ରୂପ୍ସା, ୬।୯-ବାଲେଶ୍ୱର ଜିଲା ସଦର ବ୍ଲକରେ ଗୋସମ୍ପଦ ଏବେ ବିପଦରେ। ବିଭିନ୍ନ ପ୍ରାଣୀ ଚିକିତ୍ସାଳୟ ଓ ପ୍ରାଣୀଧନ ନିରୀକ୍ଷକ କେନ୍ଦ୍ରରେ ଡାକ୍ତର, ନିରୀକ୍ଷକ ଓ ଆଟେଣ୍ଡାଣ୍ଟ ପଦବୀ ଫାଙ୍କା ପଡ଼ିଛି। ଫଳରେ ପ୍ରାଣୀ ଚିକିତ୍ସା ଓ ଟିକାକରଣ କାର୍ଯ୍ୟ ବାଧାପ୍ରାପ୍ତ ହେଉଛି। ରୂପ୍ସା ମୁଖ୍ୟ ପ୍ରାଣୀ ଚିକିତ୍ସାଳୟକୁ ଉଦାହରଣ ଭାବେ ନିଆଯାଇପାରେ। ୨୦୧୦ରୁ ଏହି ଚିକିତ୍ସାଳୟର ନୂତନ ଗୃହ ନିର୍ମାଣ କାର୍ଯ୍ୟ ଆରମ୍ଭ ହୋଇଥିଲେ ହେଁ ଏଯାବତ୍ ଏହା ସମ୍ପୂର୍ଣ୍ଣ ହୋଇପାରିନାହଁି। ବିଭାଗୀୟ ଅପାରଗତା ପାଇଁ ସ୍ଥାନୀୟ ବାସିନ୍ଦା ଦାୟୀ କରିଛନ୍ତି।
ସଦର ବ୍ଲକର ୩୭ଟି ପଞ୍ଚାୟତ ମଧ୍ୟରୁ ରୂପ୍ସା ପ୍ରାଣୀ ଚିକିତ୍ସାଳୟ ଅଧୀନରେ ୨୧, ରସାଳପୁର ଚିକିତ୍ସାଳୟ ଅଧୀନରେ ୧୫ ଓ ଜିଲା ମୁଖ୍ୟ ପ୍ରାଣୀ ଚିକିତ୍ସାଳୟ ଅଧୀନରେ ଗୋଟିଏ ପଞ୍ଚାୟତ ରହିଛି। ରୂପ୍ସା ପ୍ରାଣୀ ଚିକିତ୍ସାଳୟ ଅଧୀନରେ ଥିବା ୨୧ ପଞ୍ଚାୟତ ପାଇଁ ହଳଦୀପଦା, ଶ୍ରୀରାମପୁର, ସାର୍ଥା, ଛାନୁଆ, ମାଣିକୁଲା, ପରିକ୍ଷୀ ଓ କୁଡ଼ିଆ ଆଦି ସ୍ଥାନରେ ୭ଟି ପ୍ରାଣୀଧନ ନିରୀକ୍ଷକ କେନ୍ଦ୍ର ରହିଛି। ଏହି ସମସ୍ତ କେନ୍ଦ୍ରରେ କୌଣସି ଆଟେଣ୍ଡାଣ୍ଟ ନାହାନ୍ତି। ପରିକ୍ଷୀ କେନ୍ଦ୍ରରେ ନିରୀକ୍ଷକ ମଧ୍ୟ ନାହାନ୍ତି। ରୂପ୍ସା ମୁଖ୍ୟ ଚିକିତ୍ସାଳୟରେ ଜଣେ ଭିଏଏସ୍ ଓ ଜଣେ ଆଟେଣ୍ଡାଣ୍ଟ ଥିବା ବେଳେ ଜଣେ ପ୍ରାଣୀଧନ ନିରୀକ୍ଷକ ଓ ଜଣେ ଆଟେଣ୍ଡାଣ୍ଟଙ୍କ ପଦବୀ ଦୀର୍ଘଦିନ ହେଲା ଫାଙ୍କା ପଡ଼ିଛି। ଏଠାରେ ନିର୍ମିତ ହୋଇଥିବା ପୁରୁଣା ଆଜବେଷ୍ଟସ ଛପର ବିଶିଷ୍ଟ ଗୋଦାମଘର ଓ କାର୍ଯ୍ୟାଳୟ ପରିତ୍ୟକ୍ତ ଅବସ୍ଥାରେ ରହିଛି। ୨୦୧୦-୧୧ ବର୍ଷ ଆର୍ଥିକ ବର୍ଷରେ ବ୍ଲକ କାର୍ଯ୍ୟାଳୟ ପକ୍ଷରୁ ଆର୍ଆଇଡିଏଫ୍ ଯୋଜନାରେ ନୂତନ ଚିକିତ୍ସାଳୟ ଗୃହ ନିର୍ମାଣ କାର୍ଯ୍ୟ ଆରମ୍ଭ ହୋଇଥିଲା। ୯ବର୍ଷ ବିତିଯାଇଥିଲେ ହେଁ ଏଯାବତ୍ ନିର୍ମାଣ କାର୍ଯ୍ୟ ସମ୍ପୂର୍ଣ୍ଣ ହୋଇପାରି ନାହଁି। ଦାୟିତ୍ୱରେ ଥିବା ବିଭାଗୀୟ ଅଧିକାରୀଙ୍କ ଦାୟିତ୍ୱହୀନତା ଓ ମନମୁଖି କାର୍ଯ୍ୟ ପାଇଁ ଚିକିତ୍ସାଳୟର ଅବସ୍ଥା ବଦଳି ପାରିନାହଁି।
ତଥ୍ୟ ଅନୁଯାୟୀ ରୂପ୍ସା ପ୍ରାଣୀ ଚିକିତ୍ସାଳୟ ଅଧୀନରେ ଗୋସମ୍ପଦ ୩୭,୭୪୯, ଛେଳି ୨୧,୩୯୩ ଓ କୁକୁଡ଼ା ୭୧,୬୧୨ ରହିଛନ୍ତି। ପ୍ରାଣୀଧନ ନିରୀକ୍ଷକ, ଆଟେଣ୍ଡାଣ୍ଟଙ୍କ ଅଭାବ ଯୋଗୁ ଚିକିତ୍ସା ସେବା ଠିକ୍ ଭାବେ ଯୋଗାଇ ଦିଆଯାଇ ପାରୁନାହଁି। ଭ୍ରାମ୍ୟମାଣ ପ୍ରାଣୀ ଚିକିତ୍ସା ସେବାରେ ସମସ୍ତ ପଞ୍ଚାୟତ ମଧ୍ୟ ସାମିଲ ହୋଇପାରୁ ନ ଥିବା ଅଭିଯୋଗ ହୋଇଛି। ଗୋରୁଙ୍କୁ ବଜବଜିଆ, ସାହାଣ, ଫାଟୁଆ, ଛେଳିବସନ୍ତ, ଛେଳିମଡ଼କ, ଆନ୍ତ୍ରିକ ଜ୍ୱର ଟିକାକରଣରେ ମଧ୍ୟ ବ୍ୟାଘାତ ସୃଷ୍ଟି ହେଉଛି।
ଏ ସମ୍ପର୍କରେ ପ୍ରାଣୀ ଚିକିତ୍ସିକ ଡା. ସତ୍ୟନାରାୟଣ ପୃଷ୍ଟିଙ୍କୁ ଯୋଗାଯୋଗ କରାଯିବାରୁ ସମସ୍ତ ସମସ୍ୟା ସତ୍ତ୍ୱେ ଛେଳି, କୁକୁଡ଼ା, ଗୋ ଚାଷୀଙ୍କୁ ନେଇ ଆବଶ୍ୟକ ପ୍ରଶିକ୍ଷଣ ଓ ସଚେତନତା ଶିବିର ଅନୁଷ୍ଠିତ ହେଉଛି। ସମସ୍ତ ପଞ୍ଚାୟତରେ ପ୍ରାଣୀ ଚିକିତ୍ସା ଓ ଭ୍ରାମ୍ୟମାଣ ସେବା ଯୋଗାଇ ଦେବା ପାଇଁ ସର୍ବଦା ପଦକ୍ଷେପ ନିଆଯାଉଛି। ଫାଙ୍କା ପଡ଼ିଥିବା ଆଟେଣ୍ଡାଣ୍ଟ ପଦବୀ ପୂରଣ ହେଲେ ଆହୁରି ସୁବିଧା ଉପଲବ୍ଧ ହୋଇପାରିବ।
(ବାଞ୍ଛାନିଧି ଦେ)
