‘କ୍ୟାନ୍ସର : ନୋ ଆନ୍ସର’ ବୋଲି ଅନେକଙ୍କ ମନରେ ଧାରଣା ରହିଛି। ହେଲେ ପ୍ରାରମ୍ଭିକ ସ୍ତରରେ ଏହା ଚିହ୍ନଟ ହୋଇ ଉପଯୁକ୍ତ ଚିକିତ୍ସା କରାଯାଇପାରିଲେ କେତେକ କ୍ଷେତ୍ରରେ କ୍ୟାନ୍ସରରୁ ଆରୋଗ୍ୟ ମିଳିବାର ଉଦାହରଣ ରହିଛି। ହେଲେ ଏହା ଯଦି ଗୁରୁତର ଅବସ୍ଥାରେ ଚିହ୍ନଟ କରାଯାଏ, ତେବେ ତାହା ଅକାଳ ମୃତ୍ୟୁକୁ ଡାକିଆଣିଥାଏ। ଆଜିକାଲି ବ୍ଲଡ୍ କ୍ୟାନ୍ସର (ରକ୍ତ କର୍କଟ) ରୋଗୀଙ୍କ ସଂଖ୍ୟା ବଢ଼ିଚାଲିଛି। ଏହାର କାରଣ ସମ୍ପର୍କରେ ଆମେ ନିଶ୍ଚୟ ଅବଗତ ହେବା ଦରକାର। ଏହି ରୋଗ ଦ୍ୱାରା ଆକ୍ରାନ୍ତ ହେଲେ ପ୍ରଥମେ ଜ୍ୱର ଲାଗି ରହିଥାଏ। ଆନେମିଆ ସମସ୍ୟା ମଧ୍ୟ ଦେଖାଦିଏ। ଅଳ୍ପ କାମ କରିବା ପରେ ହାଲିଆ ଲାଗେ। ଅଧିକାଂଶ ସମୟ ଶରୀରରେ ଦୁର୍ବଳତା ଅନୁଭବ ହୋଇଥାଏ। ଗଳା କିମ୍ବା କାଖ ତଳେ ହାଲୁକା ଦରଜ ଅନୁଭୂତ ହୋଇଥାଏ। ଛାତିରେ ଜ୍ୱଳନ ହୁଏ। ଶରୀରରେ ହାଲକା ଆଘାତ ଲାଗିବା ମାତ୍ରେ ରକ୍ତ କ୍ଷରଣ ହୁଏ। କେବଳ ନାକରୁ ନୁହେଁ ପରସ୍ରା କରିବା ସମୟରେ ରକ୍ତ ପଡ଼ିଥାଏ। ଭୋକ କମ୍ ଲାଗେ। ତା’ସହ ହଠାତ୍ ଓଜନ କମି କମି ଯାଏ। ଏପରି କ୍ୟାନ୍ସରର ଅନ୍ୟ ପ୍ରମୁଖ ଲକ୍ଷଣ ହେଲା, ଶରୀରରେ ଇନ୍ଫେକଶନ ଲାଗି ରହିଥାଏ। ଯଦି ଆପଣଙ୍କ ଶରୀରରେ ବାରମ୍ବାର ଇନ୍ଫେକଶନ ଲାଗି ରହୁଛି, ତେବେ ବିଳମ୍ବ ନ କରି ତୁରନ୍ତ ଡାକ୍ତରଙ୍କ ସହ ପରାମର୍ଶ କରନ୍ତୁ। ଅସ୍ଥିରେ ଏବଂ ଗଳଗଣ୍ଠିରେ ଦରଜ ଅନୁଭୂତ ହୁଏ। ତେବେ ଏପରି ଲକ୍ଷଣ ଦେଖାଦେବା ମାତ୍ରେ ଅଭିଜ୍ଞ କ୍ୟାନ୍ସର ବିଶେଷଜ୍ଞଙ୍କ ନିକଟକୁ ଯାଇ ପରାମର୍ଶ କରିବାକୁ ଭୁଲନ୍ତୁ ନାହିଁ।
