ଢେଙ୍କାନାଳ ଅଫିସ, ୨୩।୫ – ଭୀମ ଭୋଇଙ୍କ ଚରିତ୍ରକୁ ଆକ୍ଷେପ କରି ପ୍ରକାଶିତ ଏକ ପୁସ୍ତକକୁ ନେଇ ଢେଙ୍କାନାଳ ଜିଲା ଯୋରନ୍ଦାସ୍ଥିତ ମହିମାଗାଦିରେ ତୀବ୍ର ପ୍ରତିକ୍ରିୟା ପ୍ରକାଶ ପାଇଛି। ମହିମା ଧର୍ମର ଅନ୍ୟତମ ପ୍ରଚାରକଙ୍କ ପ୍ରତି ଏପରି କୁତ୍ସାରଟନାକୁ ନେଇ ମହିମା ଧର୍ମାବଲମ୍ବୀଙ୍କ ମଧ୍ୟରେ ଅସନ୍ତୋଷ ବଢ଼ିବାରେ ଲାଗିଛି। ଏହାକୁ ନେଇ ଶୁକ୍ରବାର ମହିମାଗାଦିର ସତ୍ୟମହିମା ଧର୍ମଧାମ ପରିଚାଳନା ସମିତି ପକ୍ଷରୁ ମହିମା ସମାଜ କାର୍ଯ୍ୟାଳୟ ପରିସରରେ ଏକ ଖବରଦାତା ସମ୍ମିଳନୀ ଆୟୋଜିତ ହୋଇଥିଲା। ସମିତିର ଅଧ୍ୟକ୍ଷ ବାବା ପବିତ୍ର ମୋହନ ଦାସ ଏବଂ ସମ୍ପାଦକ ନିତ୍ୟାନନ୍ଦ ଦାସ କହିଲେ, ବିବାଦୀୟ ପୁସ୍ତକର ଲେଖକ ମହିମାଧର୍ମ ବିରୋଧରେ ଉଲ୍ଲେଖ କରିଛନ୍ତି। ଭୀମ ଭୋଇ ମହିମାଧର୍ମର ପ୍ରଥମ ଭକ୍ତ। ରେଢ଼ାଖୋଲର କଙ୍କଣପଡ଼ାରୁ ତାଙ୍କୁ ମହିମାସ୍ବାମୀ ଉଦ୍ଧାର କରି ଦିବ୍ୟଚକ୍ଷୁ ପ୍ରଦାନ କରିଥିଲେ। ସେ ମହିମାଧର୍ମର ଆଦିବାର୍ତ୍ତା ପ୍ରଚାର କରିଥିଲେ। ମହିମାଧର୍ମର ଗଭୀର ଆତ୍ମ ନିବେଦନ ରହିଛି, ଯାହା ଭୀମ ଭୋଇଙ୍କଠାରୁ ପ୍ରଚାରିତ। ସନ୍ଥକବିଙ୍କ ଚରିତ୍ର ସଂହାରକୁ କଦାପି ବରଦାସ୍ତ କରାଯିବ ନାହିଁ। ଉକ୍ତ ବିବାଦୀୟ ପୁସ୍ତକକୁ ସରକାର ନିଷିଦ୍ଧ ଘୋଷଣା କରିବା ସହିତ ଲେଖକଙ୍କ ନାମରେ ଦୃଢ କାର୍ଯ୍ୟାନୁଷ୍ଠାନ ଗ୍ରହଣ କରିବା ଲାଗି ସୁବ୍ରତ ବାବା, ଅଶୋକ ବାବା, ଦୀନବନ୍ଧୁ ବାବା, ସୌମ୍ୟ ବାବା ପ୍ରମୁଖ ଦାବି କରିଛନ୍ତି। ଏହାପରେ ମହିମାଗାଦି ସୁରକ୍ଷା ମଞ୍ଚର ସଭାପତି ପ୍ରତ୍ୟୁଷହରି ପ୍ରଧାନ, ସମ୍ପାଦକ କାରଣ ବେହେରା ପ୍ରମୁଖ ବିକ୍ଷୋଭ ପ୍ରଦର୍ଶନ କରିବା ସହିତ ସମ୍ପୃକ୍ତ ଲେଖକଙ୍କ କୁଶ ପୁତ୍ତଳିକା ଦାହ କରିଥିଲେ।
