ଖୋର୍ଦ୍ଧା ଅଫିସ,୧୬ା୪: ବଜାରରେ ବୁଲୁଥିବା ଅମାନିଆ ବାଇକ ଚାଳକଙ୍କୁ ସଚେତନ କରିବା ଲାଗି ଆଗେଇ ଆସିଛନ୍ତି ସାମାଜିକ କର୍ମୀ ତଥା ଖବରଦାତା ଧନେଶ୍ୱର ବିଧାର। ସମ୍ପୂର୍ଣ୍ଣ ଶରୀରରେ କଳା କପଡ଼ା ପିନ୍ଧି ନିଜକୁ କରୋନା ଭୂତ ବେଶରେ ସଜାଇ ସେ ବାଇକରେ ସାହିକୁ ସାହି ବୁଲି ସଚେତନ କରୁଛନ୍ତି। କିଛି କାମ ନାହିଁ ଯଦି ଘରେ ରହିବାକୁ ଲୋକଙ୍କୁ ଅନୁରୋଧ କରୁଛନ୍ତି। ବୁଧବାର ନୂଆ ବସ୍ଷ୍ଟାଣ୍ଡରେ ଖୋର୍ଦ୍ଧା ଆଦର୍ଶ ଥାନା ଅଧିକାରୀ ଉମାଶଙ୍କର ସିଂଙ୍କ ଉପସ୍ଥିତିରେ ଧନେଶ୍ୱର ରାସ୍ତାରେ ଯାତାୟାତ କରୁଥିବା ବାଇକ ଓ କାର ଚାଳକଙ୍କୁ ସଚେତନ କରିଥିଲେ। ମାସ୍କ ପିନ୍ଧିବାକୁ କହିବା ସହ କେତେଜଣଙ୍କୁ ମାସ୍କ ପିନ୍ଧାଇଥିଲେ। ଏହି ଅଭିଯାନ ଏପ୍ରିଲ ଶେଷ ପର୍ଯ୍ୟନ୍ତ ଜାରି ରହିବ। ପ୍ରଥମ ୩ ଦିନ ଖୋର୍ଦ୍ଧା, ପରେ ନୟାଗଡ଼ ଓ ଗଞ୍ଜାମ ଜିଲାରେ ସଚେତନତା ସୃଷ୍ଟି କରିବାର ଯୋଜନା ରଖିଛନ୍ତି ବିଧାର। ସେହିପରି ଚିଲିକା ବ୍ଲକ ବଉଳାବନ୍ଧ ପଞ୍ଚାୟତରେ ସରପଞ୍ଚ ଦେବାଶିଷ ରଥ ଓ ତାଙ୍କର ଜଣେ ସହଯୋଗୀ ଚକୁଳିଆ ପଣ୍ଡା ବେଶରେ ଗାଁ ଗାଁ ବୁଲି ସଚେତନ କରୁଛନ୍ତି। ମାସ୍କ ପିନ୍ଧନ୍ତୁ, ହାତକୁ ସାବୁନରେ ବାରମ୍ବାର ଧୁଅନ୍ତୁ, ପରିବେଶ ସ୍ବଚ୍ଛ ରଖିବାକୁ ସେ ପରାମର୍ଶ ଦେଉଛନ୍ତି।
