New Delhi: Senior Congress leader Ghulam Nabi Azad with Andhra Pradesh CM and TDP President N Chandrababu Naidu, Delhi Chief Minister Arvind Kejriwal, TMC's Derek O' Brien, DMK's Kanimozhi, CPI's D Raja and other opposition leaders addresses the media after meeting the Election Commission over their concerns about Electronic Voting Machines and the VVPAT (Voter Verified Paper Trail Machines), at Nirvachan Sadan, in New Delhi, Tuesday, May 21, 2019. (PTI Photo/Ravi Choudhary) (PTI5_21_2019_000099B)
ନୂଆଦିଲ୍ଲୀ,୨୪-୫- :ଭାଜପାକୁ କ୍ଷମତାଠାରୁ ଦୂରେଇ ରଖିବା ଲାଗି ବିରୋଧୀ ଦଳଗୁଡିକ ପକ୍ଷରୁ ଶେଷ ପର୍ଯ୍ୟନ୍ତ ଉଦ୍ୟମ ଜାରି ରହିଥିଲା। ନିର୍ବାଚନ ପୂର୍ବରୁ ବିଭିନ୍ନ ମଞ୍ଚରେ କଂଗ୍ରେସ ସମେତ ବିଭିନ୍ନ ବିରୋଧୀ ଦଳ ଏକାଠି ହୋଇ ସେମାନଙ୍କର ଶକ୍ତି ପ୍ରଦର୍ଶନ କରିଥିଲେ ହେଁ ମେଣ୍ଟ ଗଠନ କରିବାରେ ବିଫଳ ହୋଇଥିଲେ। ନିର୍ବାଚନ ଶେଷ ହେବା ପରେ ମଧ୍ୟ ପୁଣି ଥରେ ଆନ୍ଧ୍ରପ୍ରଦେଶ ମୁଖ୍ୟମନ୍ତ୍ରୀ ଏନ୍. ଚନ୍ଦ୍ରାବାବୁ ନାଇଡୁଙ୍କ ନେତୃତ୍ୱରେ ପୁଣି ଥରେ ବିରୋଧୀ ନେତାମାନଙ୍କୁ ଏକାଠି କରିବାକୁ ଉଦ୍ୟମ ହୋଇଥିଲା। ଭୋଟ ଗଣତି ପୂର୍ବରୁ ଭିଭିପିଏଟି ଯାଞ୍ଚ ଲାଗି ୨୨ଟି ବିରୋଧୀ ଦଳର ନେତା ଏକାଠି ହୋଇ ନିର୍ବାଚନ କମିଶନଙ୍କୁ ଜଣାଇବା ସହ ନିର୍ବାଚନ ପରବର୍ତ୍ତୀ ମେଣ୍ଟ ଗଠନ ଲାଗି ଆଲୋଚନା ଚଳାଇଥିଲେ। ତେବେ ନିର୍ବାଚନ ଫଳାଫଳ ଭାଜପା ସପକ୍ଷରେ ଯିବା ଫଳରେ ସେମାନଙ୍କ ମେଣ୍ଟ ଉଦ୍ୟମ ଫସର ଫାଟିଯାଇଛି।
ସୁଦ୍ଧା ଟ୍ରେଣ୍ଡ ଅନୁଯାୟୀ ଭାଜପା ନେତୃତ୍ୱାଧୀନ ଏନ୍ଡିଏ ୩୪୯ ଆସନରେ ଆଗରେ ରହି ସରକାର ଗଢ଼ିବାକୁ ଯାଉଥିବାବେଳେ କଂଗ୍ରେସ ନେତୃତ୍ୱାଧୀନ ଉପା ୮୮ ଏବଂ ଅନ୍ୟାନ୍ୟ ଦଳ ୧୦୫ ଆସନରେ ଆଗରେ ରହିଛି। ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ନେତୃତ୍ୱରେ ଗୈରିକ ସୁନାମି, ବିକାଶ ଏବଂ ଜାତୀୟତାବାଦ ସ୍ଲୋଗାନ, ଦଳର ସାଂଗଠନିକ ଦକ୍ଷତା ବଳରେ ଭାଜପା ୨୦୧୪ ଫଳାଫଳକୁ ଟପିଯାଇଛି। ମଧ୍ୟପ୍ରଦେଶ, ରାଜସ୍ଥାନ, ଛତିଶଗଡ, ହରିୟାଣା ସମେତ ଉତ୍ତର ଏବଂ ପଶ୍ଚିମ ଭାରତର ଅଧିକାଂଶ ରାଜ୍ୟରେ ଦଳକୁ ୫୦ ପ୍ରତିଶତରୁ ଅଧିକ ଭୋଟ ମିଳିଛି।
