ପୁରୀ ଅଫିସ,୨୪ା୧:ଶ୍ରୀମନ୍ଦିର ଭିତରକୁ ଯାଉଛି ବାହାର ଅଙ୍ଗାର। ଏହି ଅଙ୍ଗାରରେ ରୋଷଘରେ ପ୍ରସ୍ତୁତ ହେଉଛି ମହାପ୍ରସାଦ। ଏ ନେଇ ଗତ ଡିସେମ୍ବର ୧୮ତାରିଖ ଛତିଶା ନିଯୋଗ ବୈଠକରେ ଅଭିଯୋଗ ଉଠିଥିଲା। ପରବର୍ତ୍ତୀ ସମୟରେ ଏହାକୁ ସୁଆର ସେବକ ଏବଂ ଶ୍ରୀମନ୍ଦିର ପ୍ରଶାସନ ଏଡ଼ାଇ ଦେଇଥିଲେ। ଏଥିରେ କୌଣସି ସତ୍ୟତା ନାହିଁ ବୋଲି କୁହାଯାଇଥିଲା। କିନ୍ତୁ ଅଙ୍ଗାର ବ୍ୟବସାୟ କରୁଥିବା ଜଣେ ମହିଳା ଶ୍ରୀମନ୍ଦିରକୁ ପ୍ରତ୍ୟେକ ଦିନ ୩୦ରୁ ୪୦ ବସ୍ତା ଅଙ୍ଗାର ଯାଉଥିବା ଗଣମାଧ୍ୟମ ଆଗରେ କହିବା ପରେ ଏବେ ମହାପ୍ରସାଦ ପ୍ରସ୍ତୁତିରେ ବ୍ୟବହାର କରାଯାଉଥିବା ଚାଉଳ ଏବଂ ପନିପରିବା ମାନକୁ ନେଇ ଅଭିଯୋଗ କରିଛନ୍ତି ଜଣେ ସେବକ। ତେବେ ଏହି ସବୁ ଅଭିଯୋଗକୁ ଗୁରୁବାର ଖଣ୍ଡନ କରିଛି ସୁଆର ମହାସୁଆର ନିଯୋଗ। ତେଣୁ ଏଠି ପ୍ରଶ୍ନ ଉଠୁଛି ସତ କହୁଛି କିଏ? କାହିଁକି ମହାପ୍ରଭୁଙ୍କ ମହାପ୍ରସାଦ ପ୍ରତି ଏଭଳି ଧାରଣା ସୃଷ୍ଟି କରାଯାଉଛି? ବ୍ୟବସାୟିକ ଅଭିସନ୍ଧି ରଖି ଯଦି କେହି ବି କିଛି କହୁଥାନ୍ତି ତେବେ ଏହା ନିଶ୍ଚିତ ସାଂଘାତିକ। କାରଣ ମହାପ୍ରଭୁଙ୍କ ମହାପ୍ରସାଦ ପ୍ରତି କୋଟି କୋଟି ଭକ୍ତଙ୍କ ପ୍ରଗାଢ ଭକ୍ତି ରହିଛି। ଅଙ୍ଗାର ପ୍ରସଙ୍ଗ ସତ ହେଉ କି ମିଛ ଏହାଦ୍ୱାରା ଭକ୍ତଙ୍କ ବିଶ୍ୱାସ ସହ ଖେଳ ଖେଳାଯାଉଛି। ଏଭଳି ସ୍ପର୍ଶକାତର ପ୍ରସଙ୍ଗରେ ମନ୍ଦିର ପ୍ରଶାସନ ହସ୍ତକ୍ଷେପ କରି ଏହାର ସତ୍ୟାସତ୍ୟ ସ୍ପଷ୍ଟ କରିବା ଦରକାର। ଯେଉଁମାନେ ଏଭଳି କରୁଛନ୍ତି ତାଙ୍କ ବିରୋଧରେ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରିବା ଆବଶ୍ୟକ ବୋଲି ଶ୍ରଦ୍ଧାଳୁ କହିଛନ୍ତି।
ଡିସେମ୍ବର ୧୮ ତାରିଖରେ ଛତିଶା ନିଯୋଗ ବୈଠକରେ ଜଣେ ସେବକ ବାହାର ଅଙ୍ଗାର ଶ୍ରୀମନ୍ଦିର ଭିତରକୁ ଯାଉଥିବା ନେଇ ଅଭିଯୋଗ ଉଠାଇଥିଲେ। ଏହାକୁ ଅନ୍ୟ ସେବକମାନେ ବିରୋଧ କରିଥିଲେ। ପରେ ଏହି ପ୍ରସଙ୍ଗ ଶିଥିଳ ପଡ଼ିଯାଇଥିଲା। ବୁଧବାର ଦକ୍ଷିଣ ପାର୍ଶ୍ୱ ମଠ ଉଚ୍ଛେଦ କରାଯାଉଥିଲା। ଏହି ମଠରେ ଅଙ୍ଗାର ବ୍ୟବସାୟ କରୁଥିବା ଜଣେ ମହିଳା