କେସିଙ୍ଗା, ୨୮।୫ (ଡି.ଏନ୍.ଏ): କଳାହାଣ୍ଡି ଜିଲା କେସିଙ୍ଗା ବ୍ଲକ ପାଷ୍ଟିକୁଡ଼ି ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ର ଅଧୀନରେ ଥିବାର ବାଲସି ସ୍ବାସ୍ଥ୍ୟସେବା କେନ୍ଦ୍ର ବହୁତ ବଛର ହେଲା ବିପଦ ଅବସ୍ତାରେ ପଡ଼ିରହିଛେ। ସୂଚନା ଅନ୍ସାରେ ଇ ସ୍ବାସ୍ଥ୍ୟସେବା କେନ୍ଦ୍ରରର ଥାପନା ୧୯୮୫ ସାଲେ ହେଇଥିଲା। ସ୍ବାସ୍ଥ୍ୟସେବା କେନ୍ଦ୍ରରେ ବାଲସି ପଁଚେତ୍ରେ ନିଯୁକ୍ତି ପାଇଥିବାର ସ୍ବାସ୍ଥ୍ୟ ସେବିକା ରହିବାର ବେବସ୍ତା ଅଛେ। ହେଲେ ଆଏଜକେ ୩୪ ବଛର ତଲେ ତିଆର ହେଇଥିବାର ଇ ସ୍ବାସ୍ଥ୍ୟସେବା କେନ୍ଦ୍ର ବିପଦ ଅବସ୍ତାରେ ପଡ଼ିରହିଛେ। ସ୍ବାସ୍ଥ୍ୟ କେନ୍ଦ୍ରର ଥାପନା ଦିନୁ ବାଡ଼ା ତିଆର ନାଇଁ ହେଇ। ଇଠାନେ ଥିବାର ଶୌଚାଲୟ, ସ୍ବାସ୍ଥ୍ୟସେବା କେନ୍ଦ୍ର, ରଁଧାଘର, ଗାଧୁଆଘର, ଅଫିସ ଘରର କବାଟ ଝରକା ପୁଖରା ହେଇ ଭାଂଗିରୁଜି ଗଲାନ। କେନ୍ଦ୍ରର ସବୁ କୁଠାର ଛାତ୍ରୁ ସିମେଟ ଛାଡ଼ି ଲୁହାଛଡ଼୍ମାନ୍ ଫଟିକ୍ ଦିଶୁଛେ। କେତେବେଲେ କେନ୍ କୁଠାର ଛାତ୍ ଗଲିପଡ଼ବା କିଛି କହି ନାଇଁହୁଏ। ଏନ୍ତାଥି ବି କେନ୍ଦ୍ରର ଝନେ ସ୍ବାସ୍ଥ୍ୟ ସେବିକା ନିଜର ଜୀବନ୍କେ ପାଏନ୍ ଛଡ଼େଇ କୁଠାଥି ରହିଆସୁଛନ୍। ଇ ବାବ୍ଦେ ସ୍ବାସ୍ଥ୍ୟ ସେବିକା କଳାହାଣ୍ଡି ଜିଲା ମୁଖିଆ ଚିକିସତ୍ା ଅଧ୍କାରୀ ଆର ମେଡିକାଲ ଅଫିସର ପାଷ୍ଟିକୁଡ଼ିକୁଁ ଲେଖିକରି ଦେଇଛନ୍। ବିଭାଗ୍ ତରଫୁ ଇ ସେବାକେନ୍ଦ୍ରକେ ଡେମେଜ ଘୋଷନା କରାଯାଇଛେ। ଭିନେ ଭିନେ ସମିଆରେ ସ୍ବାସ୍ଥ୍ୟ କେନ୍ଦ୍ରର ମରାମତି ବି କରାଯାଇଛେ। ଗଲା ୨୦୧୭-୧୮ ଆରଥିକ୍ ବଛରରେ ସ୍ବାସ୍ଥ୍ୟକେନ୍ଦ୍ରର ମରାମତି ଆର ବାଡ଼ା ତିଆରି ଲାଗି ବାଲସି ପଁଚେତ୍କେ ୧ଲାଖ୍ ୮୦ ହଜାର ଟଁକା ବିଭାଗ ତରଫୁ ଦିଆଯାଇଥିଲା। ହେଲେ ଟଁକା ମଂଜୁର ହେବାର ଆଏଜ୍କେ ଦୁଇ ବଛର ବିତିଯାଇଥିଲେ ବି ପଁଚେତ୍ ତରଫୁ ସ୍ବାସ୍ଥ୍ୟ କେନ୍ଦ୍ରର ମରାମତି ନାଇଁ କରାଯାଇ। ଏନ୍ତାଥି ସ୍ବାସ୍ଥ୍ୟସେବା କେନ୍ଦ୍ରରେ ସ୍ବାସ୍ଥ୍ୟ ସେବିକା ଝନ୍କ ନିଜର ପରିବାର ସମେତ ଭଏଭିତ ଅବସ୍ତାରେ ରହୁଛନ୍। ଇ ବାବ୍ଦେ ଜିଲା ଚିକିସତ୍ା ଅଧ୍କାରୀକୁଁ ପଚରାଲାରୁ ସେ କୁଠା ଡେମେଜ ହେଇଗଲାନ। ନୂତନ କୁଠା ତିଆର କରାଯିବା, ମୁଇଁ ଇ ଘଟନାର ତଦଁତ୍ କରମି ବଲି ସେ କହିଥିଲେ। ସେନ୍ତା ଇ ବାବ୍ଦେ ବାଲସି ପଁଚେତ୍ର ପିଇଓ ଆନନ୍ଦ ମହାନନ୍ଦକୁଁ ପଚରାଲାରୁ ସାଧାରନ ନିରବାଚନ ଲାଗି ବାଡ଼ା ଆର ଘର ତିଆରି କାମ୍ ନାଇଁ ହେଇପାରି ବଲି ସେ କହିଥିଲେ।
