ଯୋଧପୁର: ଏବେ କରୋନା ଭାଇରସ୍ ସଂକ୍ରମଣ ହିଁ ମଣିଷକୁ ବଞ୍ଚିବାର ନୂଆ ଷ୍ଟାଇଲ୍ ଶିଖାଇ ଦେଇଛି। ଏମିତି ଅନେକ ସମସ୍ୟା ଥିଲା, ଯାହାକୁ କୋଟିକୋଟି ଟଙ୍କା ଖର୍ଚ୍ଚକରି ସରକାର କରିପାରୁ ନ ଥିଲେ, ତାକୁ ସମାଧାନ କରିପାରିଛି କରୋନା। ଏଇ ଯେମିତି ବାୟୁମଣ୍ଡଳର ପ୍ରଦୂଷଣକୁ ରୋକିବା, ଗଙ୍ଗାନଦୀକୁ ସଫା ରଖିବା ଇତ୍ୟାଦି। ଠିକ୍ ଏମିତି ଏକ ସାମାଜିକ ସମସ୍ୟା ହେଉଛି ବାଲ୍ୟବିବାହ। ରାଜସ୍ଥାନରେ ବାଲ୍ୟବିବାହ ପ୍ରଥାକୁ ବେଶ୍ ସମ୍ମାନ ଦିଆଯାଏ। ବିଶେଷକରି ଅକ୍ଷୟତୃତୀୟା ପୂର୍ବରୁ ବାଲ୍ୟବିବାହ ସପ୍ତାହ ପାଳନ କରାଯାଏ। କିନ୍ତୁ ଏଥର ସଂକ୍ରମଣ ଭୟରେ ଅନେକ ସ୍ଥାନରେ ବାଲ୍ୟବିବାହ ହୋଇପାରିନାହିଁ। ରାଜ୍ୟର ବିଭିନ୍ନ ଜିଲାରେ କଲେକ୍ଟରମାନଙ୍କୁ ଏହି ସମୟରେ ବାଲ୍ୟବିବାହ ରୋକିବା ପାଇଁ ସତର୍କ ଦୃଷ୍ଟି ରଖିବା ପାଇଁ କୁହାଯାଇଥାଏ। ସରକାରଙ୍କ ଆକଟ ଥିଲେ ବି ଅନେକ ସ୍ଥାନରେ ଲୋକେ ନିଜ ପରମ୍ପରା ଅନୁସାରେ ବାଲ୍ୟବିବାହ କରାଇଥାନ୍ତି। କିନ୍ତୁ ଏଥର ସବୁଆଡ଼େ ଲୋକେ କରୋନା ଭୟରେ କୌଣସି ପ୍ରକାର ଭୋଜିଭାତ କରିବା ପାଇଁ ପ୍ରସ୍ତୁତ ହେଉନାହାନ୍ତି। ସେମାନେ ନିଜେ ନିଜେ ସତର୍କ ହୋଇ ଅଲଗା ରହୁଛନ୍ତି। କିନ୍ତୁ ବାଲ୍ୟବିବାହ ରୋକିବା ପାଇଁ କାମ କରୁଥିବା କିଛି ସଂସ୍ଥାର କହିବା ଅନୁସାରେ ଗ୍ରାମାଞ୍ଚଳରେ କରୋନା ଭାଇରସ୍ ନେଇ ଲୋକେ କମ୍ ସଚେତନ। ସେଥିପାଇଁ ବାଲ୍ୟବିବାହ ଆୟୋଜନ କରିବାର ସମ୍ଭାବନା ରହିଛି। ତେଣୁ ପୋଲିସକୁ ସତର୍କ ରହିବାକୁ ହେବ।
