ରିଷିଡା,୨୩ା୨ (ଡି.ଏନ୍.ଏ.)-କଳାହାଣ୍ଡି ଜିଲା କର୍ଲାମୁଣ୍ଡା ବ୍ଲକର ରିଷିଡ଼ା ସାପ୍ତାହିକ ହାଟ ଜିଲାର ଗୁଟେ ବଡ଼ ହାଟ୍। ଇ ହାଟ୍ଟା ସବୁ ଶନିବାର ବସୁଥିଲାବେଲେ କେସିଙ୍ଗା ନିୟନ୍ତ୍ରୀତ ବଜାର କମିଟି ଅଧୀନରେ ରହିଛେ। ହାଟ୍ ଉପରେ କଳାହାଣ୍ଡି ଜିଲା ସମେତ ବଲାଙ୍ଗୀର, ବୌଦ୍ଧ, କନ୍ଧମାଳ ଜିଲାର ପାଖାପାଖି ୫୦ ହଜାର ଲୋକ୍ ନିରଭର କରୁଛନ୍। ସେନ୍ତା ଗାଈଗୋରୁ ଘିନାବିକାରେ ଇ ହାଟ୍ର ନଁା ରହିଛେ। ସାପ୍ତାହିକ ହାଟରେ ୨ଟା ବଡ଼ ବଡ଼ ଗୁଦାମ ଘର ରହିଥିଲାବେଲେ ଦୁକାନୀମାନେ ବସବାର ଲାଗି ୩ଟା ପିଁଢ଼ା ରହିଛେ। ସେ ଭିତ୍ରୁ ଗୁଟେ ପିଁଢ଼ାର ଅବସ୍ତା ବହୁତ୍ ଖରାପ ଅଛେ। ବରଷା ହେଲେ ପାଏନ୍ ଗଲବାର ଲାଗି ଦୁକାନୀମାନେ ବହୁତ ହଇରାନ ହରକତ ହେଉଛନ୍। ଇ ପିଁଢ଼ାର ଛାତ୍ର କଥା ନାଇଁ କହେବାର ଭଲ। କେତେବେଲେ କାହାର ଉପରେ ପଡ଼ବା କିଛି କହି ନାଇଁହୁଏ। ସେନତା ପୁରନା ଯାତ୍ରି ବିଶ୍ରାମ ଘରଟା ବି ଅସ୍କୁରା ହେଇ ପଡ଼ିଛେ, ଘରର ଗୁଟେ କଁାଥି ବରଷାରେ ଭାଂଗି ଯାଇଛେ। ଏହେଦେ ହାଟର ପିଁଢ଼ାରେ ଚାଷୀମାନେ ବିକ୍ରି ଲାଗି ଧାନ ରଖିଛନ୍। ଏନ୍ତାଥି ହାଟେ ଜାଗାଠାନ୍ର ବଡ଼ଭାରି ଅଭାବ ଦେଖାଦେଇଛେ। ହାଟେ ବିପଦ୍ ଅବସ୍ତାରେ ଥିବାର କୁଠାମାନ ଭାଂଗି ଦେବାର ଲାଗି ଝନେ ସାମାଜିକ କରମୀ ଲଛମନ ଭୋଇ ଆଗରୁ ଜନେଇଥିଲେ ବି ବଜାର କମିଟି ଆଏଁଖ୍ ଦୁର୍ଶିଆ ପଦକ୍ଷେପ ନାଇଁନେଇ। ଏନ୍ତାଥି ହାଟ୍ ଭିତରେ ରହିଥିବାର ଇ ଦଦ୍ରା କୁଠାମାନ୍ କେତେବେଲେ କାହାର ଉପରେ ପଡ଼ି ଧନ୍ଜୀବନ୍ର କ୍ଷୟକ୍ଷତି ହେବା କିଛି କହି ନାଇଁହୁଏ। ଇ ଦଦ୍ରା କୁଠାମାନ ଭାଂଗି ତାର ଜାଗାରେ ନୂତନ କୁଠା ତିଆର କରବାର ନିହାତି ଜରୁରି ଆଏ। ଇଆଡ଼େ ଦୁକାନୀମାନେ ଉପେ ଶୂଇନ୍ ହେଇ ଦଦ୍ରା ପିଁଢ଼ା ଉପରେ ବସି ବେପାର କରୁଛନ୍। ହେଲେ ଇ ଦିଗେ ବଜାର କମିଟି ତରଫୁ କିଛି ପଦକ୍ଷେପ ନାଇଁ ନିଆଯିବାର। ଇ ଦିଗେ ଉଚ କତୁରପକ୍ଷ ଦୁରୁଷ୍ଟି ଦେଇ ପଦକ୍ଷେପ ନେବାକେ ସାଧାରନରେ ଦାବି ହେଉଛେ।
