ଭୁବନେଶ୍ୱର,୧୯ା୨(ବ୍ୟୁରୋ):ଗଞ୍ଜାମ ଜିଲା ଗୋଳନ୍ଥରା ଥାନା ଅନ୍ତର୍ଗତ ମେନ୍ଦ୍ରରାଜପୁର ଗାଁ ନିକଟରେ ବିଦ୍ୟୁତ୍ ତାର ଲାଗି ଘଟିଥିବା ଦୁର୍ଘଟଣା ଦୁର୍ଭାଗ୍ୟଜନକ। ଭବିଷ୍ୟତରେ ଯେପରି ଏପରି ଘଟଣାର ପୁନରାବୃତ୍ତି ହେବ ନାହିଁ, ଏଥିପାଇଁ ବାଣିଜ୍ୟ ଓ ପରିବହନ ବିଭାଗ ଅନ୍ୟ ସମସ୍ତ ବିଭାଗ ସହ ସମନ୍ବୟ ରଖି କାର୍ଯ୍ୟ କରିବ ବୋଲି ବିଭାଗୀୟ ମନ୍ତ୍ରୀ ପଦ୍ମନାଭ ବେହେରା କହିଛନ୍ତି। ବିଧାନସଭାରେ ଆଗତ ହୋଇଥିବା ମୁଲତବୀ ପ୍ରସ୍ତାବ ‘ଗୋଳନ୍ଥରା ଥାନା ମେନ୍ଦ୍ରରାଜପୁର: ଆପରାଧିକ ଅବହେଳାରୁ ସରକାର ହେଲେ ଯମ, ଅକାଳରେ ଲିଭିଗଲା ୧୦ ଅମୂଲ୍ୟ ଜୀବନ’ର ଉତ୍ତର ରଖି ମନ୍ତ୍ରୀ ଏହା କହିଥିଲେ।
ହେଲେ ମୁଲତବୀ ପ୍ରସ୍ତାବ ଆଗତ କରିଥିବା ସମସ୍ତ ବିରୋଧୀ ବିଧାୟକ ଆଲୋଚନା ପୂର୍ବରୁ କକ୍ଷତ୍ୟାଗ କରିଥିଲେ। ଏଥିରେ ଉଭୟ କଂଗ୍ରେସ ଏବଂ ଭାଜପା ବିଧାୟକ ସାମିଲ ହୋଇଥିଲେ। ପ୍ରଥମେ ଭାଜପା ଏବଂ ଏହାର କିଛି ସମୟ ପରେ କଂଗ୍ରେସ ସଭ୍ୟ କକ୍ଷତ୍ୟାଗ କରିଥିଲେ। ଭାଜପା ସଭ୍ୟମାନେ ଶକ୍ତି ମନ୍ତ୍ରୀ କାହିଁକି ଉତ୍ତର ରଖୁନାହାନ୍ତି ବୋଲି କହିଥିଲେ। ବାଚସ୍ପତି ସୂର୍ଯ୍ୟନାରାୟଣ ପାତ୍ର ଭାଜପା ବିଧାୟକମାନଙ୍କୁ ମନାଇବା ପାଇଁ ଶାସକ ଦଳ ମୁଖ୍ୟ ସଚେତକ ପ୍ରମିଳା ମଲିକ ଏବଂ ଉପମୁଖ୍ୟ ସଚେତକ ରୋହିତ ପୂଜାରୀଙ୍କୁ ନିର୍ଦ୍ଦେଶ ଦେଇଥିଲେ। ମାତ୍ର ଏହା କୌଣସି ସୁଫଳ ଆଣି ନ ଥିଲା। ତେଣୁ କେବଳ ଶାସକ ଦଳ ଉପସ୍ଥିତିରେ ଏହା ଆଲୋଚନା କରାଯାଇଥିଲା। ଏହି ଦୁର୍ଘଟଣା ପରେ ନିଆଯାଇଥିବା ସମସ୍ତ ଆଇନଗତ ପଦକ୍ଷେପ ସମ୍ପର୍କରେ ସୂଚନା ଦେଇଥିଲେ। ୨୦ ଫୁଟ୍ ଉପରେ ରହିବା ଆବଶ୍ୟକ ତାରଟି ଉକ୍ତ ସ୍ଥାନରେ ୧୨ ଫୁଟ୍ ଉଚ୍ଚତାରେ ରହିଥିଲା। ଗାଡିଟି ନିୟମ ଉଲ୍ଲଂଘନ କରିଥିବାରୁ ଡ୍ରାଇଭରଙ୍କୁ ଗିରଫ କରାଯାଇଛି। ଏଥିସହିତ ତାଙ୍କ ଡ୍ରାଇଭିଂ ଲାଇସେନ୍ସ ସସ୍ପେଣ୍ଡ କରାଯାଇଛି। ଏଥିସହିତ ସାଉଥ୍କୋ କନିଷ୍ଠ ଯନ୍ତ୍ରୀ, ଉପଖଣ୍ଡ ଅଧିକାରୀଙ୍କୁ କାର୍ଯ୍ୟରୁ ନିଲମ୍ବନ କରାଯାଇଛି। ଗ୍ରାମ୍ୟ ଉନ୍ନୟନ ବିଭାଗ ଯନ୍ତ୍ରୀଙ୍କୁ ମଧ୍ୟ ନିଲମ୍ବନ କରାଯାଇଥିବା ମନ୍ତ୍ରୀ ସୂଚନା ଦେଇଥିଲେ। ମୁଖ୍ୟମନ୍ତ୍ରୀଙ୍କ ରିଲିଫ୍ ପାଣ୍ଠିରୁ ୨ ଲକ୍ଷ ଲେଖାଏ ଦିଆଯାଇଛି। ବିଦ୍ୟୁତ୍ ବିଭାଗ ପକ୍ଷରୁ ୪ ଲକ୍ଷ ଟଙ୍କା ଲେଖାଏ ପ୍ରଦାନ କରାଯିବ। ସେହିପରି ଏହି ଦୁର୍ଘଟଣାରେ ସମ୍ପୂର୍ଣ୍ଣ ଅକ୍ଷମ ଏବଂ ଅନାଥ ହୋଇଥିବା ପିଲାଙ୍କ ସମସ୍ତ ଖର୍ଚ୍ଚ ଓ ଆର୍ଥିକ ପ୍ୟାକେଜ୍ ଦେବାକୁ ଗୋପାଳପୁର ବିଧାୟକ ପ୍ରଦୀପ ପାଣିଗ୍ରାହୀ କହିଥିଲେ। ସେହିଭଳି ଏଣିକି ବିଦ୍ୟୁତଜନିତ ଦୁର୍ଘଟଣା ଘଟିଲେ ମୃତକଙ୍କ ପିଛା ୪ ଲକ୍ଷ, ୬୦ ପ୍ରତିଶତ ଭିନ୍ନକ୍ଷମ ୨ ଲକ୍ଷ, ଗାଈ ଓ ମଇଁଷି ଦୁର୍ଘଟଣାରେ ମଲେ ୩୦,୦୦୦ ଟଙ୍କା ଏବଂ ଛେଳି ବିଦ୍ୟୁତ ଆଘାତରେ ମଲେ ୩୦୦୦ ଟଙ୍କା ସହାୟତା ପ୍ରଦାନ କରାଯିବ।
