ନୂଆଦିଲ୍ଲୀ,୨୫ା୫(ପି.ଟି.): ଭାରତ ଓ ଆମେରିକା ମଧ୍ୟରେ ବହୁପ୍ରତୀକ୍ଷିତ ବାଣିଜ୍ୟ ଚୁକ୍ତିନାମା ଖୁବ୍ଶୀଘ୍ର ଚୂଡ଼ାନ୍ତ ହେବାକୁ ଯାଉଛି, ଯାହା ଉଭୟ ଦେଶ ପାଇଁ ଲାଭଦାୟକ ଏବଂ ସ୍ଥାୟୀ ହେବ ବୋଲି ଆମେରିକା ପରରାଷ୍ଟ୍ର ସଚିବ ମାର୍କୋ ରୁବିଓ ରବିବାର କହିଛନ୍ତି। ଏହା ଉଭୟ ଦେଶର ପାରସ୍ପରିକ ସ୍ବାର୍ଥକୁ ଆଗେଇନେବ ବୋଲି ୪ ଦିନିଆ ଭାରତ ଗସ୍ତରେ ଆସିଥିବା ରୁବିଓ ନୂଆଦିଲ୍ଲୀରେ ଏକ ଖବରଦାତା ସମ୍ମିଳନୀକୁ ସମ୍ବୋଧନ କରି କହିଛନ୍ତି। ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ଆପ୍ରବାସନ କାର୍ଯ୍ୟାନୁଷ୍ଠାନର ଅଂଶ ସ୍ବରୂପ ଗ୍ରୀନ୍ କାର୍ଡ ଏବଂ ଭିଜା ନୀତିରେ ନିକଟରେ ହୋଇଥିବା ପରିବର୍ତ୍ତନକୁ ନେଇ ରୁବିଓ କରିଛନ୍ତି, ଏହି ସଂସ୍କାରରେ ଭାରତକୁ ଟାର୍ଗେଟ କରାଯାଇ ନାହିଁ। ପ୍ରବାସନ ବ୍ୟବସ୍ଥାର ଆଧୁନିକୀକରଣ ପାଇଁ କେତେକ ପରିବର୍ତ୍ତନ ଅଣାଯାଇଥିବା ରୁବିଓ କହିଛନ୍ତି।
ମନ୍ତ୍ରୀ ଏସ୍. ଜୟଶଙ୍କରଙ୍କ ସହ ଆମେରିକା ପ୍ରତିପକ୍ଷ ରୁବିଓ ବାଣିଜ୍ୟ, ଗୁରୁତ୍ୱପୂର୍ଣ୍ଣ ଖଣିଜ, ଶକ୍ତି ଓ ପ୍ରତିରକ୍ଷା ଆଦି ବିଭିନ୍ନ କ୍ଷେତ୍ରରେ ସହଯୋଗ ବୃଦ୍ଧି ନେଇ ଆଲୋଚନା କରିଥିଲେ। ଓ୍ବାଶିଂଟନ୍ର ବାଣିଜ୍ୟ ଓ ଟାରିଫ୍ ନୀତିକୁ ନେଇ ଦୁଇ ଦେଶ ମଧ୍ୟରେ ବର୍ଷେ ହେଲା ସମ୍ପର୍କ ଖରାପ ହୋଇଥିବାବେଳେ ସେଥିରେ ସୁଧାର ଆଣିବା ଉଦ୍ଦେଶ୍ୟରେ ରୁବିଓ ଭାରତ ଗସ୍ତରେ ଆସିଛନ୍ତି। ରୁଷିଆରୁ ତୈଳ କିଣୁଥିବାରୁ ଭାରତ ଉପରେ ଅତିରିକ୍ତ ୨୫ ପ୍ରତିଶତ ଦଣ୍ଡାତ୍ମକ ଶୁଳ୍କ ସମେତ ଆମେରିକା ଭାରତରୁ ଆମଦାନୀ ସାମଗ୍ରୀ ଉପରେ ୫୦ ପ୍ରତିଶତ ଟାରିଫ୍ କଷିବାରୁ ୨ ଦେଶର ସମ୍ପର୍କ ନିମ୍ନଗାମୀ ହୋଇଥିଲା।
ଖବରଦାତା ସମ୍ମିଳନୀରେ ରୁବିଓ କହିଛନ୍ତି, ଆମେରିକା ଅର୍ଥନୀତିରେ ଭାରତୀୟମାନଙ୍କ ଅବଦାନକୁ ଆମେ ସ୍ବୀକାର କରୁଛୁ। ଭାରତୀୟ କମ୍ପାନୀଗୁଡ଼ିକ ଆମେରିକା ଅର୍ଥନୀତିରେ ୨୦ ବିଲିୟନ ଡଲାରରୁ ଊର୍ଦ୍ଧ୍ୱ ପୁଞ୍ଜିନିବେଶ କରିଛନ୍ତି। ଏହି ସଂଖ୍ୟା କ୍ରମାଗତ ଭାବେ ବଢ଼ିଚାଲିବା ଆମେ ଚାହୁଁଛୁ। ଏବେ ଆମେରିକା ମାଇଗ୍ରେଶନ ବ୍ୟବସ୍ଥାରେ ଯେଉଁ ଆଧୁନିକୀକରଣ ହୋଇଛି, ତାହା ନିର୍ଦ୍ଦିଷ୍ଟ ଭାବେ ଭାରତ ପାଇଁ ନୁହେଁ। ବାଣିଜ୍ୟ ଚୁକ୍ତିନାମା ପ୍ରସଙ୍ଗରେ ରୁବିଓ କହିଛନ୍ତି, ଆମେରିକାର ବାଣିଜ୍ୟ ପ୍ରତିନିଧିମାନେ ଖୁବ୍ଶୀଘ୍ର ଭାରତ ଗସ୍ତରେ ଆସିବା ଆଶା କରାଯାଉଛି। ଆମେରିକାକୁ ମଧ୍ୟ ଭାରତର ଏକ ପ୍ରତିନିଧି ମଣ୍ଡଳୀ ଯାଇଛନ୍ତି। ବାଣିଜ୍ୟ କଥାବାର୍ତ୍ତାରେ ଯଥେଷ୍ଟ ଅଗ୍ରଗତି ହୋଇଛି ଏବଂ ଖୁବ୍ଶୀଘ୍ର ଚୁକ୍ତିନାମା ଚୂଡ଼ାନ୍ତ ହେବା ଆଶା କରାଯାଉଛି।
