ନୂଆପଡ଼ା ଅଫିସ,୧୯ା୮ : ପୂର୍ବତନ ପର୍ଯ୍ୟଟନ ମନ୍ତ୍ରୀ ତଥା ବର୍ତ୍ତମାନର ବିଜ୍ଞାନ, କାରିଗରୀ ପ୍ରଯୁକ୍ତି ବିଦ୍ୟା ମନ୍ତ୍ରୀ ଅଶୋକ କୁମାର ପଣ୍ଡା ଦିନିକିଆ ନୂଆପଡା ଗସ୍ତରେ ଆସି ଜିଲାର ବିଭିନ୍ନ କାର୍ଯ୍ୟକ୍ରମର ସମୀକ୍ଷା କରିଛନ୍ତି । ଏହି ଅବସରରେ ମନ୍ତ୍ରୀ ସ୍ଥାନୀୟ ପତୋରାସ୍ଥିତ ଯୋଗେଶ୍ୱର ମନ୍ଦିର ବୁଲି ଦେଖିବା ସହ ପୂଜାର୍ଚ୍ଚନା କରିଛନ୍ତି ।
ରବିବାର ସକାଳେ ଟ୍ରେନ ଯୋଗେ ମନ୍ତ୍ରୀ ପଣ୍ଡା ସହଧର୍ମିଣୀଙ୍କ ସହ ଆସି ନୂଆପଡ଼େରେ ପହଞ୍ଚତ୍ ଥିଲେ । ନୂଆପଡ଼ା ଜିଲା ପ୍ରଶାସନ ଓ ବିଜେଡି ତରଫରୁ ତାଙ୍କୁ ସ୍ବାଗତ କରାଯାଇଥିଲା । ପ୍ରଥମେ ମନ୍ତ୍ରୀ ନିକଟସ୍ଥ ବିଜୁ ପଟ୍ଟନାୟକ ଭିନ୍ନକ୍ଷମ ବିଦ୍ୟାଳୟ ଯାଇ ଦିବ୍ୟାଙ୍ଗମାନଙ୍କ ସହ ଆଲୋଚନା କରିଥିଲେ। ପରେ ନୂଆପଡ଼ାରୁ ପତୋରା ଯିବା ବାଟରେ କାଞ୍ଚନବେନ ରସିକଲାଲ ଚେରିଟେବଲ ଟ୍ରଷ୍ଟ ତରଫରୁ ପରିଚାଳିତ ବିଦ୍ୟାଳୟକୁ ଯାଇ ଅନ୍ବେଷା କାର୍ଯ୍ୟକ୍ରମରେ ଶିଶୁଙ୍କ ସ୍ଥିତି ଦେଖିଥିଲେ । ତାଙ୍କ ସହ ଟ୍ରଷ୍ଟର ସଭ୍ୟ ତଥା ସ୍ଥାନୀୟ ବିଧାୟକ ରାଜେନ୍ଦ୍ର ପ୍ରସାଦ ଢୋଲକିଆ, ଜୟ ଢୋଲକିଆ, ଜିଲା ମଙ୍ଗଳ ଅଧିକାରୀ ସନ୍ଧ୍ୟା ମାଝି, ଜିଲା ପରିଷଦ ଅଧ୍ୟକ୍ଷା ନମିତା ପ୍ରଧାନ, ଉପାଧ୍ୟକ୍ଷ ଭାନୁ ମାଝି, ଟିଟୁ ପଣ୍ଡା, ଅବନୀ ଜୋଷୀ, ସିତୁ ବୋଧନକର, ସ୍ବାଗତ ଜୋଷୀ ପ୍ରମୁଖ ସାମିଲ ଥିଲେ । ପରେ ପତୋରାରେ ପହଞ୍ଚତ୍ ମନ୍ଦିର ଦର୍ଶନ କରିବା ସହ ପୂଜାର୍ଚ୍ଚନା କରି ଶିବଲିଙ୍ଗରେ ପାଣି ଲାଗି କରିଥିଲେ । ଏହି ଅବସରରେ ମନ୍ଦିର ପରିଚାଳନା କମିଟି ତରଫରୁ ତାଙ୍କୁ ସମ୍ବର୍ଦ୍ଧନା ଦିଆଯାଇଥିଲା । ମନ୍ଦିରର ସାମଗ୍ରୀକ ବିକାଶ ସକାଶେ କମିଟି ପକ୍ଷରୁ ଏକ ଦାବିପତ୍ର ପ୍ରଦାନ କରାଯାଇଥିଲା। ସେଠାରେ ପାନୀୟ ଜଳ ବ୍ୟବସ୍ଥା କରିବା ସହ ପାଚେରି, ପାନ୍ଥଶାଳା, ରାସ୍ତା ନିର୍ମାଣର ଆବଶ୍ୟକତା ରହିଛି ା ଅବହେଳିତ ରାଜୀବ ଉଦ୍ୟାନ ପ୍ରତି ଦୃଷ୍ଟି ଦେବାକୁ କମିଟି ଦୃଷ୍ଟି ଆକର୍ଷଣ କରିଥିଲା। ଏହି ପରିପ୍ରେକ୍ଷୀରେ ମନ୍ତ୍ରୀ ପଣ୍ଡା କୌଣସି ଅଞ୍ଚଳର ବିକାଶ ପାଇଁ ପର୍ଯ୍ୟଟନ ଏକ ଆଧାର । ପତୋରା ସ୍ବର୍ଣ୍ଣଗର୍ଭା । ଏଠିକାର ଉନ୍ନତି ସକାଶେ ସରକାରଙ୍କ ତରଫରୁ ଅନୁଦାନ ଏବଂ ଅନୁକମ୍ପା ରହିଛି ବୋଲି କହିଥିଲେ । ଏହାକୁ ନେଇ ବିଭାଗୀୟ ମନ୍ତ୍ରୀଙ୍କୁ ଅବଗତ କରିବେ ବୋଲି ସେ ପ୍ରତିଶ୍ରୁତି ଦେଇଥିଲେ। କମିଟି ସଭାପତି ମୂରଲୀଧର ପଣ୍ଡା, ସମ୍ପାଦକ ଶ୍ୱେତରାମ ଦେୱାଙ୍ଗନ, ସୁରେଶ ଅଗ୍ରୱାଲ, ଭାନୁପ୍ରତାପ ଦଣ୍ଡସେନା, କେଶରୀ ଜୈନ ପ୍ରମୁଖ ସ୍ବାଗତ କରିଥିଲେ। ପତୋରାରୁ ଫେରି ନୂଆପଡ଼ା ସଦର ବ୍ଲକରେ ଆୟୋଜିତ ସଭାରେ ୫ଜଣ ଭିନ୍ନକ୍ଷମମାନଙ୍କୁ ଟ୍ରାଇ ସାଇକେଲ, ୨ ଜଣଙ୍କୁ ହ୍ବିଲ ଚେୟାର, ୭୭ ଜଣଙ୍କୁ ଭତ୍ତା, ୬୭୫ ଜଣ ହିତାଧିକାରୀଙ୍କୁ ପ୍ରଧାନମନ୍ତ୍ରୀ ଆବାସ କାର୍ଯ୍ୟାଦେଶ ପ୍ରଦାନ କରିଥିଲେ। ଖରିଆରରୋଡରେ ବରିଷ୍ଠ ନାଗରିକମାନଙ୍କ ସହ ବିଭିନ୍ନ ସମସ୍ୟା ନେଇ ମନ୍ତ୍ରୀ ଆଲୋଚନା କରିଥିଲେ। ଅପରାହ୍ନରେ ନୂଆପଡାସ୍ଥିତ ସର୍କିଟ ହାଉସରେ ଜିଲାପାଳ ଏବଂ ଜିଲାସ୍ତରୀୟ ଅଧିକାରୀମାନଙ୍କୁ ନେଇ ଏକ ସମୀକ୍ଷା ବୈଠକ ଅନୁଷ୍ଠିତ ହୋଇଥିଲା। ବୈଠକ ସାରିବା ପରେ ସେ କୋମନା, ଖଡିଆଳ ଗସ୍ତ କରିଥିଲେ ା
