ଅନୁଗୋଳ ଅଫିସ, ୨୭।୫ – ବେଆଇନ ଭାବେ ୩ ବନ୍ଧୁକ ଓ ୯ ରାଉଣ୍ଡ ଗୁଳି ରଖିବା ଅଭିଯୋଗରେ ଲିଙ୍ଗିରାଯୋଡ଼ି ଅଞ୍ଚଳର ବାପି ଓରଫ ସତ୍ୟଜିତ ପ୍ରଧାନ ଏବଂ ତାଙ୍କୁ ବନ୍ଧୁକ ବିକିଥିବା ସମ୍ବଲପୁରର ମହେଶ ମହାପାତ୍ରଙ୍କୁ ଅନୁଗୋଳ ପୋଲିସ ଗିରଫ କରି ମଙ୍ଗଳବାର କୋର୍ଟଚାଲାଣ କରିଛି। ପୂର୍ବରୁ ଜାନୁୟାରୀ ୨୬ରେ ଗିରଫ ହୋଇଥିବା ବାପି ବେଲ୍ରେ ବାହାରିଥିଲେ ହେଁ ପରେ କୋର୍ଟ ବେଲ୍ ଖାରଜ କରି ଆତ୍ମସମର୍ପଣ ପାଇଁ ନିର୍ଦ୍ଦେଶ ଦେଇଥିଲେ। କିନ୍ତୁ ସେ ରାୟପୁର ଫେରାର ହୋଇଯାଇଥିଲେ। ୪ ଦିନ ତଳେ ସେ ଅନୁଗୋଳ ଆସିଥିବା ଖବରପାଇ ପୋଲିସ ଚଢ଼ାଉ କରିଥିଲା। ହେଲେ ଚମ୍ପଟ ମାରିବାକୁ ବସିଥିବାବେଳେ ଥାନା ଅଧିକାରୀ ରମେଶ ଚନ୍ଦ୍ର ବିଶୋଇ, ଏସ୍ଆଇ ପ୍ରକାଶ ମାଝି, ସତ୍ୟ ରଞ୍ଜନ ଲେଙ୍କା, ଅରକ୍ଷିତ ସେଠୀ ବାପିଙ୍କୁ ମାଡ଼ି ବସିଥିଲେ। ଖୋଳତାଡ଼ ପରେ ବାପି ସମ୍ବଲପୁରରୁ ବନ୍ଧୁକ ଓ ଗୁଳି ଆଣିଥିବା ସ୍ବୀକାର କରିଥିଲେ। ଏପରି କି ସମ୍ବଲପୁରର ବନ୍ଧୁକ ବେପାରୀ ମହେଶ ତାଙ୍କୁ ରାୟପୁର ପଠାଇଥିବା ପୋଲିସକୁ କହିଥିଲେ। ପରେ ପୋଲିସ ମହେଶଙ୍କୁ ଆଣି ପଚରା ଉଚରା କରିବା ସହ ଗିରଫ କରିଥିଲା। ମହେଶ ୮ ବର୍ଷ ତଳେ ଅନୁଗୋଳରେ ଷ୍ଟିଲ ବେପାର କରୁଥିଲେ। ଏହି ସମୟରେ ମହେଶ ଜଣେ ବିହାରୀ ଯୁବକଙ୍କ ନିକଟରୁ ବନ୍ଧୁକ କିଣିଥିଲେ ବୋଲି ଅନୁଗୋଳ ପୋଲିସ ସୂଚନା ଦେଇଛି।
