ପର୍ଲା, ୧୯।୩ (ଡି.ଏନ୍.ଏ.)- କେନ୍ କାଲୁ ଆମର ଦେଶ୍ରେ ଲୁକ୍କର କାମ୍ଧାମ, ବୁରତିକେ ନେଇ ସମାଜ, ଜାତିପାତି ସୁରୁଷ୍ଟି ହେଇଛେ। ପୁରଖାପାତିନୁ ନିଜର କୁଲବୁରତିକେ ଆପ୍ନେଇ ଅନେକ ସମାଜର ଲୋକ୍ ନିଜର ଜୀବନ୍ ଜିବ୍କା ଚଲଉଛନ୍। ଏନ୍ତା ନିଜର କୁଲବୁରତିକେ ଆପ୍ନେଇ ସଖାଲୁ ବେଲବୁଡ଼ାତକ୍ ନିଅଁାରେ ଯୁଝି ଯୁଝି ଲୁକ୍କର ମନ୍ପସନର ଲୁହା ସାମାନ ତିଆର କରୁଥିବାର ଝନେ କାରିଗରକୁଁ ଦେଖ୍ବାକେ ମିଲିଛେ କଳାହାଣ୍ଡି ଜିଲା ଧର୍ମଗଡ଼ ବ୍ଲକ ପର୍ଲା ଗଁାରେ।
ସୂଚନା ଅନ୍ସାରେ ପର୍ଲା ଗଁାର ବୁରୁଧ୍ ରାଏଧର ମୁଣ୍ଡା(୬୦)। ପରିବାର କହେଲେ ମାଏକିନା ଆର ଦୁଇ ପୁଓକୁଁ ନେଇ ସଁସାର। ପରିବାରର ସଭେ କୁଲିମଜୁରି କରି ଦୁଇ ପଏସା ରୁଜଗାର କରୁଥିଲାବେଲେ ରାଏଧର ନିଜର ବାପ୍ ଅଜାରନୁ ଶିଖିଥିବାର କୁଲବୁରତିକେ ବଁଚେଇ ରଖିଛନ୍। ସଖାଲ ପାଏଲେ ସେ ସାଲରେ ନିଅଁାର ସଂଗେ ଯୁଝି ଲୁକ୍କର ମନପସନର ଲୁହା ସାମାନ ତିଆରୁଛନ୍। ରାଏଧରକଁର ଜମିବାଡ଼ି ବଲି କିଛି ନାଇଁ। ପେଟ୍ ପାଲବାର ଲାଗି କୁଲବୁରତି ନ ଏକା ସାହାଭରସା। ଝାଟିମାଟିର ଗୁଟେ କୁରିଆରେ ପଲିଥିନ୍ ଢାପି କୁଟୁମବସିଆ ମୁଡ଼ ଗୁଁଜିଛନ୍। ସରକାରୀ ଯୋଜନା କହେଲେ ରାଶନକାର୍ଡରେ ମାସିକ ମିଲୁଥିବାର ୨୦ କେ.ଜି. ଚାଉଲ। ଇତାର ବାହାରେ ପରିବାରଟା ସବୁ ପରକାର ସରକାରୀ ସୁବିଧା ସୁଯୋଗରୁ ବଁଚିତ୍ ଥିବାର କହିଛନ୍। ଭତା ଆର ସରକାରୀ ଯୋଜନାରେ ଘରଖଁଡ଼େ ପାଏବାର ଲାଗି ସରପଁଚ୍ନୁ ଥାନୀଅ ପରଶାସନକେ ଗୁହାରି କରି ନିରାଶ ହେଇଥିବାର କହିଛନ୍ ରାଏଧର। ଇଆଡ଼େ ଦିନୁଦିନ୍କେ ପରିବାର ବଢ଼ୁଛେ। ରାଏଧର ଦୁଖ୍ସୁଖ କରି ଦୁଇପୁଓକୁ ବିହାଚୁରା କରିଛନ୍। ଏହେଦେ ସେମାନେ ତାକର ପରିବାରକେ ନେଇ ଚଲୁଛନ୍। ଏନ୍ତାଥି ରାଏଧର ଲୁହୁରା ସାଲୁ ଫିଦିନ ଯାହା କମାନି କରୁଛନ୍ ସେଥ୍ରେ ଦମ୍ପତି ବଡ଼ା କଷ୍ଟେ ଚଲୁଛନ୍। ଇ ଗରିବ୍ ବୁରୁଧ୍ ଦମ୍ପତିକଁର ଉପରେ ଥାନୀଅ ପରଶାସନ ଦୁରୁଷ୍ଟି ଦେଇ ଭତା ଆର ଆବାସ ଯୋଜନାରେ ଘରଖଁଡ଼େ ଯୁଗେଇ ଦେବାକେ ଗଁାବାସୀ ଦାବି କରିଛନ୍। ଇ ବାବ୍ଦେ ଧର୍ମଗଡ଼ ବିଡିଓ ଗୋପାଳ କୃଷ୍ଣ ମିଶ୍ରକୁଁ ପଚ୍ରାଲାରୁ ଲିଖିତ ଦରଖାସ୍ତ ଖଁଡ଼େ ମୋତେ ଦେଲେ ପଦକ୍ଷେପ ନିଆଯିବା ବଲି ସେ କହିଥିଲେ।
