ବୁଗୁଡ଼ା,୩ା୫(ଡି.ଏନ୍.ଏ.): ଗଞ୍ଜାମ ଜିଲା ବୁଗୁଡ଼ା ବ୍ଲକ ବିଭିନ୍ନ ପଞ୍ଚାୟତର କ୍ୱାରାଣ୍ଟାଇନ୍ ସେଣ୍ଟରରେ ରବିବାର ୩୫୦ରୁ ଅଧିକ ସୁରଟ ଫେରନ୍ତା ପହଞ୍ଚିବା ଜଣାପଡ଼ିଛି। ସେମାନେ ଶନିବାର ରାତିରେ ୭ଟି ବସ୍ରେ
ବାହାରିଥିଲେ। ପ୍ରଥମେ ବୁଗୁଡ଼ାରେ ପହଞ୍ଚିବା ପରେ ଗୋଟିଏ ବସ୍ର ୫୪ ପ୍ରବାସୀ ଓଡ଼ିଆଙ୍କୁ
ବୁଗୁଡା ଏନ୍ଏସି ଅନ୍ତର୍ଗତ ଶୋଭନୀୟ ପବ୍ଲିକ ସ୍କୁଲ ଏବଂ ବିରଞ୍ଚି ନାରାୟଣ ପବ୍ଲିକ ସ୍କୁଲରେ ରଖାଯାଇଥିବା ବେଳେ ଅନ୍ୟ ଏକ ବସ୍ରେ ଆସିଥିବା ପ୍ରାୟ ୬୦ଜଣଙ୍କୁ ବୁଗୁଡା ବ୍ଲକ ଅନ୍ତର୍ଗତ ଗୋଲିଆ ପଞ୍ଚାୟତର ଆଦର୍ଶ ବିଦ୍ୟାଳୟ ଏବଂ ଗୋଲିଆ ପ୍ରାଥମିକ ବିଦ୍ୟାଳୟରେ ରଖାଯାଇଥିବା ଜଣାପଡ଼ିଛି। ସେହିପରି
ରବିବାର ଅନ୍ୟ ୫ଟି ବସ୍ରେ ୨୫୦ରୁ ଅଧିକ ପ୍ରବାସୀ ବୁଗୁଡ଼ାରେ ପହଞ୍ଚିଥିଲେ। ସେମାନଙ୍କୁ ବାଲିପଦରଠାରୁ ବିଡିଓ ତନ୍ମୟ ପାତ୍ର, ତହସିଲଦାର ସଂଗ୍ରାମ କେଶରୀ ଜେନାଙ୍କ ତତ୍ତ୍ବାବଧାନରେ ପୋଲିସ ପ୍ରଶାସନର କଡ଼ା ସୁରକ୍ଷା ବ୍ୟବସ୍ଥାରେ ବୁଗୁଡ଼ାକୁ ଅଣାଯାଇଥିଲା। ପରେ ଗୋଟିଏ ବସ୍ର ପ୍ରବାସୀ ଓଡିଆଙ୍କୁ ବି. କରଡ଼ାବାଡ଼ି ଉଚ୍ଚ ବିଦ୍ୟାଳୟରେ ରଖାଯାଇଥିବା ବେଳେ ଅନ୍ୟ ୨ ବସ୍ରେ ଥିବା ପ୍ରବାସୀ ଓଡ଼ିଆଙ୍କୁ ସଙ୍କୁରୁ ପଞ୍ଚାୟତରେ ଥିବା କ୍ୱାରାଣ୍ଟାଇନ୍ ସେଣ୍ଟରରେ ଏବଂ ଅନ୍ୟ ୨ ବସ୍ରେ ଥିବା ପ୍ରବାସୀଙ୍କୁ କରଚୁଲୀ ପଞ୍ଚାୟତ ଏବଂ ଗୋଳାବନ୍ଧ ପଞ୍ଚାୟତର ବିଭିନ୍ନ ବିଦ୍ୟାଳୟରେ ରଖାଯାଇଥିଲା। ରବିବାର ସନ୍ଧ୍ୟା ସୁଦ୍ଧା ପୁଣି ଆଉ ୫ଟି ବସରେ ଆସୁଥିବା ପ୍ରବାସୀ ଓଡିଆଙ୍କୁ ବିଭିନ୍ନ ପଞ୍ଚାୟତର କ୍ୱାରାଣ୍ଟାଇନ୍ ସେଣ୍ଟରରେ ରଖିବା ପାଇଁ ପ୍ରଶାସନ ପ୍ରସ୍ତୁତ ହୋଇଥିବା ବିଡିଓ ତନ୍ମୟ ପାତ୍ର ପ୍ରକାଶ
କରିଛନ୍ତି ।
