ବାତ୍ୟା ଅମ୍ଫନ୍ ପରେ ଏବେ ‘ନିସର୍ଗ’କୁ ନେଇ ଚିନ୍ତା ବଢିଯାଇଛି। ଏହି ବାତ୍ୟାର ପ୍ରଭାବ ମହାରାଷ୍ଟ୍ର ଏବଂ ଗୁଜରାଟ ଉପରେ ରହିଛି। ବୁଧବାର ଅପରାହ୍ନରେ ବାତ୍ୟା ନିସର୍ଗ ସ୍ଥଳଭାଗ ଛୁଇଁବ। ଏବେ ଏହା ମୁମ୍ବାଇଠାରୁ ମାତ୍ର ୧୫୦ କିମି ଦୂରରେ ରହିଛି। ସ୍ଥଳଭାଗ ଛୁଇଁବା ପରେ ପବନର ବେଗ ୧୦୦ରୁ ୧୨୦ ରହିବ ବୋଲି ଜଣାପଡିଛି। ଏହି ବାତ୍ୟାକୁ ନେଇ ଚିନ୍ତାରେ ଲୋକଙ୍କ ସତର୍କ ରହିବାକୁ ଅନୁରୋଧ କରିଛନ୍ତି ବଲିଉଡ୍ ସେଲିବ୍ରିଟି। ଅଭିନେତ୍ରୀ ପ୍ରିୟଙ୍କା ଚୋପ୍ରା ଟୁଇଟ୍ କରି କହିଛନ୍ତି, ବାତ୍ୟା ନିସର୍ଗ ମୁମ୍ବାଇ ମୁହାଁ ହୋଇଛି। ଯେଉଁଠାରେ ମୋ ଭାଇ ଏବଂ ମାଙ୍କ ସମେତ ୨୦ ମିଲିୟନରୁ ଅଧିକ ଲୋକ ବାସ କରନ୍ତି। ୧୮୯୧ ପରଠାରୁ ମୁମ୍ବାଇ ଏଭଳି ଭୟଙ୍କର ଘୂର୍ଣ୍ଣିବଳୟର ସମ୍ମୁଖୀନ ହୋଇ ନାହିଁ ବୋଲି ସେ କହିଛନ୍ତି। ସେହିପରି ମାଧୁରୀ ଦୀକ୍ଷିତ୍ କହିଛନ୍ତି, ଏବେ ପରିବେଶ ପୂରା ଶାନ୍ତ ଅଛି। ବୋଧହୁଏ ବାତ୍ୟା ଆସିବା ପୂର୍ବର ସଙ୍କେତ। କରୋନା ମହାମାରୀ ନ ଯାଉଣୁ ଏବେ ବାତ୍ୟା। ମୁମ୍ବାଇ ପାଇଁ ଏହା କଠିନ ସମୟ ବୋଲି ସେ କହିଛନ୍ତି। ଅଭିନେତା ଅକ୍ଷୟ କୁମାର ଲୋକଙ୍କୁ ସତର୍କ ରହିବାକୁ ପରାମର୍ଶ ଦେଇଛନ୍ତି।
