ନିଶ୍ଚିନ୍ତକୋଇଲି,୮।୫(ସ୍ବ.ପ୍ର.)- ଭୁବନେଶ୍ୱର ଭିଏସ୍ଏସ୍ ନଗର କରୋନା ଆକ୍ରାନ୍ତ ହେଉଛନ୍ତି କଟକ ଜିଲା ନିଶ୍ଚିନ୍ତକୋଇଲି ବ୍ଲକ କଟିକଟା ପଞ୍ଚାୟତ ମିରା ସାହିର। ଏହି ୩୪ ବର୍ଷୀୟ ଯୁବକ ଭୁବନେଶ୍ୱରରେ ରହି ଏକ ହୋଟେଲରେ ରହି କାମ କରନ୍ତି। ତେବେ ମାସକ ତଳେ ହଠାତ୍ ଦେହ ଖରାପ ଓ ଥଣ୍ଡା ଜର ହେବାରୁ ସେ ଗାଁକୁ ପଳାଇ ଆସିଥିଲେ। ଗାଁରେ ରହି ଚିକତ୍ସା କରାଇଥିଲେ। ସୁସ୍ଥ ଅନୁଭବ କରିବା ପରେ ୫ ଦିନ ତଳେ ସୋମବାର ଦିନ କାମ କରିବା ପାଇଁ ପୁଣି ଭୁବନେଶ୍ୱର ଯାଇଥିଲେ। ସେଠାରେ ପହଞ୍ଚିବା ପରେ ସେ କାମ କରୁଥିବା ହୋଟେଲ ମାଲିକ ତାଙ୍କ କରୋନା ପରୀକ୍ଷା କରାଇଥିଲେ। ଗୁରୁବାର ସେ କରୋନା ଭୂତାଣୁ ସଂକ୍ରମିତ ହୋଇଥିବା ଜଣାପଡିଥିଲା। ତେବେ ଏହି ଘଟଣା ଜଣାପଡ଼ିବା ପରେ ସମଗ୍ର ନିଶ୍ଚିନ୍ତକୋଇଲି ଅଞ୍ଚଳରେ ଆତଙ୍କ ଖେଳିଯାଇଛି।
ବ୍ୟକ୍ତିଜଣଙ୍କ କଟିକଟା ପଞ୍ଚାୟତର ବାସିନ୍ଦା। କିନ୍ତୁ ତାଙ୍କ ଘର ଅଶୁରେଶ୍ୱର ଓ କେଣ୍ଟାଳ ପଞ୍ଚାୟତ ସଲଗ୍ନ ଅଟେ। ସେ ଦୀର୍ଘ ଏକ ମାସ ହେବ ଘରେ ରହି ବିଭିନ୍ନ କାର୍ଯ୍ୟରେ ଯୋଗ ଦେବା ସହ ବଜାର, ହାଟ, କ୍ଲବ, ଧର୍ମାନୁଷ୍ଠାନ ଏବଂ ବହୁ ଲୋକଙ୍କ ସଂସ୍ପର୍ଶରେ ଆସିଥିବା କୁହାଯାଉଛି। ତେବେ ସମ୍ପୃକ୍ତ ବ୍ୟକ୍ତି ଏକ ମାସ ହେବ ଏହି ଅଞ୍ଚଳରେ ନିର୍ବିଘ୍ନରେ ବୁଲିବା ଏବଂ ନିଶ୍ଚିନ୍ତକୋଇଲି ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଚିକିତ୍ସିତ ହେବା ଘଟଣା ପ୍ରକାଶ ପାଇବା ପରେ ନିଶ୍ଚିନ୍ତକୋଇଲି ବ୍ଳକ ପ୍ରଶାସନ କଣ୍ଟ୍ରାକ୍ଟ ଟ୍ରେସିଂ ଆରମ୍ଭ କରିଛି। ପ୍ରଥମ ପର୍ଯ୍ୟାୟରେ ତାଙ୍କ ସହ ସିଧା ସଳଖ ସଂସ୍ପର୍ଶରେ ଆସିଥିବା ୪୫ ଜଣଙ୍କୁ ଚିହ୍ନଟ କରାଯାଇଥିଲା । ସେମାନଙ୍କର ରକ୍ତ ନମୁନା ପରୀକ୍ଷା ପାଇଁ ପ୍ରସ୍ତୁତି ଆରମ୍ଭ ହୋଇଛି। ତେବେ ନିଶ୍ଚିନ୍ତକୋଇଲି ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରର ଆଉଡୋରକୁ ଶୁକ୍ରବାର ସକାଳୁ ସମ୍ପୂର୍ଣ୍ଣ ବନ୍ଦ କରିଦିଆଯାଇଛି। କେବଳ ଜରୁରୀ କାଳୀନ ସେବା ଯୋଗାଇ ଦିଆଯାଉଛି। ପ୍ରଥମ ପର୍ଯ୍ୟାୟରେ ନିକଟ ସମ୍ପର୍କୀୟଙ୍କ ସ୍ବାବ୍ ସଂଗ୍ରହ କରାଯିବ ଓ କଣ୍ଟ୍ରାକ୍ଟ ଟ୍ରେସିଂ କାର୍ଯ୍ୟ ତ୍ୱରାନିତ କରିବା ପାଇଁ ପଦକ୍ଷେପ ନିଆଯିବ ବୋଲି ମେଡିକାଲ ଅଫିସର ଅମିତ ଜେନା ପ୍ରକାଶ କରିଛନ୍ତି।
ଅପରପକ୍ଷରେ ତରତ ହାଟକୁ ବନ୍ଦ କରିବା ପାଇଁ ତହସିଲଦାର ଜିତେନ୍ଦ୍ର ପାତ୍ର ନିର୍ଦ୍ଦେଶ ଦେଇଛନ୍ତି। ଏଥିସହ ସିଧା ସଳଖ ସଂସ୍ପର୍ଶରେ ଆସିଥିବା ଲୋକମାନଙ୍କୁ ହୋମ କ୍ୱାରାଣ୍ଟାଇନରେ ରହିବା ପାଇଁ ବିଡିଓ କର୍ଣ୍ଣଦେବ ସମାଦ୍ଧାର ପରାମର୍ଶ ଦେଇଛନ୍ତି। ତେବେ ସ୍ବାବ୍ ଯାଇ ରିପୋର୍ଟ ଆସିବା ପରେ ସମୟ ଉପଯୋଗୀ ପଦକ୍ଷେପ ନିଆଯିବ ବୋଲି ପ୍ରସାଶନ ତରଫରୁ ସୂଚନା ଦିଆଯାଇଛି।
