ନୂଆଦିଲ୍ଲୀ,୨୯।୫(ପି.ଟି.): କୋଭିଡ୍-୧୯ ମହାମାରୀ କାରଣରୁ ବ୍ୟାଡ୍ମିଣ୍ଟନ ବିଶ୍ୱ ଜୁନିୟର ଚାମ୍ପିୟନଶିପ୍ର କାର୍ଯ୍ୟସୂଚୀ ମଧ୍ୟ ପ୍ରଭାବିତ ହୋଇଛି। ନ୍ୟୁଜିଲାଣ୍ଡର ଅକ୍ଲାଣ୍ଡରେ ଆଗାମୀ ସେପ୍ଟେମ୍ବରରେ ଏହି ମେଗା ଇଭେଣ୍ଟ ଆୟୋଜନ ହେବାର କାର୍ଯ୍ୟକ୍ରମ ଥିଲା। ତେବେ ଶୁକ୍ରବାର ଏହାର କାର୍ଯ୍ୟକ୍ରମ ପୁନଃ ନିର୍ଦ୍ଧାରିତ ହୋଇଛି। ଏବେ ଏହି ଚାମ୍ପିୟନଶିପ୍କୁ ଆସନ୍ତାବର୍ଷ ଜାନୁୟାରୀରେ ଆୟୋଜନ କରିବାକୁ ନିଷ୍ପତ୍ତି ନିଆଯାଇଛି। ଜାନୁୟାରୀ ୧୮ରୁ ୨୪ ତାରିଖ ମଧ୍ୟରେ ବିଶ୍ୱ ଜୁନିୟର ଚାମ୍ପିୟନଶିପ୍ ଆୟୋଜନ ହେବ ବୋଲି ବ୍ୟାଡ୍ମିଣ୍ଟନ ଓ୍ବାଲର୍ଡ ଫେଡେରେଶନ (ବିଡବ୍ଲ୍ୟୁଏଫ୍) ସୂଚନା ଦେଇଛି।
ସେହିପରି ଏହା ପୂର୍ବରୁ ବିଶ୍ୱ ଜୁନିୟର ମିକ୍ସଡ ଟିମ୍ ଚାମ୍ପିୟନଶିପ୍କୁ ମଧ୍ୟ ନୂଆ କାର୍ଯ୍ୟସୂଚୀ ଅନୁଯାୟୀ ଜାନୁୟାରୀ ୧୧ରୁ ୧୬ ତାରିଖ ମଧ୍ୟରେ ଖେଳାଯିବ ବୋଲି ବିଡବ୍ଲ୍ୟୁଏଫ୍ କହିଛି। ନୂଆ କାର୍ଯ୍ୟସୂଚୀ ଘୋଷଣା ହୋଇଥିବାରୁ ବିଡବ୍ଲ୍ୟୁଏଫ୍ ଓ ବ୍ୟାଡମିଣ୍ଟନ ନ୍ୟୁଜିଲାଣ୍ଡ ଟୁର୍ନାମେଣ୍ଟର ସଫଳ ଆୟୋଜନ ପାଇଁ ପର୍ଯ୍ୟାପ୍ତ ସମୟ ଓ ସୁବିଧା ପାଇବେ। ଫଳରେ ବହୁ ସଂଖ୍ୟାରେ ଜୁନିୟର ଖେଳାଳି ଅକ୍ଲାଣ୍ଡ ଆସି ଏହି ଚାମ୍ପିୟନଶିପ୍ରେ ଯୋଗଦେବେ ବୋଲି ଆଶା କରାଯାଉଛି। କରୋନା ଭାଇରସ୍ ସଂକ୍ରମଣ କାରଣରୁ ଆମକୁ ଏପରି ନିଷ୍ପତ୍ତି ନେବାକୁ ହେଲା ବୋଲି ବିଡବ୍ଲ୍ୟୁଏଫ୍ ସାଧାରଣ ସମ୍ପାଦକ ଥୋମା ଲୁଣ୍ଡ କହିଛନ୍ତି। ଟୁର୍ନାମେଣ୍ଟ ଆୟୋଜନ ନେଇ ବ୍ୟାଡ୍ମିଣ୍ଟନ ନ୍ୟୁଜିଲାଣ୍ଡ ସହ କାର୍ଯ୍ୟ କରିବାକୁ ଆମେ ପ୍ରସ୍ତୁତ ବୋଲି ସେ କହିଛନ୍ତି।
ଏହି ଚାମ୍ପିୟନଶିପ୍ରୁ ଏକାଧିକ ବିଶ୍ୱସ୍ତରୀୟ ବ୍ୟାଡ୍ମିଣ୍ଟନ ତାରକା ସୃଷ୍ଟି ହୋଇଛନ୍ତି। ଲଣ୍ଡନ ଅଲିମ୍ପିକ୍ସ ବ୍ରୋଞ୍ଜ ପଦକ ବିଜୟିନୀ ସାଇନା ନେହ୍ବାଲ ଭାରତର ଏକମାତ୍ର ଖେଳାଳିଭାବେ ୨୦୦୮ରେ ପୁଣେରେ ଅନୁଷ୍ଠିତ ବିଶ୍ୱ ଜୁନିୟର ଚାମ୍ପିୟନଶିପ୍ରେ ଟାଇଟଲ ହାସଲ କରିଥିଲେ। ବାଳକ ବିଭାଗରେ ସିରିଲ ବର୍ମା ୨୦୧୫ରେ ରୌପ୍ୟ, ବି ସାଇ ପ୍ରଣୀଥ ଓ ଏଚ୍.ଏସ୍. ପ୍ରଣୟ ୨୦୧୦ରେ ବ୍ରୋଞ୍ଜ୍ ପଦକ ହାସଲ କରିଥିଲେ। ସେହିପରି ଆର.ଏମ୍. ଭି. ଗୁରୁସାଇଦତ୍ତ ଓ ସମୀର ବର୍ମା ୨୦୦୮ ଓ ୨୦୧୧ରେ ବ୍ରୋଞ୍ଜ୍ ପଦକ ଜିତିଥିଲେ। କନାଡ଼ାରେ ଅନୁଷ୍ଠିତ ୨୦୧୮ ସଂସ୍କରଣରେ ଲକ୍ଷ୍ୟ ସେନ୍ ବ୍ରୋଞ୍ଜ୍ ପଦକ ହାସଲ କରିଥିଲେ। ପୂର୍ବରୁ ୨୦୨୦ ସେସନର ବାକିଥିବା ପ୍ରତିଯୋଗିତାଗୁଡିକ ପାଇଁ ବିଡ଼ବ୍ଲ୍ୟୁଏଫ୍ ପରିବର୍ତ୍ତିତ ନୂଆ କ୍ୟାଲେଣ୍ଡର ଜାରି କରିଛି। ଏଥିସହିତ ଆସନ୍ତାବର୍ଷ ଆୟୋଜନ ହେବାକୁଥିବା ଟୋକିଓ ଅଲିମ୍ପିକ୍ସର କ୍ୱାଲିଫିକେଶନ ପିରିୟଡକୁ ବୃଦ୍ଧି କରିଛି।
