ଢେଙ୍କାନାଳ ଅଫିସ,୨୧ା୫ଢେଙ୍କାନାଳ ସହରସ୍ଥିତ ମିନାବଜାର କୁମ୍ଭାରସାହିରେ ସୋମବାର ଅପରାହ୍ନ ପ୍ରାୟ ୨ଟାରେ ଦିନଜ ସାହୁ(୪୫)ଙ୍କ ଘରେ ବାଣ ବିସ୍ଫୋରଣ ହୋଇ ଛାତ ଫାଟିଯାଇଛି। ଏଥିସହ ଘର କାନ୍ଥ ଓ ଝରକା ମଧ୍ୟ ଭାଙ୍ଗି ଯାଇଛି। ଏପରିକି ଦିନଜଙ୍କ ପଡୋଶୀଙ୍କ ଘରର କାଚ ଝରକା ଓ କାନ୍ଥ ମଧ୍ୟ ଫାଟିଯାଇଥିବା ଦେଖାଯାଇଛି। ବିସ୍ଫୋରଣ ଏତେ ପ୍ରଚଣ୍ଡ ଥିଲା ଯେ ଶବ୍ଦରେ ସମ୍ପୃକ୍ତ ଅଞ୍ଚଳ ଥରି ଉଠିଥିଲା। ଏହି ଘଟଣାରେ ନିକଟରେ ଦୋକାନ କରିଥିବା ଅଶୋକ ରାଉଳ, ଦିନଜଙ୍କ ପତ୍ନୀ ମମତା ମହାଳିକ ଓ ପୁଅ ଦେବଶିଷ ସାହୁ(୧୦) ଆହତ ହୋଇଥିଲେ। ଆହତମାନଙ୍କୁ ସ୍ଥାନୀୟ ଡାକ୍ତରଖାନା ପଠାଯାଇଥିଲା। ଖବରପାଇ ଅଗ୍ନିଶମ ସେବା ସଂସ୍ଥା ଘଟଣାସ୍ଥଳରେ ପହଞ୍ଚିଥିଲା। ସେହିପରି ଟାଉନ ଥାନା ପୋଲିସ ମଧ୍ୟ ସେଠାରେ ପହଞ୍ଚି ତଦନ୍ତ କରିଛି। ଘର ଭିତରେ ଖଟତଳେ ବହୁ ପରିମାଣର ନଡିଆ ବାଣ ରହିଥିବା ଦେଖାଯାଇଥିଲା। ତେବେ ଏତେ ସଂଖ୍ୟାରେ ବାଣ କାହିଁକି ରହିଥିଲା, ତାହା ତଦନ୍ତ ସାପେକ୍ଷ ବୋଲି ସାଧାରଣରେ ମତ ପ୍ରକାଶ ପାଇଛି। ଏ ସଂକ୍ରାନ୍ତରେ ଟାଉନ ଥାନା ଅଧିକାରୀ ଅଭିନବ ଡାଳୁଆ କୁହନ୍ତି, ଘଟଣାସ୍ଥଳ ପରିଦର୍ଶନ କରି ଆସିଛୁ ା ଆଲୋଚନା କରାଯାଇ ପଦକ୍ଷେପ ଗ୍ରହଣ କରାଯିବ ା
