ନୂଆଦିଲ୍ଲୀ,୧୧।୩: ହୋଲି ଉତ୍ସବ ଅବସରରେ ମଧ୍ୟପ୍ରଦେଶ ରାଜନୀତିରେ ଦେଖିବାକୁ ମିଳିଛି ଅନେକ ରଙ୍ଗ। କଂଗ୍ରେସ ଉପରେ ଅସନ୍ତୁଷ୍ଟ ହୋଇ ଜ୍ୟୋତିରାଦିତ୍ୟ ସିନ୍ଧିଆ ମଙ୍ଗଳବାର ଦଳରୁ ଇସ୍ତଫା ଦେଇଛନ୍ତି। ଏହାପରେ ଆଉ ୧୯ ବିଧାୟକ ମଧ୍ୟ ଦଳରୁ ଇସ୍ତଫା ଦେଇଥିବା ଦେଖାଯାଇଥିଲା। ଫଳରେ କମଳନାଥ ସରକାରଙ୍କ ଉପରେ ସଙ୍କଟ ଦୃଷ୍ଟି ଗୋଚର ହୋଇଛି। ମଙ୍ଗଳବାର ସନ୍ଧ୍ୟାରେ ଜ୍ୟୋତିରାଦିତ୍ୟ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଓ ସ୍ବରାଷ୍ଟ୍ରମନ୍ତ୍ରୀ ଅମିତ ଶାହାଙ୍କୁ ସାକ୍ଷାତ୍ କରିଥିଲେ। ଏହାପରେ ଆଲୋଚନା ହେଉଛି କି ଖୁବ୍ଶୀଘ୍ର ସେ ଭାରତୀୟ ଜନତା ପାର୍ଟି(ଭାଜପା)ରେ ଯୋଗ ଦେବେ। ଇତିମଧ୍ୟରେ ମଧ୍ୟପ୍ରଦେଶର କଂଗ୍ରେସ ସରକାରଙ୍କୁ ଭାଙ୍ଗିବାକୁ ଯାଇ ଭାଜପାର କେତେଜଣ ବିଧାୟକ ବିଳମ୍ବିତ ରାତିରେ ଗୁରୁଗ୍ରାମ ପହଞ୍ଚିଥିବା ଜଣାପଡିଛି। ସେପଟେ କଂଗ୍ରେସରୁ ଇସ୍ତଫା ଦେଇଥିବା ୧୯ ବିଧାୟକଙ୍କୁ ଭାଜପାରେ ସାମିଲ କରିବାକୁ ପ୍ରୟାସ ଚାଲିଥିବା ବେଳେ ଏପଟେ କମଳନାଥଙ୍କ ସରକାର ଆହୁରି ଖରାପ ସ୍ଥିତିକୁ ଯିବା ପୂର୍ବରୁ ବାକିଥିବା ବିଧାୟକଙ୍କୁ ବୁଧବାର ସକାଳେ ଜୟପୁର ପଠାଇବା ବ୍ୟବସ୍ଥା କରିଛି।
