ଲଖନପୁର,୧୦।୧୦(ଡି.ଏନ୍.ଏ.): ଝାରସୁଗୁଡ଼ା ଜିଲା ଲଖନପୁର ବ୍ଲକ ସୀମାନ୍ତବର୍ତ୍ତୀ ୧୯ଖଣ୍ଡ ମୌଜା କନକତୋର ପଞ୍ଚାୟତର ଲୁହାବଗା ଗ୍ରାମରେ ଗୁରୁବାର ସକାଳେ ଏକ ଅଭାବନୀୟ ଘଟଣା ଘଟିଛି । ସକାଳୁ ଗାଁ ଲୋକେ ଶୌଚ ପାଇଁ ବାହାରକୁ ଯାଇଥିବାବେଳେ ଏକ ବାର୍ହା ସହିତ ଲୋକଙ୍କ ମୁହାଁମୁହିଁ ହୋଇଥିଲା। ବାର୍ହା ପ୍ରଥମେ ସେହି ରାସ୍ତାରେ ଯାଉଥିବା ଜଣେ ସାଇକେଲ ଚାଳକଙ୍କ ଉପରକୁ ଲମ୍ଫ ମାରିଥିଲା। ଏଥିରେ ସାଇକେଲ ଚାଳକ ତଳେ ପଡ଼ି ଗୁରୁତର ହୋଇଛନ୍ତି। ଆହତ ଜଣଙ୍କ ହେଲେ ନିକଟସ୍ଥ ଲୁହାବଗା ଗ୍ରାମର ଲଖପତି ଭୋଇ(୬୦)। ପରେ ବାର୍ହା ଟିକେ ଆଗକୁ ଯାଇ ଜଣେ ବୃଦ୍ଧାଙ୍କୁ ଆକ୍ରମଣ କରିଥିଲା। ଏଥିରେ ଉକିଆ ପ୍ରଧାନ ଗୁରୁତର ହୋଇଛନ୍ତି। ତାଙ୍କ ହାତ ଓ ଗୋଡ଼ରେ ଆଘାତ ଲାଗିଛି । ଆହତ ବୃଦ୍ଧାଙ୍କୁ ଗୁରୁତର ଅବସ୍ଥାରେ ପରିବାର ଲୋକେ ସୀମାନ୍ତବର୍ତ୍ତୀ ଛତିଶଗଡ଼ର ରାୟଗଡ଼ ଏକ ସରକାରୀ ସ୍ବାସ୍ଥ୍ୟକେନ୍ଦ୍ରରେ ଭର୍ତ୍ତି କରାଯାଇଛି। ବୃଦ୍ଧା ଜଣଙ୍କ ଅସହାୟ ହୋଇଥିବାରୁ ଚିକିତ୍ସା ପାଇଁ ସରକାରୀ ସହାୟତା ଯୋଗାଇ ଦେବା ପାଇଁ ଦାବି ହେଉଛି । ବନ୍ୟଜନ୍ତୁମାନେ ନିୟମିତ ଜନବସତି ମୁହାଁ ହୋଇ ଧାନଫସଲ ନଷ୍ଟ କରିବା ସହ ମଣିଷଙ୍କୁ ଆକ୍ରମଣ କରୁଥିବା ନଜିର ରହିଛି । ଏ ଦିଗରେ ବନ ବିଭାଗ ସ୍ବତନ୍ତ୍ର ଦୃଷ୍ଟି ଦେବା ପାଇଁ ସାଧାରଣରେ ଦାବି ହେଉଛି।
