ଭଦ୍ରକ ଅଫିସ, ୧୬।୯- ଭଦ୍ରକ ଜିଲାରେ ଉପଯୋଗୀ ମୃତ୍ତିକା, ଜଳବାୟୁ ଏବଂ ଭିତ୍ତିଭୂମି ଥିଲେ ମଧ୍ୟ ଫୁଲଚାଷର ବିକାଶ ହୋଇପାରୁ ନାହିଁ । ଚାଷୀମାନେ ସଚେତନ ନ ଥିବା ଏବଂ ପ୍ରୋତ୍ସାହନ ଅଭାବ ଭଳି ବିଭିନ୍ନ କାରଣରୁ ଏହି ଚାଷ ଉଧଉନାହିଁ । ବାହାଘର, ବ୍ରତଘର, ଶ୍ରାଦ୍ଧବାର୍ଷିକୀ ଏପରିକି ପର୍ବପର୍ବାଣି ସମୟରେ ପଶ୍ଚିମବଙ୍ଗର କଲିକତାରୁ ଅଣାଯାଉଥିବା ଫୁଲ ଉପରେ ନିର୍ଭର କରିବାକୁ ପଡୁଛି।
ଉଦ୍ୟାନ ବିଭାଗ ତଥ୍ୟ ଅନୁଯାୟୀ ଭଦ୍ରକ ଜିଲାରେ ଦୈନିକ ବିଭିନ୍ନ କିସମର ୧୦୦ କେଜି ପର୍ଯ୍ୟନ୍ତ ଫୁଲର ଚାହିଦା ରହିଛି। ବାର୍ଷିକ ଚାହିଦା ପ୍ରାୟ ୩୬୦ କୁଇଣ୍ଟାଲ। ଜିଲାର ବାସୁଦେବପୁର, ଧାମନଗର, ବନ୍ତ ଓ ଭଦ୍ରକର ହାତଗଣତି ଚାଷୀ ଫୁଲଚାଷ କରୁଛନ୍ତି। ଭଦ୍ରକ ନିକଟସ୍ଥ ବଣିଆ, ଗେଲଟୁଆ, ଜଳଙ୍ଗା ଅଞ୍ଚଳର କେତେକ ଚାଷୀ ଫୁଲଚାଷକୁ ଆପଣେଇଛନ୍ତି। ଜିଲାରୁ କମ୍ ଫୁଲ ଉପତ୍ାଦିତ ହେଉଥିବାରୁ ଏହା ଚାହିଦା ମେଣ୍ଟାଇପାରୁ ନାହିଁ । ଫଳରେ ବେପାରୀମାନେ କଲିକତାରୁ ବିଭିନ୍ନ ଫୁଲ ଆଣି ବଜାରରେ ବିକ୍ରି କରୁଛନ୍ତି। ବର୍ଷସାରା ଆମକୁ ଫୁଲ ପାଇଁ କଲିକତା ଉପରେ ନିର୍ଭର କରିବାକୁ ପଡୁଛି କୁହନ୍ତି, ଫୁଲ ବ୍ୟବସାୟୀ ଅରୁଣ।
ଫୁଲଚାଷରେ ଭଦ୍ରକ ଜିଲା ବହୁ ପଛରେ ପଡ଼ିଛି। ଏହି ଚାଷର ବିକାଶ ଲାଗି ସରକାରୀ ସ୍ତରରେ ଯୋଜନା ହେଉ ନାହିଁ କି ଚାଷୀଙ୍କ ଦାବି ରହୁନି। ଜିଲାରେ ବିଭିନ୍ନ ସମୟରେ ବିଭିନ୍ନ ମେଳା ଆୟୋଜନ କରାଯାଉଛି। ମାତ୍ର ପୁଷ୍ପ ପ୍ରଦର୍ଶନୀ ମାଧ୍ୟମରେ ଫୁଲଚାଷ ପ୍ରତି ଚାଷୀଙ୍କୁ ଆକୃଷ୍ଟ କରିବା ଲାଗି ଏଯାଏ ଠୋସ୍ କାର୍ଯ୍ୟକ୍ରମ ହାତକୁ ନିଆଯାଇନାହିଁ। ଏହି ଚାଷ ପାଇଁ ସଚେତନତା ସୃଷ୍ଟି, ତାଲିମ ଏବଂ ସରକାରୀ ପ୍ରୋସତ୍ାହନ କାଗଜ କଲମରେ ସୀମିତ ରହୁଛି। ଦୈନିକ ଆବଶ୍ୟକ ପଡୁଥିବା ଫୁଲରୁ ପ୍ରାୟ ୧୦ ଭାଗ ଜିଲାରୁ ଉପତ୍ାଦିତ ହେଉଥିବା କୁହାଯାଉଛି। ଫୁଲ ବ୍ୟବସାୟୀଙ୍କ ସୂତ୍ରରୁ ଜଣାଯାଇଛି ଯେ, କଲିକତାର କୋଲାଘାଟ ବଜାରରୁ ଭଦ୍ରକ ସହରକୁ ଦୈନିକ ୨୫ରୁ ଊର୍ଦ୍ଧ୍ୱ ପ୍ରକାର ଫୁଲ ଆସୁଛି। ଗୋଲାପ, ରଜନୀଗନ୍ଧା, ଗେଣ୍ଡୁଫୁଲ ଅଧିକ ବିକ୍ରି ହେଉଛି। ଫୁଲ ସାଙ୍ଗକୁ ସାଜସଜା ପାଇଁ ବିଭିନ୍ନ କିସମର ପତ୍ର ଏରିଗା, ଘୋଡା, ବଟର, ପାରାଗାଷ୍ଟ ଜାତୀୟ ପତ୍ର ବାହାରୁ ଅଣାଯାଉଛି। ଜିଲାରେ ଫୁଲ ଉପତ୍ାଦନ କମ୍ ଥିବାରୁ ବାହାଘର ସିଜନରେ ଫୁଲର ଦାମ ଅଧିକ ରହୁଛି। ଏ ସମ୍ପର୍କରେ ସହକାରୀ ଉଦ୍ୟାନ ବିଭାଗ ନିର୍ଦ୍ଦେଶକ ଉର୍ମିଳା ମହାପାତ୍ରଙ୍କୁ ପଚାରିବାରୁ କହିଛନ୍ତି, ଫୁଲଚାଷ ପ୍ରତି ଚାଷୀମାନେ ଆକୃଷ୍ଟ ହେବା ଦରକାର। ଚାଷପ୍ରଣାଳୀ ଜାଣି ଏହାର ରକ୍ଷଣାବେକ୍ଷଣ ପ୍ରତି ଯନତ୍ବାନ ହେଲେ ଏହି ଚାଷ କରି ଚାଷୀ ଲାଭବାନ ହୋଇପାରିବେ। ଫୁଲ ବ୍ୟବସାୟୀ ରାଜେନ୍ଦ୍ର ସାହୁ କହିଛନ୍ତିି, ଫୁଲ ବ୍ୟବସାୟ ଲାଭଦାୟକ। ସତର୍କତାର ସହ ଏହି ବ୍ୟବସାୟ କରିବାକୁ ପଡେ। କାରଣ ଦିନେ ଦୁଇଦିନ ଭିତରେ ଫୁଲ ସଢିଗଲେ ଡଷ୍ଟବିନ୍ରେ ପକାଇବା ଛଡା ଆଉ କିଛି ବାଟ ନ ଥାଏ। ସ୍ଥାନୀୟ ପୌରପାଳିକା ପକ୍ଷରୁ ନିର୍ଦ୍ଦିଷ୍ଟ ଭାବେ ଫୁଲବଜାର କରାଗଲେ ଏହା ଜିଲାରେ ଫୁଲ ଚାଷର ବିକାଶ ଲାଗି ପ୍ରେରଣାଦାୟକ ହୁଅନ୍ତା ବୋଲି ଅନ୍ୟ ଜଣେ ବ୍ୟବସାୟୀ କହିଛନ୍ତି।
