ମୁମ୍ବାଇ,୨୬-୫: ଜେଟ୍ ଏୟାରଓ୍ବେଜ୍ ପ୍ରତିଷ୍ଠାତା ନରେଶ ଗୋୟଲ ଓ ତାଙ୍କ ସ୍ତ୍ରୀ ଅନୀତା ଗୋୟଲ ବିଦେଶ ଖସିଯିବାକୁ ଉଦ୍ୟମ କରି ବିଫଳ ହୋଇଛନ୍ତି। ଶନିବାର ଗୋୟଲଙ୍କ ଦମ୍ପତିଙ୍କୁ ବିଦେଶ ଯାତ୍ରା ପୂର୍ବରୁ ମୁମ୍ବାଇ ବିମାନ ବନ୍ଦରରେ ଇମିଗ୍ରେଶନ କର୍ତ୍ତୃପକ୍ଷ ରୋକିଥିଲେ। ସେମାନେ ଏମିରେଟ୍ସ ବିମାନ ଇକେ-୫୦୭ ଯୋଗେ ଦୁବାଇ ଯାଇଥାନ୍ତେ। ତେବେ ଇମିଗ୍ରେଶନ କର୍ତ୍ତୃପକ୍ଷ ସେମାନଙ୍କୁ ଅନୁମତି ଦେଇ ନ ଥିଲା। ଏହି ଘଟଣା ପରେ ଅନୀତାଙ୍କ ନାମରେ ଥିବା ଚେକ୍ଡ ଇନ୍ ଲଗେଜକୁ ମଧ୍ୟ ବିମାନରୁ ଓହ୍ଲାଇ ଦିଆଯାଇଥିଲା। ଏହି ବିମାନଟି ଅପରାହ୍ନ ୩.୩୫ରେ ଉଡ଼ିଥିଲା। ସୂଚନାଥାଉ କି, ଜେଟ୍ ଏୟାରଓ୍ବେଜ୍ରେ ଆର୍ଥିକ ସଙ୍କଟ ଦେଖାଦେବା ପରେ ଏସ୍ବିଆଇ ନେତୃତ୍ୱରେ ଋଣପ୍ରଦାନକାରୀ ବ୍ୟାଙ୍କ ସମୂହ ଚାପରେ ନରେଶ ଗୋୟଲ ଓ ଅନୀତା କମ୍ପାନୀ ବୋର୍ଡରୁ ଇସ୍ତଫା ଦେଇଥିଲେ। ଏଥିସହ ନରେଶ କମ୍ପାନୀର ଅଧ୍ୟକ୍ଷ ପଦରୁ ମଧ୍ୟ ଓହରିଯାଇଥିଲେ। ତାଙ୍କର ଇସ୍ତଫା ପରେ ବ୍ୟାଙ୍କ ସମୂହ ଜେଟ୍ର ନିୟନ୍ତ୍ରଣ ନିଜ ହାତକୁ ନେଇ ଏହାର ଅଂଶଧନ ବିକ୍ରି ପାଇଁ ଉଦ୍ୟମ କରୁଛି। ଅନ୍ୟପକ୍ଷରେ ଏହି ଘଟଣା ପରେ ଜେଟ୍ ଏୟାରଓ୍ବେଜ୍ ଅଫିସର୍ସ ଆଣ୍ଡ୍ ଷ୍ଟାଫ୍ ଆସୋସିଏଶନ ସଭାପତି କିରଣ ପାଓ୍ବସ୍କର ମୁମ୍ବାଇ ପୋଲିସ କମିଶନରଙ୍କୁ ପତ୍ର ଲେଖି ଗୋୟଲ ଦମ୍ପତି, ଅନ୍ୟ ନିର୍ଦ୍ଦେଶକମାନଙ୍କ ପାସପୋର୍ଟ ଜବତ କରିବାକୁ ଅନୁରୋଧ କରିଥିଲେ। ସେମାନେ ବିଦେଶ ପଳାଇଯିବାର ସମ୍ଭାବନା ରହିଛି ବୋଲି ସେ ଆଶଙ୍କା ବ୍ୟକ୍ତ କରିଥିଲେ।
