ବାସୁଦେବପୁର, ୨ା୬(ଡି.ଏନ.ଏ.)-ମହାମାରୀ କରୋନା ପାଇଁ ରାଜ୍ୟ ସରକାରଙ୍କ ଦ୍ୱାରା ଘୋଷଣା କରାଯାଇଥିବା ଲକ୍ଡାଉନ ପାଇଁ ଶ୍ରମିକ ଓ ଗରିବ ଲୋକମାନେ ହଇରାଣ ହରକତ ହେଉଥିବା ସହ ବିଭିନ୍ନ ସରକାରୀ ସହାୟତା ଠିକ୍ ଭାବେ ଲୋକଙ୍କ ପାଖରେ ପହଞ୍ଚତ୍ପାରୁନାହିଁ। ଫଳରେ ସେମାନଙ୍କ ପରିବାର ପ୍ରତିପୋଷଣ ପାଇଁ ସେମାନେ ହରକତ ହେଉଛନ୍ତି। କୌଣସି ପକ୍ଷପାତିତା ନ କରି ସରକାରୀ ସହାୟତା ଲୋକଙ୍କୁ ଠିକ୍ ଭାବେ ପ୍ରଦାନ ପାଇଁ ବିଡିଓଙ୍କୁ କଂଗ୍ରେସ ଦଳ ପକ୍ଷରୁ ଏକ ଦାବିପତ୍ର ସୋମବାର ପ୍ରଦାନ କରାଯାଇଛି। କିରୋସିନ ଧାର୍ଯ୍ୟଦରଠାରୁ ଅଧିକ ବିକ୍ରି ହେବା, ଚାଉଳ, ଗହମର ପରିମାଣ କମ୍ ପ୍ରଦାନ କରାଯିବା, ରାଶନକାର୍ଡ଼ ପ୍ରସ୍ତୁତିରେ ଜାଲିଆତି, ଠିକ୍ ସମୟରେ ସୂଚନା ଆଇନର ତଥ୍ୟ ବ୍ଲକରୁ ନ ମିଳିବା, ବିଭିନ୍ନ କରୋନା ସେଣ୍ଟରରେ ଅବ୍ୟବସ୍ଥା, ଅମ୍ଫନ୍ ବାତ୍ୟା ପ୍ରଭାବରେ କ୍ଷୟକ୍ଷତିର ସଠିକ୍ ଆକଳନ କରି ସହାୟତା ପ୍ରଦାନ, ବିନା ସୂଚନା ଫଳକରେ ଏମ୍ଜିଏନ୍ଆର୍ଇଜିଏସ୍ରେ ମେଶିନ ଲଗାଇ ରାତିଅଧିଆ ସରକାରୀ କାର୍ଯ୍ୟ କରିବା ଭଳି ସମସ୍ୟା ସମ୍ପର୍କରେ କଂଗ୍ରେସର ପ୍ରତିନିଧି ଦଳ ବିଡିଓଙ୍କ ଦୃଷ୍ଟି ଆକର୍ଷଣ କରିଛନ୍ତି। ବ୍ଲକ କଂଗ୍ରେସ ସଭାପତି ରମେଶ ଚନ୍ଦ୍ର ବଳ, ଜିଲା କଂଗ୍ରେସ ସଭାପତି ଅଶୋକ କୁମାର ଦାସ, ପୂର୍ବତନ ଜିଲା ପରିଷଦ ସଭ୍ୟ ପ୍ରଭାତ ବାରିକ ପ୍ରମୁଖ ଏକ ଦାବିପତ୍ର ବିଡିଓ ପ୍ରଣବ କୁମାର ବେହେରାଙ୍କୁ ପ୍ରଦାନ କରିଥିବା ବେଳେ ଏହି ସମସ୍ୟା ବାବଦରେ ସେ ଧ୍ୟାନ ଦେବେ ବୋଲି ବିଡିଓ ପ୍ରତିଶ୍ରୁତି ଦେଇଛନ୍ତି।
