ବାରିପଦା ଅଫିସ,୩୧ା୫- ମୟୂରଭଞ୍ଜ ଜିଲା ବାରିପଦାର ରଙ୍ଗମାଟିଆସ୍ଥିତ ପଣ୍ଡିତ ରଘୁନାଥ ମୁର୍ମୁ ମେଡ଼ିକାଲ କଲେଜରେ ରବିବାରଠାରୁ କରୋନା ଟେଷ୍ଟିଂ ଆରମ୍ଭ ହୋଇଛି। ଜିଲାପାଳ ବିନୀତ ଭରଦ୍ୱାଜ ଏହି ଟେଷ୍ଟିଂ ଲ୍ୟାବ୍କୁ ଉଦ୍ଘାଟନ କରିଛନ୍ତି। ପ୍ରତିଦିନ ଏଠାରେ ୧୦୦ ଜଣଙ୍କ ସ୍ବାବ୍ ପରୀକ୍ଷା ହେବ ଓ ଆଗକୁ ଟେଷ୍ଟିଂ ସଂଖ୍ୟା ବୃଦ୍ଧି କରାଯିବ ବୋଲି ଜିଲାପାଳ ସୂଚନା ଦେଇଛନ୍ତି। ମାଇକ୍ରୋ ଭାଓରୋଲୋଜି ବିଭାଗ ପକ୍ଷରୁ ୨ଟି ଲ୍ୟାବ୍ରେ ୨ଟି ମେଶିନ୍ରେ ପରୀକ୍ଷା କରାଯିବ। ପୂର୍ବରୁ କରୋନା ସନ୍ଦେହରେ ଯେଉଁ ସ୍ବାବ୍ ସାମ୍ପୁଲ ସଂଗ୍ରହ କରାଯାଉଥିଲା ତାହା କଟକ ଓ ଭୁବନେଶ୍ୱରକୁ ପରୀକ୍ଷା ପାଇଁ ପଠାଯାଉଥିଲା। ବର୍ତ୍ତମାନ ଆଉ ସେଭଳି କରା ନ ଯାଇ ଯେଉଁ ଦିନ ସାମ୍ପୁଲ ସଂଗ୍ରହ କରାଯିବ ସେହିଦିନ ରିପୋର୍ଟ ଆସିପାରିବ। ମାଗଣାରେ ଏହି ପରୀକ୍ଷା କରାଯିବ। କରୋନା ସନ୍ଦେହ ବ୍ୟକ୍ତି, ଲକ୍ଷଣ ଦେଖାଯାଉଥିବା ବ୍ୟକ୍ତି, ବୃଦ୍ଧାବୃଦ୍ଧ, ଗର୍ଭବତୀ, ପ୍ରବାସୀ, ପଜିଟିଭି ଆକ୍ରାନ୍ତଙ୍କ ସଂସ୍ପର୍ଶରେ ଆସିଥିବା ବ୍ୟକ୍ତିଙ୍କ ସ୍ବାବ୍ ପରୀକ୍ଷା କରାଯିବାକୁ ପ୍ରାଥମିକତା ଦିଆଯିବ। ଏହି ଉଦ୍ଘାଟନ କାର୍ଯ୍ୟକ୍ରମରେ ଅନ୍ୟମାନଙ୍କ ମଧ୍ୟରେ ମେଡ଼ିକାଲ କଲେଜର ଡିନ୍ ଏବଂ ଅଧ୍ୟକ୍ଷ ଡା. ରାମାରମଣ ମହାନ୍ତି, ମାଇକ୍ରୋବାୟୋଲୋଜି ବିଭାଗ ପ୍ରଫେସର ଡା.ଦୀପ୍ତିଲତା ପଣ୍ଡା, ପ୍ରଫେସର ବୈକୁଣ୍ଠନାଥ ମହାପାତ୍ର, ଅତିରିକ୍ତ ଜିଲାପାଳ ବିବେକାନନ୍ଦ ସାହୁ, ଜିଲା ମୁଖ୍ୟ ଚିକିତ୍ସା ଅଧିକାରୀ ଡା.ରୂପଭାନୁ ମିଶ୍ର , ମେଡ଼ିକାଲ ଅଫିସର ଓ କର୍ମଚାରୀମାନେ ଉପସ୍ଥିତ ଥିଲେ। ଉଲ୍ଲେଖଯୋଗ୍ୟ ଯେ, ମୟୂରଭଞ୍ଜ ଜିଲାରେ ମୋଟ ୨୩ କରୋନା ଆକ୍ରାନ୍ତ ଚିହ୍ନଟ ହୋଇଛନ୍ତି। ସେମାନଙ୍କ ମଧ୍ୟରୁ ୧୧ ଜଣ ସୁସ୍ଥ ହୋଇଥିବା ବେଳେ ଅନ୍ୟ ୧୨ ଜଣ ବାଙ୍କିଶୋଳସ୍ଥିତ କୋଭିଡ୍ ହସ୍ପିଟାଲ୍ରେ ଚିକିତ୍ସିତ ହେଉଛନ୍ତି।
