ବାରିପଦା ଅଫିସ,୩୧ା୧୦- ବାରିପଦା ସହରର ବ୍ୟସ୍ତ ବହୁଳ ସତ୍ୟସାଇ ଛକ ତଥା ବାଘଡା ରୋଡ଼ରେ ହେଉଥିବା ବେଆଇନ ଘରୋଇ ବସ୍ ପାର୍କିଂକୁ ବୁଧବାର ସାରେ ହଟାଯାଇଛି। ପୂର୍ବାଞ୍ଚଳ ଆଇଜି ଦୀପ୍ତେଶ କୁମାର ପଟ୍ଟନାୟକଙ୍କ ନିର୍ଦ୍ଦେଶ କ୍ରମେ ରାସ୍ତାକଡରେ ରହୁଥିବା ବସ୍ ଗୁଡିକୁ ହଟାଯାଇଛି। କୌଣସି ଆଇନ ଶୃଙ୍ଖଳା ପରିସ୍ଥିତିକୁ ଏଡ଼ାଇବା ପାଇଁ ପୋଲିସ ପକ୍ଷରୁ ବାରିପଦା ଟାଉନ ଥାନା ଅଧିକାରୀ ଅଶୋକ କୁମାର ନାୟକଙ୍କ ସହିତ ଏକ ପ୍ଲାଟୁନ ଫୋର୍ସ ଉପସ୍ଥିତ ରହିଛି। ଏସ୍ପି ପରମାର ସ୍ମିଥ ପୁରୁଷୋତ୍ତମଦାସ ଘଟଣାସ୍ଥଳ ପରିଦର୍ଶନ କରି ପରିସ୍ଥିତି ଅନୁଧ୍ୟାନ କରିଥିଲେ। ଉଲ୍ଲେଖଯୋଗ୍ୟ ଯେ, ବାରିପଦା ମ୍ୟୁନିସିପାଲିିଟି ବସଷ୍ଟାଣ୍ଡରେ ଜାଗା ଅଭାବରୁ ସତ୍ୟସାଇ ଛକରୁ ଜାତୀୟ ରାଜପଥ ତଥା ଦାରୋଗାଡ଼ାହି ଗୋଲେଇକୁ ସଂଯୋଗ କରୁଥିବା ଏହି ବାଘଡା ରୋଡ଼ର ଉଭୟ ପାର୍ଶ୍ୱରେ ଘରୋଇ ବସଗୁଡିକ ଦୀର୍ଘ ସମୟ ଧରି ପାର୍କିଂ କରାଯାଉଥିଲା। ଫଳରେ ପ୍ରତିଦିନ ଟ୍ରାଫିକ ଜାମ ପରିସ୍ଥିତି ସହିତ ଛୋଟମୋଟ ଦୁର୍ଘଟଣା ଘଟୁଥିଲା। ଏନେଇ ବହୁ ଅଭିଯୋଗ ହେବାପରେ ମଧ୍ୟ କୌଣସି ପଦକ୍ଷେପ ନିଆ ଯାଉ ନ ଥିଲା। ନିକଟରେ ପୂର୍ବାଞ୍ଚଳ ଆଇଜି ପଟ୍ଟନାୟକ ବାରିପଦା ଗସ୍ତରେ ଆସିଥିବା ବେଳେ ସହରର କିଛି ବୁଦ୍ଧିଜିବୀ ତାଙ୍କୁ ଅଭିଯୋଗ କରିଥିଲେ।
