ନୂଆଦିଲ୍ଲୀ,୨୫ା୭(ପି.ଟି.)- ଅନ୍ତର୍ଜାତୀୟ କ୍ରିକେଟ୍ ପରିଷଦ(ଆଇସିସି) ଟେଷ୍ଟ କ୍ରିକେଟକୁ ଅଧିକ ଲୋକପ୍ରିୟ କରିବା ଲାଗି ଆଗାମୀ ବିଶ୍ୱ ଟେଷ୍ଟ ଚାମ୍ପିୟନଶିପରେ ଖେଳାଳିଙ୍କ ନାମ ଓ ଜର୍ସି ନମ୍ବର ରହିବା ଲାଗି ନିଷ୍ପତ୍ତି ନେଇଛି। ଆସେସରୁ ଆରମ୍ଭ ହେବାକୁ ଥିବା ଏହି ଚାମ୍ପିୟନଶିପ ୨୦୨୧ ପର୍ଯ୍ୟନ୍ତ ଖେଳାଯିବ। ନିକଟରେ ଓ୍ବେଷ୍ଟଇଣ୍ଡିଜ ଗସ୍ତରେ ଯାଉଥିବା ଭାରତୀୟ ଦଳ ସେଠାରେ ଘରୋଇ ଦଳ ବିପକ୍ଷରେ ୨ଟି ଟେଷ୍ଟ ଖେଳିବ। ଭାରତୀୟ ଟେଷ୍ଟ ଦଳରେ ମହେନ୍ଦ୍ର ସିଂ ଧୋନୀ ନାହାନ୍ତି। ତେଣୁ ତାଙ୍କର ଜର୍ସି ନଂ-୭କୁ ନେଇ ଚର୍ଚ୍ଚା ଆରମ୍ଭ ହୋଇଛି। ଏହି ଚାମ୍ପିୟନଶିପ ଅନ୍ତର୍ଗତ ଭାରତ ଏହାର ପ୍ରଥମ ମ୍ୟାଚ ଆସନ୍ତା ଅଗଷ୍ଟ ୨୨ରେ ଓ୍ବେଷ୍ଟଇଣ୍ଡିଜ ବିରୋଧରେ ଖେଳିବ। ଆଣ୍ଟିଗୁଆରେ ହେବାକୁ ଥିବା ମ୍ୟାଚରେ ଭାରତୀୟ ଖେଳାଳିମାନେ ସେମାନଙ୍କର ଦିନିକିଆ ଓ ଟି୨୦ ଅନ୍ତର୍ଜାତୀୟରେ ଯେଉଁ ନମ୍ବରର ଜର୍ସି ପିନ୍ଧି ଖେଳୁଛନ୍ତି ସେହି ନମ୍ବର ଜର୍ସି ବ୍ୟବହାର କରିବାକୁ ଇଚ୍ଛା ପ୍ରକାଶ କରିଥିବା ସୂଚନା ମିଳିଛି। ସେହି କ୍ରମରେ ଅଧିନାୟକ ବିରାଟ କୋହଲି ୧୮ ନମ୍ବର ଓ ରୋହିତ ଶର୍ମା ୪୫ ନମ୍ବର ଜର୍ସି ପିନ୍ଧିବେ। ତେଣୁ ଅଧିକାଂଶ ଖେଳାଳି ସୀମିତ ଓଭର କ୍ରିକେଟ୍ରେ ଯେଉଁ ଜର୍ସି ନମ୍ବର ବ୍ୟବହାର କରୁଛନ୍ତି ଟେଷ୍ଟ କ୍ରିକେଟ୍ରେ ମଧ୍ୟ ସମାନ ଜର୍ସି ନମ୍ବରରେ ଖେଳିବେ ବୋଲି କୁହାଯାଉଛି। ଅନ୍ୟପକ୍ଷରେ କିମ୍ବଦନ୍ତୀ କ୍ରିକେଟର ସଚିନ ତେନ୍ଦୁଲକରଙ୍କ ନଂ-୧୦ ଜର୍ସିକୁ ବିସିସିଆଇ ଅନୌପଚାରିକ ଭାବେ ଅବସର ଦେଇଛି। ଫଳରେ କୌଣସି ଭାରତୀୟ ଖେଳାଳି ଏହି ନମ୍ବରର ଜର୍ସି ପିନ୍ଧି ଖେଳିବେ ନାହିଁ। ତେବେ ଭାରତକୁ ଦିନିକିଆ ଓ ଟି୨୦ ବିଶ୍ୱକପ୍ ସହ ଚାମ୍ପୟନ୍ସ ଟ୍ରଫି ବିଜୟୀ କରାଇପାରିଥିବା ପୂର୍ବତନ ଅଧିନାୟକ ଧୋନୀଙ୍କ ୭ନମ୍ବର ଜର୍ସି ଉପଲବ୍ଧ ଥିଲେ ହେଁ ଏହି ନମ୍ବର ଆଗାମୀ ଦିନରେ କୌଣସି ଖେଳାଳି ନିଜ ଜର୍ସିରେ ବ୍ୟବହାର କରିବା ଆଶା କ୍ଷୀଣ ରହିଛି ବୋଲି ଜଣେ ବରିଷ୍ଠ ବିସିସିଆଇ ଅଧିକାରୀ କହିଛନ୍ତି। ଭାରତର ଏହି ସଫଳତମ ଅଧିନାୟକ ୨୦୧୫ରୁ ଟେଷ୍ଟ କ୍ରିକେଟ୍ ଫର୍ମାଟରୁ ଅବସର ନେଇ ସାରିଥିବାବେଳେ ଦିନିକିଆ ଓ ଟି୨୦ ଫର୍ମାଟ କ୍ରିକେଟ୍ ଖେଳ ଜାରି ରଖିଛନ୍ତି। ତେଣୁ ଜର୍ସି ନଂ-୭ କେବଳ ଧୋନୀଙ୍କର, ତେଣୁ ଏହି ନମ୍ବର ଯଦି କେହି ବ୍ୟବହାର କରନ୍ତି ଲୋକେ ତାହାକୁ ସହଜରେ ଗ୍ରହଣ କରିବେ ନାହିଁ ବୋଲି ସମ୍ପୃକ୍ତ ଅଧିକାରୀ କହିଛନ୍ତି। ପୂର୍ବରୁ ସଚିନଙ୍କ ୧୦ ନମ୍ବର ଜର୍ସି ଶାର୍ଦ୍ଦୁଳ ଠାକୁର ପିନ୍ଧି ସମାଲୋଚିତ ହୋଇଥିବାରୁ ଧୋନୀଙ୍କ ୭ ନମ୍ବର ଜର୍ସି ଲାଗି ସେଭଳି କିଛି ଘଟଣା ଘଟିବାକୁ ବିସିସିଆଇ ଦେବ ନାହିଁ ବୋଲି ଅନୁମାନ କରାଯାଉଛି।