ଗୁୟାନା,୨୨।୧୧(ପି.ଟି.)- ଓ୍ବେଷ୍ଟଇଣ୍ଡିଜ ବିପକ୍ଷ ଟି୨୦ ସିରିଜ୍ରେ ଭାରତୀୟ ମହିଳା ଦଳ ତା’ର ଅପରାଜେୟ ଧାରା ବଜାୟ ରଖି ୫ ମ୍ୟାଚ୍ବିଶିଷ୍ଟ ସିରିଜ୍କୁ ପୋଛିନେଇଛି। ବେଦା କ୍ରିଷ୍ଣମୂର୍ତ୍ତି ଓ ଜେମିମା ରୋଡ୍ରିଗୁଏଜଙ୍କ ଅର୍ଦ୍ଧଶତକ ଓ ପରେ ବୋଲରଙ୍କ ମାପଚୁପ ବୋଲିଂ ଯୋଗୁ ଟିମ୍ ଇଣ୍ଡିଆ ଅନ୍ତିମ ଟି୨୦ ମ୍ୟାଚ୍ରେ ୬୧ ରନ୍ରେ ବିଜୟୀ ହୋଇଛି। ଏହା ସହିତ ୫ ମ୍ୟାଚ୍ବିଶିଷ୍ଟ ସିରିଜ୍କୁ ଭାରତ ୫-୦ରେ ଜିତି ନେଇଛି। ବିଜୟୀ ଦଳ ଲାଗି କ୍ରିଷ୍ଣମୂର୍ତ୍ତିଙ୍କୁ ମ୍ୟାର ଶ୍ରେଷ୍ଠ ଖେଳାଳି ପୁରସ୍କାର ପ୍ରଦାନ କରାଯାଇଥିଲା।
ଜିତି ପ୍ରଥମେ ବ୍ୟାଟିଂ କରିଥିବା ହରମନପ୍ରୀତ କୌରଙ୍କ ନେତୃତ୍ୱାଧୀନ ଭାରତୀୟ ଦଳ ୧୭ ରନ୍ ମଧ୍ୟରେ ଦୁଇ ଓପନର ଶେଫାଳି ବର୍ମା (୯) ଓ ସ୍ମୃତି ମନ୍ଧାନା (୭)ଙ୍କ ଉଇକେଟ ହରାଇଥିଲା। ଏହାପରେ କ୍ରିଷ୍ଣମୂର୍ତ୍ତି ଓ ରୋଡ୍ରିଗୁଏଜ ୩ୟ ଉଇକେଟ ପାଇଁ ଦଳୀୟ ସ୍କୋରରେ ୧୧୭ ରନ୍ ଯୋଡ଼ିଥିଲେ। ଫଳରେ ଟିମ୍ ଇଣ୍ଡିଆ ଧାର୍ଯ୍ୟ ୨୦ ଓଭରରେ ୩ ଉଇକେଟ ହରାଇ ୧୩୪ ରନ୍ କରିଥିଲା। ରୋଡ୍ରିଗୁଏଜ ୫୦ ରନ୍ କରି ଆଉଟ୍ ହୋଇଥିବାବେଳେ କ୍ରିଷ୍ଣମୂର୍ତ୍ତି ୫୭ ରନ୍ କରି ଅପରାଜିତ ରହିଥିଲେ। ଘରୋଇ ଦଳ ପକ୍ଷରୁ ହେଲି ମାଥ୍ୟୁସ ଓ ଅନିସା ମହମ୍ମଦ ଗୋଟିଏ ଉଇକେଟ ନେଇଥିଲେ। ଜବାବରେ ଓ୍ବେଷ୍ଟଇଣ୍ଡିଜ ଦଳ ନିୟମିତ ବ୍ୟବଧାନରେ ଉଇକେଟ ହରାଇବାରୁ ବିଜୟ ଲକ୍ଷ୍ୟଠାରୁ ଦୂରେଇ ରହିଥିଲା। ଘରୋଇ ଦଳ ଶେଷପର୍ଯ୍ୟନ୍ତ ବ୍ୟାଟିଂ କରି ୭ ଉଇକେଟ ହରାଇ ମାତ୍ର ୭୩ ରନ୍ କରିବାକୁ ସକ୍ଷମ ହୋଇଥିଲା। ଦଳର କେବଳ ଦୁଇଜଣ କିଶୋନା ନାଇଟ୍ ୨୨ ଓ ଶେମାଇନ କମ୍ପାବେଲେ (୧୯)ଙ୍କ ବ୍ୟତୀତ ଅନ୍ୟ କୌଣସି ବ୍ୟାଟ୍ସଓମ୍ୟାନ ଦୁଇଅଙ୍କ ସ୍କୋର ଛୁଇଁପାରି ନ ଥିଲେ। ବିଜୟୀ ଦଳ ପାଇଁ ଅନୁଜା ପାଟିଲ ୨ ଉଇକେଟ ନେଇଥିବାବେଳେ ପୁନମ ଯାଦବ, ପୂଜା, ରାଧା ଯାଦବ ଓ ହର୍ଲିନ ଦେଓଲ ଗେ୍ାଟିଏ ଲେଖାଏ ଉଇକେଟ ହାତେଇଥିଲେ।
