ମେଲବୋର୍ନ,୯।୨- କ୍ରିକେଟର ବହୁ କିମ୍ବଦନ୍ତୀ ପୂର୍ବତନ ଖେଳାଳି ଏକାଠି ହୋଇଥିଲେ। ରବିବାର ଜଙ୍କଶନ ଓଭାଲରେ ଅନୁଷ୍ଠିତ ବୁଶଫାୟାର ଚ୍ୟାରିଟି ମ୍ୟାଚ୍ରେ ପଣ୍ଟିଂ ଏକାଦଶ ୧ ରନ୍ରେ ଗିଲଖ୍ରିଷ୍ଟ ଏକାଦଶକୁ ହରାଇ ଦେଇଛି। କ୍ୟାରିୟରରେ ପ୍ରାୟତଃ ବୋଲିଂ କରି ନ ଥିବା ମାଥ୍ୟୁ ହେଡେନ ଖାଲି ପାଦରେ ବୋଲିଂ କରିବା ଉଲ୍ଲେଖନୀୟ ଘଟଣା ଥିଲା। ମ୍ୟାଚ୍ରୁ ଆୟ ୭୭ ନିୟୁତ ଅଷ୍ଟ୍ରେଲିଆନ ଡଲାର ଜଙ୍ଗଲରେ ନିଆଁ କ୍ଷୟକ୍ଷତି ପୂରଣ ପାଇଁ ରେଡକ୍ରସ ପାଣ୍ଠିକୁ ପ୍ରଦାନ କରାଯାଇଛି।
୧୦ ଓଭରିଆ ମ୍ୟାଚ୍ରେ ୧୦୫ ରନ୍ର ବିଜୟ ଲକ୍ଷ୍ୟର ପିଛା କରୁଥିବା ଗିଲଖ୍ରିଷ୍ଟ ଏକାଦଶ ପାଇଁ ଶେନ ଓ୍ବାଟଶନ(୩୦) ଓ ଆଡାମ ଗିଲଖ୍ରିଷ୍ଟ ୩ ଓଭରରେ ୪୯ ରନ୍ କରିଥିଲେ। ଚତୁର୍ଥ ଓଭରରେ ଲୁକ ହଜ ପ୍ରତିପକ୍ଷ ଦଳର ଅଧିନାୟକ ଗିଲଖ୍ରୀଷ୍ଟ (୧୭)ଙ୍କୁ ଆଉଟ୍ କରିଥିଲେ। ଫଳରେ ଯୁବରାଜ ସିଂ ଗ୍ରାଉଣ୍ଡକୁ ଓହ୍ଲାଇଥିଲେ। କିଛି ସମୟରେ ବ୍ରେଟ ଲି ପ୍ରତିପକ୍ଷ ବ୍ୟାଟ୍ସମ୍ୟାନ ବ୍ରାଡ ହଜ (୦) ଓ ଯୁବରାଜ (୨)ଙ୍କୁ ଆଉଟ୍ କରି ପ୍ୟାଭିଲିୟନ ପଠାଇଥିଲେ। ଏହାପରେ ଆଣ୍ଡ୍ର୍ୟୁ ସାଇମଣ୍ଡ୍ସ ୨୯ ରନ୍ର ଚିତାତ୍କର୍ଷକ ଇନିଂସ ଖେଳି ପିଚ୍ ଛାଡ଼ିଥିଲେ। କିନ୍ତୁ ପରେ କାମେରନ ସ୍ମିଥ (୫) ଓ ନିକ ରିଓ୍ବଲଟ (୯)ଙ୍କ ଯୋଗଦାନ ସତ୍ତ୍ୱେ ଦଳ ବିଜୟଲକ୍ଷ୍ୟଠାରୁ ଦୁଇ ରନ୍ ପଛରେ ପଡ଼ିଯାଇଥିଲା। ଗିଲଖ୍ରୀଷ୍ଟ ଏକାଦଶ ୧୦ଓଭରରେ ୬ ଉଇକେଟ ହରାଇ ୧୦୩ ରନ୍ କରିଥିଲା। ଏଥିପୂର୍ବରୁ ଆମନ୍ତ୍ରଣ ପାଇ ପ୍ରଥମେ ବ୍ୟାଟିଂ କରିଥିବା ପଣ୍ଟିଂ ଏକାଦଶ ଆରମ୍ଭରୁ ଜଷ୍ଟିନ ଲାଙ୍ଗର (୬)ଙ୍କ ଉଇକେଟ ହରାଇଥିଲା। ପରେ ମାଥ୍ୟୁ ହେଡେନ ଓ ରିକି ପଣ୍ଟିଂ ଦ୍ୱିତୀୟ ଉଇକେଟ ପାଇଁ ୨୯ ରନ୍ ଯୋଡ଼ିଥିଲେ। ହେଡେନ (୧୬)ଙ୍କୁ ୫ମ ଓଭରରେ ଆଉଟ୍ କରି ଭାରତୀୟ ଅଲରାଉଣ୍ଡର ଯୁବରାଜ ଦଳକୁ ଆବଶ୍ୟକୀୟ ବ୍ରେକ ଥ୍ରୁ ଯୋଗାଇଥିଲେ। ପରେ ପଣ୍ଟିଂ ୨୬ ଓ ବ୍ରାୟନ ଲାରା (୩୦)ଙ୍କ ଯୋଗୁ ଦଳ ୧୦ ଓଭରରେ ୫ ଉଇକେଟ ହରାଇ ୧୦୪ ରନ୍ କରିଥିଲା।
