ପାଟଣା,୧୩।୯(ସ୍ବ.ପ୍ର.)-କେନ୍ଦୁଝର ଜିଲା ପାଟଣା ବ୍ଲକ ପଲାଣିଘାଟି ପଞ୍ଚାୟତ ଗୁଧିରାମ ପଡା ଗ୍ରାମରେ ଗତ ଶନିବାର ବିଳମ୍ବିତ ରାତିରେ ବୃଦ୍ଧ ଦମ୍ପତି ରାମାଇ ମୁଣ୍ଡା ଓ ତାଙ୍କ ସ୍ତ୍ରୀ ଚମ୍ପା ମୁଣ୍ଡାଙ୍କୁ ପଥରରେ ଛେଚି ହତ୍ୟା କରାଯାଇଥିଲା ା ଏହି ଘଟଣାର ମୁଖ୍ୟ ଅଭିଯୁକ୍ତଙ୍କୁ ଗୁରୁବାର ଘଟଗାଁ ପୋଲିସ ଗିରଫ କରି କୋର୍ଟ ଚାଲାଣ କରିଛି। ସେ ହେଲେ ପାଟଣା ଥାନା ସରାସ କୋଲା ପଞ୍ଚାୟତ ଖମୁଆଁ ଗ୍ରାମ କୁସୁମପଶି ସାହିର ଦନାର ମୁଣ୍ଡା। ଏନେଇ ଘଟଗାଁ ଥାନାରେ ଏକ ହତ୍ୟା ମାମଲା (ନଂ.୧୧୫/୧୯) ରୁଜୁ ହୋଇଛି ା ପୋଲିସ ତନାଘନା ଚଳାଇଛି ା
ପୋଲିସ ସୂଚନା ଅନୁଯାୟୀ ରାମାଇଙ୍କ ଦ୍ୱିତୀୟ ଝିଅ କାଂଶଲା ମହୁଲଡିହା ଗ୍ରାମ ଦଲକୀ ସାହିର ମାଟାଇ ମୁଣ୍ଡାଙ୍କୁ ବିବାହ କରିଥିଲେ। ତାଙ୍କର ୪ ସନ୍ତାନ ଅଛନ୍ତି। କିନ୍ତୁ ଉପରୋକ୍ତ ଘଟଣା ଘଟିବାର ୨୫ଦିନ ପୂର୍ବରୁ କୁସୁମପଶି ସାହିର ରାଜମିସ୍ତ୍ରି ଦନାରଙ୍କ ସହ କାଂଶଲା କେଉଁ ଆଡ଼େ ଚାଲିଯାଇଥିଲେ। ତାଙ୍କର କୌଣସି ଖୋଜ୍ ଖବର ପରିବାର ଲୋକଙ୍କୁ ମିଳି ନ ଥିଲା ା ଦନାରଙ୍କ ପାଖରେ ୨୫ ଦିନ ରହିବା ପରେ କାଂଶଲା ତାଙ୍କ ପ୍ରଥମ ସ୍ବାମୀ ମାଟାଇଙ୍କ ପାଖକୁ ଫେରିବାକୁ ଚାହିଁଥିଲେ ା ଏହାକୁ ନେଇ ବିବାଦ ସୃଷ୍ଟି ହୋଇଥିଲା। ଏହି ପ୍ରସ୍ତାବରେ କାଂଶଲାଙ୍କ ମା’ବାପାଙ୍କ ସହ ଜ୍ୱାଇଁ ମାଟାଇ ମଧ୍ୟ ରାଜି ହୋଇ ନ ଥିଲେ। ଝିଅକୁ ଛାଡି ଦେଲେ ଦନାରଙ୍କୁ ଗୁଣିଗାରେଡି କରି ଜୀବନରୁ ମାରିଦେବି ବୋଲି ରାମାଇ ଧମକ ଦେଇଥିଲେ ା ଏହାପରେ ଦନାର ପ୍ରତିଶୋଧ ନେବାକୁ ଯୋଜନା ପ୍ରସ୍ତୁତ କରିଥିଲେ ା ଗତ ଶନିବାର ରାତିରେ ଦନାର ସ୍କୁଟିରେ ଘରୁ ଏକ ଘାନା(ବଡ଼ ପଥର) ନେଇ ଘଟଣାସ୍ଥଳକୁ ଯାଇଥିଲେ ା ସେତେବେଳେ ଘର ବାରଣ୍ଡାରେ ବୃଦ୍ଧ ଦମ୍ପତି ରାମାଇ ଓ ଚମ୍ପା ଶୋଇଥିଲେ ା ଏହାକୁ ସୁଯୋଗ ଭାବି ଦନାର ସେହି ପଥରରେ ବୁଦ୍ଧ ଦମ୍ପତିଙ୍କ ମୁଣ୍ଡକୁ ଛେଚି ହତ୍ୟା କରିଥିଲେ ା ଗିରଫ ପରେ ଦନାର ଏହି କଥାକୁ ପୋଲିସ ନିକଟରେ ସ୍ବୀକାର କରିଛନ୍ତି। ତଦନ୍ତକାରୀ ଥାନା ଅଧିକାରୀ ବନ୍ଦନା ପାତ୍ର ହତ୍ୟାକାଣ୍ଡରେ ବ୍ୟବହୃତ ଘାନା, ରକ୍ତ ଲଗା ପ୍ୟାଣ୍ଟ ଶାର୍ଟ ଓ ଏକ ସ୍କୁଟିକୁ ଜବତ କରିଛନ୍ତି। ହତ୍ୟାକାଣ୍ଡରେ ଆହୁରି ଅନେକ ବ୍ୟକ୍ତିଙ୍କ ସମ୍ପୃକ୍ତି ଥିବା ଅନୁମାନ କରି ଏସ୍ଡିପିଓ ରବୀନ୍ଦ୍ର ମଲିକ ତଦନ୍ତକୁ ବ୍ୟାପକ କରାଯିବ ବୋଲି କହିଛନ୍ତି।