ଦଳଗୁଡିକ ଭାଜପାକୁ କ୍ଷମତାଠାରୁ ଦୂରେଇ ରଖିବାକୁ ଚାହଁୁଥିଲେ ମଧ୍ୟ ଏକାଠି ହୋଇପାରିଲେ ନାହିଁ। ଏହାର ମୁଖ୍ୟ କାରଣ ହେଲା ସେମାନଙ୍କ ମଧ୍ୟରୁ ଅଧିକାଂଶ ଦଳର ନେତା ଥିଲେ ପ୍ରଧାନମନ୍ତ୍ରୀ ଆଶାୟୀ। ସବୁଠୁ ଗୁରୁତ୍ୱପୂର୍ଣ୍ଣ ରାଜ୍ୟ ଉତ୍ତରପ୍ରଦେଶରେ ମେଣ୍ଟ ଯୋଜନା ବିଫଳ ହେଲା। ବିଏସ୍ପି ନେତ୍ରୀ ମାୟାବତୀ ଏବଂ ସମାଜବାଦୀ ପାର୍ଟି ଅଧ୍ୟକ୍ଷ ଅଖିଳେଶ ଯାଦବ କଂଗ୍ରେସକୁ ସାଙ୍ଗରେ ନେବାକୁ ଚାହିଁଲେନି। ସେଠାରେ ଏସ୍ପି-ବିଏସ୍ପି-ଆରଏଲ୍ଡି ମେଣ୍ଟ କରିବା ଫଳରେ କଂଗ୍ରେସ ବାଧ୍ୟ ହୋଇ ଏକାକୀ ନିର୍ବାଚନ ଲଢ଼ିଲା। ଫଳରେ ୟୁପିରେ ଭାଜପାର ଆସନ ସଂଖ୍ୟା ୨୦୧୪ ତୁଳନାରେ କମିଥିଲେ ମଧ୍ୟ ଏହାକୁ ଅଟକାଇବା ସମ୍ଭବ ହେଲାନାହିଁ। ସେହିପରି ବିହାରରେ ମଧ୍ୟ କଂଗ୍ରେସ ନେତୃତ୍ୱାଧୀନ ମେଣ୍ଟ ଭାଜପା ନେତୃତ୍ୱାଧୀନ ମେଣ୍ଟର ଅଗ୍ରଗତି ରୋକିବାରେ ବିଫଳ ହେଲା। ୬ ମାସ ତଳେ ରାଜସ୍ଥାନ, ମଧ୍ୟପ୍ରଦେଶ ଓ ଛତିଶଗଡରେ କଂଗ୍ରେସ ବିଧାନସଭା ନିର୍ବାଚନ ଜିତି ସରକାର ଗଢ଼ିଥିଲେ ମଧ୍ୟ ସେଠାରେ ଫଳାଫଳ ସମ୍ପୂର୍ଣ୍ଣ ବଦଳିଗଲା। ଭାଜପା ନେତୃତ୍ୱଧୀନ ମେଣ୍ଟ ପୂର୍ଣ୍ଣ ସଂଖ୍ୟାଗରିଷ୍ଠତାର ସହ ସରକାର ଗଢ଼ିବାକୁ ଯାଉଥିଲାବେଳେ ବିରୋଧୀ ଏକତାକୁ ଶକ୍ତ ଧକ୍କା ଲାଗିଛି।
କିଛିଦିନ ହେଲା ଚନ୍ଦ୍ରାବାବୁ ରାଜଧାନୀ ଦିଲ୍ଲୀ ସମେତ ଉତ୍ତରପ୍ରଦେଶ ଏବଂ ପଶ୍ଚିମବଙ୍ଗ ଯାଇ ବିରୋଧୀ ଦଳଗୁଡିକୁ ଏକାଠି କରିବାକୁ ଉଦ୍ୟମ କରିଥିଲେ। ଏହି କ୍ରମରେ ସେ କଂଗ୍ରେସ ଅଧ୍ୟକ୍ଷ ରାହୁଲ ଗାନ୍ଧୀ, ଉପା ଅଧ୍ୟକ୍ଷା ସୋନିଆ ଗାନ୍ଧୀ, ମାୟାବତୀ, ଅଖିଳେଶ ଯାଦବ, ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିଓ୍ବାଲ ଏବଂ ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କୁ ଭେଟିଥିଲେ। ବିରୋଧୀ ନେତାମାନେ ସରକାର ଗଠନ କରିବାକୁ ପ୍ରସ୍ତୁତ କି ନାହିଁ ବୋଲି ଚନ୍ଦ୍ରାବାବୁ ସେମାନଙ୍କୁ ପ୍ରଶ୍ନ କରିବା ସହ ନିର୍ବାଚନ ପରବର୍ତ୍ତୀ ସ୍ଥିତି ସମ୍ପର୍କରେ ଚିନ୍ତା କରିବା ପାଇଁ କହିଥିଲେ। ମମତା ମଧ୍ୟ ଭବିଷ୍ୟତରେ ବଡ଼ ଭୂମିକା ନେବା ଲାଗି ସୂଚନା ଦେଇଥିଲେ। ଫଳାଫଳ ପ୍ରକାଶ ପାଇବା ପରେ ଏହି ନେତାମାନ ସ୍ବପ୍ନ ଧୂଳିସାତ୍ ହୋଇଯାଇଛି।