ଲଣ୍ଡନ,୧୫।୭(ଏଏଫ୍ପି)- ଐତିହାସିକ ଲଡର୍ସ ଗ୍ରାଉଣ୍ଡରେ ନ୍ୟୁଜିଲାଣ୍ଡକୁ ହରାଇ ବିଶ୍ୱକପ୍ ଚାମ୍ପିୟନ ହୋଇଥିବା ଇଂଲଣ୍ଡ ଦଳକୁ ରାଣୀ ସାଲ୍ୟୁଟ କରିଛନ୍ତି। ୫୦ ଓଭରିଆ ମ୍ୟାଚ୍ ଓ ସୁପର ଓଭର ଟାଇ ହେବା ପରେ ଅଧିକ ସଂଖ୍ୟକ ବାଉଣ୍ଡ୍ରି ମାରିଥିବାରୁ ଇଂଲଣ୍ଡକୁ ବିଜୟୀ ଘୋଷିତ କରାଯାଇଥିଲା। ଐତିହାସିକ ବିଜୟ ଅବସରରେ ରାଣୀ ଲେଖିଛନ୍ତି, ପ୍ରିନ୍ସ ଫିଲିପ ଓ ମୋ ଆଡୁ ରୋମାଞ୍ଚକ ବିଜୟ ହାସଲ କରିଥିବା ଇଂଲଣ୍ଡ ପୁରୁଷ କ୍ରିକେଟ ଦଳକୁ ଶୁଭେଚ୍ଛା। ରନର୍ସ ଅପ୍ ନ୍ୟୁଜିଲାଣ୍ଡ ଦଳ ପ୍ରତି ମୋର ସହାନୁଭୂତି ରହିଛି। ତୁମେ ପୂରା ଟୁର୍ନାମେଣ୍ଟରେ ପ୍ରଶଂସନୀୟ ପ୍ରଦର୍ଶନ କରିଛ। ଉଭୟ ପୁରୁଷ ଓ ମହିଳା ବିଶ୍ୱକପ ଚାମ୍ପିୟନ ଦଳ ସ୍ମୃତିରେ ସ୍ବତନ୍ତ୍ର ଷ୍ଟାମ୍ପ ଛପାଇବାକୁ ବ୍ରିଟେନର ରୟାଲ ମେଲ ପୋଷ୍ଟାଲ ସର୍ଭିସ ଘୋଷଣା କରିଛି। ଏଥିସହିତ ବିଶ୍ୱକପ ଫାଇନାଲ ଆୟୋଜକ ଗ୍ରାଉଣ୍ଡ ନିକଟରେ ୧୫ ନୂଆ ବକ୍ସରେ ଧଳା ଓ ସ୍ବର୍ଣ୍ଣ ରଙ୍ଗର ବ୍ୟାଟ୍ ଏବଂ ବଲ ଚିତ୍ର କରାଯିବ। ଏହି କାର୍ଯ୍ୟ ୩ ମାସ ମଧ୍ୟରେ ଶେଷହେବ। ଉଲ୍ଲେଖଥାଉ କି, ୨୦୧୭ରେ ହେଥର ନାଇଟଙ୍କ ଇଂଲଣ୍ଡ ଦଳ ଭାରତୀୟ ଦଳକୁ ହରାଇ ମହିଳା ବିଶ୍ୱକପ୍ ଜିତିଥିଲା।
