ଲାଞ୍ଜିଗଡ,୧୬।୪(ଡି.ଏନ୍.ଏ.): ରାଜ୍ୟ ସରକାର କରୋନା ମୁକାବିଲା ପାଇଁ ବିଭିନ୍ନ ପଦକ୍ଷେପ ଗ୍ରହଣ କରୁଛନ୍ତି। ପ୍ରଶାସନର ସମସ୍ତ ବିଭାଗ ସଚେତନତା ପାଇଁ ଅଣ୍ଟା ଭିଡଛି। ଏଥିରୁ ବାଦ ପଡି ନାହାନ୍ତି ଦୁର୍ଗମ ଅଞ୍ଚଳରେ ଥିବା ଅଙ୍ଗନବାଡି କର୍ମୀ। ସେମାନେ ଗ୍ରାମାଞ୍ଚର ଦୁର୍ଗମ ଅଞ୍ଚଳକୁ ଯାଇ ସଚେତନତାର ବାର୍ତ୍ତା ଦେଉଛନ୍ତି। ମନରେ ସେମାନଙ୍କ ଅନେକ ଭୟ ରହିଛି, ତଥାପି ସରକାରୀ ନିର୍ଦ୍ଦେଶକୁ ମାନି ସେମାନେ ପାଳନ କରିଛନ୍ତି। ଘର ଘର ଯାଇ ଲିଫଲେଟ ବଣ୍ଟନ କରିବା ସହ ସାବୁନରେ ହାତ ଧୋଇବା ଓ ବାହାରକୁ ନ ବାହାରି ଘର ଭିତର ରହିବା ସହ ସାମାଜିକ ଦୂରତା ରକ୍ଷା କରିବାକୁ ଲୋକଙ୍କୁ ବୁଝାଉଛନ୍ତି। ରାଜ୍ୟ ଓ ଦେଶ ବାହାରୁ ଆସିଥିବା ବ୍ୟକ୍ତିଙ୍କ ଘରକୁ ଯାଇ ହୋମ କ୍ୱାରାନଟାଇନରେ ରହିବା ପାଇ ପରାମର୍ଶ ଦେଇଛନ୍ତି ଏଭଳି ଦେଖିବାକୁ ମିଳିଛି କାଳାହାଣ୍ଡି ଜିଲା ଲାଞ୍ଜିଗଡ ବ୍ଲକ କାନକୁଟ୍ରୁ ପଞ୍ଚାୟତ ଅନ୍ତର୍ଗତ ପାଇକବୋରୀ ଗାଁରେ। ପାଇକବୋରୀ ଗାଁର ଅଙ୍ଗନବାଡି କର୍ମୀ ଚଞ୍ଚଳା ସାହୁ ସକାଳୁ ଉଠି ତାଙ୍କ ଅଧୀନରେ ଥିବା ବିଭିନ୍ନ ଗାଁକୁ ଯାଇ ଲୋକଙ୍କୁ ସଚେତନତାର ବାର୍ତ୍ତା ଦେଉଛନ୍ତି। ହାତ କେମିତି ଧୋଇବେ ଶିଖାଉଛନ୍ତି । ମାସ୍କ ଲଗାଇବା, ଗାଁରେ ତାସ ଖେଳ ବନ୍ଦ କରିବା, କ୍ରିକେଟ ଓ ବିଭିନ୍ନ ସଂଘବୋଧ ଖେଳକୁ ବର୍ତ୍ତମାନ ପରିସ୍ଥିତିରେ ବନ୍ଦ କରିବା ପାଇଁ ପରାମର୍ଶ ଦେଉଛନ୍ତି । ସେଭଳି ପଞ୍ଚାୟତ ଅଫିସ ଓ ସ୍କୁଲରେ ଖୋଲା ଯାଇଥିବା ଅସ୍ଥାୟୀ କ୍ୟାମ୍ପରେ ମଧ୍ୟ ଦାୟିତ୍ୱ ନେଇଥିବା ବେଳେ ଭତ୍ତା ବଣ୍ଟନ, ପିଡିଏସ ସାମଗ୍ରୀ ବଣ୍ଟନ ସମୟରେ ମଧ୍ୟ ଉପସ୍ଥିତ ରହୁଛନ୍ତି । ସରକାରଙ୍କ ପକ୍ଷରୁ ପ୍ରସୂତି, ଗର୍ଭବତୀ ଓ ଅଙ୍ଗନଓ୍ବାଡି ପିଲାଙ୍କ ପାଇଁ ଆଗୁଆ ଅଣ୍ଡା, ଛତୁଆ ଓ ଚାଉଳ ବଣ୍ଟନ କରୁଛନ୍ତି। ସେହିଭଳି ଲାଞ୍ଜିଗଡ ବ୍ଲକର ୧୬୩ ଜଣ ଅଙ୍ଗନଓ୍ବାଡି କର୍ମୀ ଓ ୫୦ ଜଣ ମିନି ଅଙ୍ଗନଓ୍ବାଡି କର୍ମୀ ବିଭିନ୍ନ ଗାଁକୁ ଯାଇ ଲୋକଙ୍କୁ କରୋନା ସମ୍ପର୍କରେ ସଚେତନ କରାଉଛନ୍ତି ା ଏଥିରେ ଲାଞ୍ଜିଗଡ ସିଡିପିଓ କୁସୁମ କୁମାରୀ ପ୍ରହରାଜ ଓ ବିଭିନ୍ନ ସେକ୍ଟରରେ ନିଯୁକ୍ତ ଥିବା ସୁପରଭାଇଜରମାନେ ସହଯୋଗ କରୁଛନ୍ତି।
