କଟକ ଅଫିସ, ୧୪ା୧୧: ଚଳିତବର୍ଷ ବାଲିଯାତ୍ରାରେ ନିଆଯାଇଥିବା ନୂତନ ପଦକ୍ଷେପ ମଧ୍ୟରେ ମୋ’ କଟକ ପାଭିଲିୟନ ନୂତନ ଅଧ୍ୟାୟ ଯୋଡ଼ିଛି। ଜିଲା ପ୍ରଶାସନ ପକ୍ଷରୁ ଆୟୋଜିତ ଏହି ପାଭିଲିୟନରେ ବିଭିନ୍ନ ପ୍ରସଙ୍ଗକୁ ନେଇ ବିଶେଷଜ୍ଞଙ୍କ ସହିତ ଆଲୋଚନା, ପର୍ଯ୍ୟାଲୋଚନା କରାଯିବା ସହ କର୍ମଶାଳା ଅନୁଷ୍ଠିତ ହୋଇଥିଲା। ବାଲିଯାତ୍ରାକୁ ଜିଜ୍ଞାସା ମନୋବୃତ୍ତି ନେଇ ଆସୁଥିବା ଦର୍ଶକମାନଙ୍କୁ ବିଭିନ୍ନ ପ୍ରସଙ୍ଗରେ ଅବଗତ କରାଯିବା ନିମନ୍ତେ ପ୍ରଶାସନ ପକ୍ଷରୁ ଏହି ଭିନ୍ନ ପ୍ରୟାସ କରାଯାଇଛି। ବୁଧବାର ବାଲିଯାତ୍ରା ପଡ଼ିଆରେ ଅନୁଷ୍ଠିତ ଏହି ପାଭିଲିୟନରେ ଓଡ଼ିଶା ଇଣ୍ଡୋନେସିଆ ରିଲେଶନ ମ୍ୟାରିଟାଇ ଟ୍ରେଡ ଆଣ୍ଡ ରିଲେଶନ ଉପରେ ଆଲୋଚନାଚକ୍ର ଅନୁଷ୍ଠିତ ହୋଇଥିଲା।
ଏଥିରେ ଉପଜିଲାପାଳ ଶୁଭ୍ରାଂଶୁ ମିଶ୍ର ଅଧ୍ୟକ୍ଷତା କରିଥିଲେ। ସଂସ୍କୃତି ବିଭାଗ ଗବେଷକ ପ୍ରଫେସର ସୁବାସ ଚନ୍ଦ୍ର ଦାଶ ଯୋଗଦେଇ ଇଣ୍ଡୋନେସିଆ ଏବଂ ଓଡ଼ିଶାର କେବଳ ବାଣିଜି୍ୟକ ସମ୍ପର୍କ ନୁହେଁ କଳା, ସାହିତ୍ୟ ଓ ସଂସ୍କୃତିରେ ମଧ୍ୟ ସମନ୍ବୟ ସୃଷ୍ଟି ହୋଇପାରିଥିଲା ବୋଲି କହିଥିଲେ। ପୂର୍ବରୁ ଏହି ଅଞ୍ଚଳର ନାମ ଓଡ଼ିଶା କିମ୍ବା ଉତ୍କଳ ନ ଥିଲା ବରଂ କଳିଙ୍ଗ ନାମରେ ପ୍ରତିଷ୍ଠିତ ଥିଲା। କଳିଙ୍ଗର ବଣିକମାନେ ଇଣ୍ଡୋନେସିଆର ବାଲି, ଜାଭା, ସୁମାତ୍ରା ଆଦି ଅଞ୍ଚଳରେ ଏଠାକାର ସାମଗ୍ରୀକୁ ସେଠାରେ ଓ ସେଠାକାର ସାମଗ୍ରୀକୁ ଏଠାରେ ଆଣି ବ୍ୟବସାୟ କରୁଥିଲେ। ଆଜି ବି କଟକ ଭଳି ବାଲିରେ ଫିଲିଗ୍ରୀ (ତାରକସି) କଳାର ଚାହିଦା ରହିଛି। ସେଠାରେ ଚାନ୍ଦି ତାରକସି କାମ ଓଡ଼ିଶା ଓ ଇଣ୍ଡେନେସିଆର ସମନ୍ବୟ ଯୋଗୁ ସମ୍ଭବ ହୋଇପାରିଛି। ଏଥିସହିତ ଓଡ଼ିଶାର ଶାସ୍ତ୍ରୀୟ ଓଡ଼ିଶୀ ନୃତ୍ୟ ଭଳି ଇଣ୍ଡୋନେସିଆରେ ମଧ୍ୟ ଗଟୁନୃତ୍ୟ ଦେଖିବାକୁ ମିଳେ। ଯେଉଁ ନୃତ୍ୟରେ ବ୍ୟବହୃତ ପୋଷାକ, ଅଳଙ୍କାର ଏପରି କି ନୃତ୍ୟମୁଦ୍ରା ମଧ୍ୟ ଏକାଭଳି। କେବଳ ସେତିକି ନୁହେଁ ଓଡ଼ିଆଙ୍କ ଖାଦ୍ୟ ପଖାଳ ମଧ୍ୟ ସେଠାରେ ପ୍ରଚଳିତ ରହିଛି ବୋଲି ସେ କହିଥିଲେ।
