କଲ୍ୟାଣୀ (ପଶ୍ଚିମ ବଙ୍ଗ), ୨୧ା୧ (ପି.ଟି.)- ହାଇଦ୍ରାବାଦ ବିପକ୍ଷ ଗ୍ରୁପ୍ ଏ’ ରଣଜୀ ଟ୍ରଫି ମ୍ୟାଚରେ ସିନିୟର ବ୍ୟାଟ୍ସମ୍ୟାନ ମନୋଜ ତିଓ୍ବାରୀଙ୍କ ତ୍ରିଶତକ ସହାୟତାରେ ବେଙ୍ଗଲ ନିଜ ସ୍ଥିତିକୁ ସୁଦୃଢ କରିଛି। ଦେଶ ତରଫରୁ ୧୨ ଅନ୍ତର୍ଜାତୀୟ ଦିନିକିଆ ଏବଂ ୩ ଅନ୍ତର୍ଜାତୀୟ ଟି୨୦ ଖେଳିଥିବା ୩୪ ବର୍ଷୀୟ ମନୋଜ ୪୧୪ ବଲରେ ୩୦୩ ରନ କରି ଅପରାଜିତ ରହିଥିଲେ। ସେ ଦୀର୍ଘ ୧୦ ଘଣ୍ଟା ୩୦ ମିନିଟ ଧରି ବ୍ୟାଟିଂ କରିଥିବାବେଳେ ୩୦ ଚୌକା ଏବଂ ୫ ଛକା ଲଗାଇଥିଲେ। ଦ୍ୱିତୀୟ ଦିବସ ଖେଳରେ ସେ ତାଙ୍କ ଶେଷ ୫୦ ରନ ମାତ୍ର ୩୭ ବଲରୁ କରିଥିଲେ। ତାଙ୍କର ଷ୍ଟ୍ରାଇକ୍ରେଟ୍ ୭୩.୧୯ ଥିଲା। ମନୋଜଙ୍କର ଏହାଥିଲା ପ୍ରଥମ ରଣଜୀ ତ୍ରିଶତକ। ବେଙ୍ଗଲ ୬୩୫/୭ରେ ଏହାର ପ୍ରଥମ ଇନିଂସ ଘୋଷଣା କରିଥିଲା। ୨୦୧୫ରେ ଭାରତ ତରଫରୁ ଶେଷଥର ପାଇଁ ଖେଳିଥିବା ମନୋଜ ତ୍ରିଶତକ ହାସଲ କରିବାରେ ବେଙ୍ଗଲର ଦ୍ୱିତୀୟ ଖେଳାଳି। ପୂର୍ବରୁ ୧୯୯୮-୯୯ ସିଜନରେ ଗୁଆହାଟୀରେ ଆସାମ ବିପକ୍ଷ ମ୍ୟାଚରେ ଦେବାଙ୍ଗ ଗାନ୍ଧୀ ୩୨୩ ରନ କରିଥିଲେ। ପୂର୍ବରୁ ମନୋଜଙ୍କ ସର୍ବୋଚ୍ଚ ସ୍କୋର ୨୬୭ ରନ ଥିଲା। ବେଙ୍ଗଲ ଅଧିନାୟକ ଥିବାବେଳେ ୨୦୧୧-୧୨ ସିଜନରେ ମଧ୍ୟପ୍ରଦେଶ ବିପକ୍ଷ ଡ୍ର ମ୍ୟାଚରେ ସେ ଏହି ସ୍କୋର କରିଥିଲେ।
