ସେମାନେ ମାଜିଷ୍ଟ୍ରେଟଙ୍କ ସମ୍ମୁଖରେ ବୟାନ ଦେଇଥିବା ଜଣାପଡ଼ିଛି। ସେହିପରି କ୍ଷୀରୋଦ ଅଭିଯୁକ୍ତମାନଙ୍କୁ ୨୦୧୮ ଡିସେମ୍ବର ୧୨ ତାରିଖରେ ତାଙ୍କ ଘର ଭଡ଼ାରେ ଦେଇଥିଲେ। ସେ ସମ୍ପର୍କରେ ସେ ମାଜିଷ୍ଟ୍ରେଟଙ୍କ ସମ୍ମୁଖରେ ବୟାନ ଦେଇଥିବା ଜଣାପଡ଼ିଛି। ଉପରୋକ୍ତ ୩ ଜଣଙ୍କ ବୟାନ ରେକର୍ଡଭୁକ୍ତ ହୋଇଥିବା କୋର୍ଟ ସୂତ୍ରରୁ ପ୍ରକାଶ।