କହିଥିଲେ, ପ୍ରତିଦିନ ରୋଷଘରକୁ ଖଜାଭାଟିର ଅଙ୍ଗାର ଯାଉଛି। ସେହିପରି ସୁଆର ମହାସୁଆର ନିଯୋଗର ପୂର୍ବତନ ସହସମ୍ପାଦକ ନାରାୟଣ ମହାପାତ୍ର ଏହାକୁ ସ୍ବୀକାର କରିବା ସହ କହିଛନ୍ତି, ଏହା ଏବେର ନୁହେଁ ୮୦ ଦଶକରୁ ଏହି ଦ୍ୱନ୍ଦ୍ୱ ଉଠିଲାଣି। ଯେତିକି ଅଙ୍ଗାର ଦରକାର ତାହା ରୋଷଘରେ ପର୍ଯ୍ୟାପ୍ତ ହେଉନାହିଁ। ତେଣୁ ବାହାର ଖଜା ଭାଟି ଅଙ୍ଗାର ଅଣାଯାଉଛି। କିନ୍ତୁ ଏପରି ହେବା କଥା ନୁହେଁ। କେବଳ ଅଙ୍ଗାର ନୁହେଁ ମହାପ୍ରସାଦ ପ୍ରସ୍ତୁତ ହେଉଥିବା ଚାଉଳ ଏବଂ ପନିପରିବାର ମାନ ଠିକ୍ ରହୁନାହିଁ। ଏପରି କି ତେଲ ବ୍ୟବହାର କରାଯାଉଛି। ଏ ବିଷୟରେ ମନ୍ଦିର ପ୍ରଶାସନ ଅବଗତ ଥାଇ ମଧ୍ୟ କୌଣସି ପଦକ୍ଷେପ ନେଉ ନ ଥିବା ମହାପାତ୍ର ଅଭିଯୋଗ କରିବା ସହ ଏଥିପାଇଁ ସେ ବ୍ୟକ୍ତିଗତ ଭାବେ ହାଇକୋର୍ଟଙ୍କ ଦ୍ୱାରସ୍ଥ ହେବେ ବୋଲି କହିଛନ୍ତି। ଏହିସବୁ ଅଭିଯୋଗକୁ ସୁଆର ମହାସୁଆର ନିଯୋଗ ପକ୍ଷରୁ ଖଣ୍ଡନ କରାଯାଇଛି। ମହାପ୍ରସାଦ ପ୍ରସ୍ତୁତିରେ କ୍ବାଲିଟି ଚାଉଳ, ଭଲ ପନିପରିବା ଓ ଘିଅ ବ୍ୟବହାର କରାଯାଉଛି ବୋଲି ନିଯୋଗ ସମ୍ପାଦକ ଗଣମାଧ୍ୟମ ଆଗରେ କହିଛନ୍ତି।
ଅନ୍ୟପକ୍ଷରେ ମହାପ୍ରଭୁଙ୍କ ମହାପ୍ରସାଦକୁ ନେଇ ଏଭଳି ଅଭିଯୋଗ ଉଠିବା ପରେ ବିବ୍ରତ ହୋଇପଡ଼ିିଛନ୍ତି ଭକ୍ତ। ବାଲେଶ୍ୱରର ସମ୍ବିତ ମହାନ୍ତି କହିଛନ୍ତି, ଏହି ଯେଉଁ ଅଭିଯୋଗ ଉଠୁଛି ସେଥିରେ ସତ୍ୟତା ଥାଉ କି ନ ଥାଉ ଏହାଦ୍ୱାରା ଭକ୍ତଙ୍କ ବିଶ୍ୱାସ ସହ ଖେଳ ଖେଳାଯାଉଛି। ମହାପ୍ରସାଦ ପ୍ରତି ସମସ୍ତଙ୍କ ଆସ୍ଥା ଓ ବିଶ୍ୱାସ ରହିଛି। ତେଣୁ ଏହାର ପବିତ୍ରତା ରକ୍ଷା କରାଯିବା ଦରକାର। ବାହାର ଅଙ୍ଗାରରେ ରୋଷଘରେ ମହାପ୍ରସାଦ ପ୍ରସ୍ତୁତି ହେଉଥିଲେ ଏହା ସାଂଘାତିକ କଥା। ଶ୍ରୀମନ୍ଦିର ପ୍ରଶାସନ ଏହାକୁ ଗୁରୁତର ସହ ନେବା ଦରକାର। ଯଦି ଏଥିରେ ସତ୍ୟତା ଥାଏ ତେବେ ବାହାରୁ ଅଙ୍ଗାର କିପରି ମନ୍ଦିର ଭିତରକୁ ଯାଉଛି, ସୁରକ୍ଷା କର୍ମୀମାନେ କରୁଛନ୍ତି କ’ଣ ବୋଲି ପ୍ରଶ୍ନ କରିଛନ୍ତି ସମ୍ବିତ୍। ତେବେ ଏ ସଂକ୍ରାନ୍ତରେ ଶ୍ରୀମନ୍ଦିର ପ୍ରଶାସନର କୌଣସି ପ୍ରତିକ୍ରିୟା ମିଳିପାରି ନାହିଁ।
