ଜଳେଶ୍ୱର, ୨୦।୭(ଡି.ଏନ.ଏ.)-ବେଆଇନ ଗୋରୁ ବୋଝେଇ ଏକ ପିକ୍ଅପ୍ ଭ୍ୟାନ୍କୁ ସୋମବାର ବିଳମ୍ବିତ ରାତିରେ ଜଳେଶ୍ୱରସ୍ଥିତ ବଜରଙ୍ଗ ଦଳର କର୍ମକର୍ତ୍ତା ଓ ଜନସାଧାରଣ ଅଟକାଇ ଜଳେଶ୍ୱର ପୋଲିସକୁ ହସ୍ତାନ୍ତର କରିଥିଲେ। ପୋଲିସ ଉକ୍ତ ପିକ୍ଅପ୍ରେ ଅତି ଦୟନୀୟ ଅବସ୍ଥାରେ ଥିବା ୨୪ଟି ଗୋରୁ ଉଦ୍ଧାର କରି ସହରର ଶାନ୍ତିଆସ୍ଥିତ ଷ୍ଟାଡ଼ିୟମ ପରିସରରେ ସ୍ଥାନୀୟ ଗ୍ରାମବାସୀଙ୍କ ସହଯୋଗରେ ରଖିଥିଲେ। ଏହି ଘଟଣାକୁ ନେଇ ପୋଲିସ ଏକ ମାମଲା (ନଂ.୧୬୩/୧୯) ରୁଜୁ କରିଥିଲା। ଗୁରୁବାର ପୋଲିସ ଉକ୍ତ ଗୋରୁଙ୍କୁ ବିନା କୋର୍ଟ ଆଦେଶରେ ତରବରିଆ ଭାବେ ସ୍ଥାନୀୟ ଗ୍ରାମବାସୀଙ୍କ ଅଜାଣତରେ ଗୋଶାଳାକୁ ନ ପଠାଇ ଶାନ୍ତିଆ, ମହମ୍ମଦନଗର ପାଟଣା, ଗୋବରଘାଟା, ଗୋପ, ସାହାଡ଼ାପଡ଼ା ଆଦି ଗ୍ରାମର ଲୋକମାନଙ୍କୁ ହସ୍ତାନ୍ତର କରିଥିଲା। ଯାହାକୁ ନେଇ ଶୁକ୍ରବାର ଅପରାହ୍ନରେ ଜଳେଶ୍ୱର ବଜରଙ୍ଗ ଦଳ ତରଫରୁ ଏକ ଖବରଦାତା ସମ୍ମିଳନୀ ଷ୍ଟେଶନବଜାରସ୍ଥିତ ଏକ ହୋଟେଲରେ ଅନୁଷ୍ଠିତ ହୋଇଥିଲା। ସମ୍ମିଳନୀରେ ବଜରଙ୍ଗ ଦଳର ଜଳେଶ୍ୱର ସଂଯୋଜକ ପବନ କୁମାର ସାହୁ, ସଦସ୍ୟ କାଳିଚରଣ ରାଜ, ତାପସ କର୍ମକାର, ସପନ କର୍ମକାର, ଅଞ୍ଜନ ଦାସ, ସତ୍ୟବ୍ରତ ପଣ୍ଡା, ଜୟଶଙ୍କର ବେହେରା ଓ ଅନ୍ୟ କର୍ମକର୍ତ୍ତା ପୋଲିସ ସନ୍ଦେହଜନକ କାର୍ଯ୍ୟଶୈଳୀ ଉପରେ ଘୋର ଆପତ୍ତି ଉଠାଇଛନ୍ତି। ଜଳେଶ୍ୱର ପୋଲିସ ଗୋରୁ ମାଫିଆଙ୍କ ସହିତ ଭାଗବଣ୍ଟା କରି ଚାଷୀ ଭାବେ କେତେକ ଗୋଚାଲାଣକାରୀଙ୍କୁ ଚଞ୍ଚକତାପୂର୍ଣ୍ଣ ଭାବେ ଉକ୍ତ ଗୋରୁକୁ ହସ୍ତାନ୍ତର କରିଛନ୍ତି ବୋଲି ଅଭିଯୋଗ ଉଠାଇଛନ୍ତି। ଉଦ୍ଧାର କରାଯାଇଥିବା ଗୋରୁକୁ ଗୋଶାଳାକୁ ପଠାଇବାର ବନ୍ଦୋବସ୍ତ ନ କଲେ ବଜରଙ୍ଗ ଦଳ ରାଜରାସ୍ତାକୁ ଓହ୍ଲାଇବ ବୋଲି ଚେତାବନୀ ଦେଇଛନ୍ତି। ଉଲ୍ଲେଖଯୋଗ୍ୟ ଯେ, ଗୁରୁବାର ଉକ୍ତ ଗୋରୁଗୁଡ଼ିକୁ ବେଆଇନ ଭାବେ ହସ୍ତାନ୍ତରକୁ ନେଇ ଶାନ୍ତିଆ ଗ୍ରାମର ଶତାଧିକ ମହିଳା ଜଳେଶ୍ୱର ପୋଲିସର ଅଧିକାରୀ ଓ କର୍ମଚାରୀଙ୍କୁ ଘଣ୍ଟାଧିକାଳ ଅଟକ ରଖି ଗୋରୁଗୁଡ଼ିକୁ ଫେରାଇ ଆଣିବା ପାଇଁ ଦାବି କରିଥିଲେ।
