ଭଣ୍ଡାରିପୋଖରୀ, ୪ା୨(ଡି.ଏନ୍.ଏ.)- ସରସଦା ପଞ୍ଚାୟତ କୋଳିଗଡ଼ି ଗ୍ରାମର କେନ୍ଦ୍ର ସରକାରଙ୍କ ସୌଭାଗ୍ୟ ଯୋଜନାରେ ସାମିଲ ବିଦ୍ୟୁତ୍ ଉପଭୋକ୍ତା ବିଦ୍ୟୁତ୍ ନ ଜାଳି ବିଲ୍ ଆସୁଥିବା ପ୍ରତିବାଦରେ ଭଣ୍ଡାରିପୋଖରୀ ବିଦ୍ୟୁତ୍ ବିଭାଗ କନିଷ୍ଠଯନ୍ତ୍ରୀଙ୍କ କାର୍ଯ୍ୟାଳୟ ସମ୍ମୁଖରେ ସୋମବାର ଧାରଣା ଦେଇଥିଲେ। କୋଳିଗଡ଼ି ଗ୍ରାମର ପ୍ରାୟ ୧୨ ପରିବାରକୁ କେନ୍ଦ୍ର ସରକାରଙ୍କ ସୌଭାଗ୍ୟ ଯୋଜନାରେ ସାମିଲ କରାଯାଇଛି। କିନ୍ତୁ ବିଦ୍ୟୁତ୍ ସଂଯୋଗ ଦିଆଯାଇନାହିଁ। ହେଲେ ଉପଭୋକ୍ତାମାନଙ୍କର ବିଲ୍ ୧୦ ହଜାର ଭଳି ଆସିଛି। ଏନେଇ ଉପଭୋକ୍ତାମାନେ ଭଦ୍ରକ ଅଧୀକ୍ଷଣ ଯନ୍ତ୍ରୀଙ୍କୁ ୨୧ ତାରିଖରେ ଜଣାଇଥିଲେ। କୌଣସି ପଦକ୍ଷେପ ନିଆ ନ ଯିବାରୁ ସୋମବାର ସେମାନେ ଧାରଣାରେ ବସିଥିଲେ। ଏହି ଧାରଣାକୁ ନୈତିକ ସମର୍ଥନ ଜଣାଇ ଭାଜପା ନେତା ବଦ୍ରିନାରାୟଣ ଧଳ, ପଞ୍ଚାୟତ ସମିତି ଉପାଧ୍ୟକ୍ଷ ସତ୍ୟବ୍ରତ ଦାସ, ଗିରିଶ ସାମଲ, କରୁଣାକର ସାମଲ, ଅକ୍ଷୟ ମହାନ୍ତି, ବିବେକାନନ୍ଦ ସାହୁ, ସୂର୍ଯ୍ୟମଣି ରାଉତ, ପ୍ରଫୁଲ୍ଲ ସାହୁ, ଅଜୟ ପାତ୍ର ସାମିଲ ହୋଇଥିଲେ। ଉପଭୋକ୍ତା ନିର୍ମଳ କର, ସନାତନ ସାହୁ, ନଟବର ବିଶ୍ୱାଳ, ମହେଶ୍ୱର ସାହୁ, କୈଳାସ ବିଶ୍ୱାଳ, ସୁଶାନ୍ତ ବିଶ୍ୱାଳ ପ୍ରମୁଖ ଧାରଣା ଦେଇଥିଲେ। ଧାମନଗର ବିଦ୍ୟୁତ୍ ବିଭାଗ ସହକାରୀ ଯନ୍ତ୍ରୀ ଘଟଣାସ୍ଥଳେ ପହଞ୍ଚତ୍ ବୁଝାଶୁଝା କରିବା ସହ ୫ ତାରିଖରେ କନିଷ୍ଠଯନ୍ତ୍ରୀଙ୍କୁ ନେଇ ଗ୍ରାମରେ ପହଞ୍ଚି ଘଟଣା ସମ୍ପର୍କରେ ବୁଝିବେ ବୋଲି ପ୍ରତିଶ୍ରୁତି ଦେବାରୁ ଉପଭୋକ୍ତାମାନେ ଧାରଣାରୁ ହଟିଥିଲେ।
